Jeremia 9 - Tshwa Bible

¹ O mayiwako! loku a hloko ya mina yi wa hi mati, Ni mahlo ya mina a kuva xibuka xa mihloti, Kasi nzi zi kota mumu ni wusiku a ku rilela Lava va delweko va nhwana wa vanhu va mina!

² O mayiwako! loku nzi wa hi ni zumbo ga vafambi lomu xiwuleni, Zonake nzi wa ta ngha nzi tsikile a vanhu va mina, nzi suka xikari kabye, Hakuva vontlhe zibhayi, i hubye ya vakanganyisi. Tis. 55:6

³ Va kondla lirimi labye ku fanana ni wura kasi ku hemba mawunwa, Va na ni ntamu tikweni, kanilezi a va wu tirisi ku maha zinene, Hakuva vaya mahlweni hi kubiha ni kubiha, A va nzi tivi, ku wula Jehova.

⁴ Ti woneleni nwentlhe hi kota ya vaakelwani, Mu nga tsumbi vanakuloni; Hakuva vamakabye vontlhe va ringa ku kanganyisa, Ni muakelwani munwe ni munwani mbo lumbetana. Mika 7:5; Mat. 10:35

⁵ Vona vontlhe va kanganyisana, A va wulawuli zinene; Va gonzisile a tirimi tabye ku hemba mawunwa, Va ti karata hi ku maha kubiha.

⁶ U akile xikari ka wukhohlisi; Hi kota ya wukhohlisi va ala ku nzi tiva, ku wula Jehova.

⁷ Hikwalaho, ku wula Jehova wa tiyimpi, Nzi ta va nyekisa, nzi va hlota; Hakuva nzi nga mahisa kuyini hi nhwana wa vanhu va mina ke?

⁸ A lirimi labye i seve wu dayako, Li wulawula kukhohlisa. Hi nomu wakwe munhu i wulawula a kurula ni muakelwani, Kanilezi mbilwini yakwe wa mu xiyelela.

⁹ Xana mina nzi nga ta va tsayisa hi kota ya lezi zilo ke? ku wula Jehova. Nzi nga ta ti photela a ka tiko go khwatsi hi legi ke?

¹⁰ Nzi ta halata mihloti nziba nkosi hi kota ya zitsunga, Nzi rilela a wuriselo ga xiwula, hakuva gi swile; A ka hi na munhu a hunzako kona, Hambu kuzwa a kubhoma ka tihomu; A tinyanyani ta tilo ni zihari zi tsutsumile, zi fambile.

¹¹ Nzi ta maha Jerusalema a tinhulu ta maribye, A wuakelo ga mahlolwa; A miti ya ka Juda nzi ta yi maha marumbi, ku nga hi na munhu. Tis. 79:1; Isa. 34:13

¹² Himani a tlharihileko lezaku a pima lezi ke? Himani loyi a nomu wa Jehova wu wulawulileko kakwe, kasi a hi tivisa lezaku tiko gi onhisilwe hikuyini? Kala gi hisilwe ku fanana ni xiwula, ku nga ha hunzi ni munhu?

¹³ Jehova i ngalo: Hi kota ya lezi va tsikileko a nayo wa mina, lowu nzi nga wu veka mahlweni kabye, va nga ingisi a gezu ga mina, hambu ku famba ha gona,

¹⁴ kanilezi va te hutsetse hi kunonoha ka timbilu tabye, na va lanzela maBaali, kota lezi va gonzisilweko hi vararu vabye,

¹⁵ hikwalaho, ku wula Jehova wa tiyimpi, a Nungungulu wa Israeli, aku: Nzi ta va gisa manonwe ni ku va nwisa wutsulu.

¹⁶ Nzi ta va hangalasa xikari ka matiko lawo vona wutsumbu hambu a vararu vabye va nga ma tivangiko, nzi ta rumela supado, kala nzi va hetisa. Levi 23:23; Deut. 28:64

A kulamula ka Nungungulu.

¹⁷ Jehova wa tiyimpi i ngalo: Alakanyani, mu vitana a vavasati lava va tivako a ku hlaluka, vata; Mu vitana ni vavasati va tlharihileko ku maha xirilo, vata.

¹⁸ A va hatle, va hi bela nkosi, Kasi a mahlo ya hina ma humesa mihloti, Ni tikohe ta hina ti tala hi mati!

¹⁹ Hakuva a gezu ga xirilo gi zwele hi le Zioni, giku: Yowee! a lobyiselelo wa hina! Hite koyo tingana, hakuva hi yimelwe ku tsika tiko, Hakuva va hahlulile a tiyindlu ta hina.

²⁰ Nwina vavasati, ma nga zwani a mhaka ya Jehova, Ngha a tindleve ta nwina ti amukela a gezu ga nomu wakwe. Gonzisani a xirilo ka vana va nwina va xisati, Munwe ni munwani a gonzisa munghana wakwe a lisimu la xirilo.

²¹ Hakuva a kufa ku nomile ku enghena ka tinjhanela ta hina, Ku enghenile tindlwini ta hina ta wuhosi; Ka daya vanana maruweni ni majaha laha maphangweni.

²² Wula: Jehova i ngalo: A zirumbi za vanhu zi tawa kota koho lomu masinwini, Ni ku kotisa milumbi ya mutshoveli, A nga kona wa ku rolela.

²³ Jehova i ngalo: A tlhari ngha yi nga ti dzunzi hi wutlhari ga yona, Ni nghwazi ngha yi nga ti dzunzi hi wunghwazi ga yona. Hambu loyi a fumileko a nga ti dzunzi hi kufuma kakwe.

²⁴ Kanilezi ngha loyi a ti dzunzako a ti dzunzela mhakeni leyi, Lezaku a hi ni kuzwisisa a nzi tiva, Lezaku hi mina Jehova nzi mahako wuxinji, ni kulamula ni nongameto laha misaveni; Hakuva nza xalaliswa hi zakunghahi, ku wula Jehova. 1 Kor. 1:31; 2 Kor. 10:17

²⁵ Languta, a masiku mata, ku wula Jehova, laha nzi ta nga tsayisa lava va nga zitshiva, na va hi makhuna timbilwini tabye:

²⁶ Gipite, na Juda, na Edome ni vana va Amoni, na Moabi, ni vontlhe ya akileko xiwuleni va nga ni misisi yi kayilweko mareveni. Wontihe matiko ma hi makhuna, ni yindlu yontlhe ya ka Israeli i khuna mbilwini. Levi 19:27; Miti. 7:51; Rom. 2:28