Jeremia 35 - Tshwa Bible

A vazukulu va Rekabe.

¹ A mhaka yi ngata ka Jeremia hi ka Jehova a masikwini ya Jehoiakimu nʼwana Josia, hosi ya ka Juda yiku:

² Famba a ka vana va Rekabe uya wulawula navo, u va heleketa ndlwini ya Jehova a ka ginwe ga matsawo, u va nyika a vinya vanwa. 1 Kro. 2:55

³ Zonake nzi lo teka Jazania a nʼwana Jeremia, nʼwana Habazzinia, ni vanakulobye ni vana vakwe vontlhe ni yontlhe a yindlu ya va ka Rekabe,

⁴ nzi lo va yisa ndlwini ya Jehova, a tsawini ga vanana va Hanani, nʼwana wa Igdalia, a munhu wa Nungungulu, legi gi nga gamekene ni tsawu ga tihosana, a hehla ka tsawu ga Maaseya nʼwana Xallume, a murinzeli wa nyangwa.

⁵ Nzi lo veka a maguwana ma teleko ni vinya a mahlweni ka vana va yindlu ya ka Rekabe, ni magombe, nziku kabye: Nwanani vinya.

⁶ Kanilezi va lo hlamula vaku: A hinwi vinya, hakuva Jonadaba nʼwana Rekabe, a dadani wa hina, i hi layile, aku: Mu nga dzuki munwa a vinya, nwina ni vana va nwina kala kupinzuka. 2 Tih. 10:15

⁷ Mu nga dzuki mu aka tiyindlu, mu nga byali timbewu, mu nga byali zivina hambu a kuva nazo; kanilezi mu ta tshama matendeni a masiku wontihe ya nwina, kasi mu hanya a masiku yo tala a tikweni legi mu luvelako ka gona.

⁸ Hi ingisile a gezu ga Jonadaba nʼwana Rekabe, a dadani wa hina, ka zontlhe lezi a hi layileko zona; lezaku hi nganwi vinya ni siku ni ginwe, hina ni vasati va hina, ni vana va hina va xinuna ni va xisati;

⁹ ge ni ku aka a tiyindlu kasi hi tshama ka tona; kambe a hi na xivina kutani simu, hambu ni mbewu.

¹⁰ Kanilezi hi tshamile matendeni, hi ingisa ni ku maha zontlhe lezo Jonadaba, a dadani wa hina, a hi layileko zona.

¹¹ Kanilezi, kute loku Nebukadrezzare hosi ya Babuloni a hlasela tiko legi, hite: Tanani, hiya Jerusalema, hi suka mahlweni ka tiyimpi ta maKaldea ni ta maSiria; hikwalaho hi lo ta aka Jerusalema.

¹² Zonake a mhaka ya Jehova yi lota ka Jeremia, yiku:

¹³ Jehova wa tiyimpi, a Nungungulu wa Israeli, i ngalo: Famba, u va byela a vanhu va ka Juda, ni vaaki va Jerusalema, uku: Xana cima mu nga ta amukela gonzo hi kuzwa a timhaka ta mina ke? ku wula Jehova.

¹⁴ A timhaka ta Jonadaba nʼwana Rekabe, leti a layileko vana vakwe lezaku va nganwi vinya, va ti hlayisile; a va nwangi kala nyamutlha lezi, hakuva va ingisile a nayo wa raru wabye. Mina nzi wa sina nzi mu byelile kambe ni kambe, kanilezi a mu nzi ingisangi.

¹⁵ Mina nzi mu rumele kambe ni kambe wontihe a malanza ya mina a vaprofeti, nziku: Hunzulukani munwe ni munwani ndleleni yakwe yo biha, mu chukhwatisa a zimaho za nwina, mu nga lanzeli a vanungungulu vanwani a ku va tirela; zonake mu ta tshama ka tiko legi nzi nga nyika nwina ni vararu va nwina. Kanilezi a mu riyangi tindleve hambu ku nzi ingisa. 2 Tih. 17:13; Jer. 18:11

¹⁶ Kunene a vana va Jonadaba nʼwana Rekabe, va hlayisile a kulayela ka raru wabye, kanilezi a tiko legi a gi nzi ingisangi;

¹⁷ hikwalaho Jehova, a Nungungulu wa tiyimpi, i ngalo: Languta, nzi ta neha hehla ka Juda ni ka vontlhe a vaaki va Jerusalema, gontlhe a khombo nzi gi wulileko ha vona. Hakuva nzi wulawulile kabye, kanilezi a va nzi ingisangi; nzi va vitanile, kanilezi a va hlamulangi.

¹⁸ Jeremia i te ngalo ka va ka Rekabe: Jehova wa tiyimpi, a Nungungulu wa Israeli, i ngalo: Khwatsi hi lezi mu ingisileko a kulaya ka Jonadaba, a raru wa nwina, mu hlayisa yontlhe a milayo yakwe, ni ku maha zontlhe lezi a nga mu leletela,

¹⁹ hikwalaho Jehova wa tiyimpi, a Nungungulu wa Israeli aku: Cima ku nga ta vumaleka a wanuna ka Jonadaba nʼwana Rekabe, loye a ta nga yima mahlweni ka mina kala kupinzuka.