Jeremia 2 - Tshwa Bible

A kuhluwuka ka Israeli.

¹ A mhaka ya Jehova yi tile ka mina, yiku:

² Yana, kanyuluka tindleveni ta Jerusalema, uku: Jehova i ngalo: Nza alakanya a wunene ga wuswa ga wena, Ni liranzo la wena xikhatini xa kuwutiwa ka wena; Laha u nga kari u nzi lanzela le xiwuleni, A ka tiko legi gi nga kala gi nga byaliwangi.

³ Israeli i wa basiselwe Jehova, A mbhanzu wo ranga wa kutshovela kakwe; Vontlhe lava va mu gako va tava ni nanzu, Va ta humelwa hi khombo, ku wula Jehova. Jak. 1:18

⁴ Ingisani a mhaka ya Jehova, O yindlu ya Jakobe, Na nwina mingango yontlhe ya ka Israeli.

⁵ Jehova i ngalo: Xana kubiha muni a vararu va nwina va ku kumileko ka mina ke? Lezi va tshamako va tsawukene na mina, Va lanzela zifananiso zi nga vuniko, Va hunzuka vava lava va nga nyawuliko? 2 Tih. 17:15; Rem. 1:21

⁶ A va wulangi, vaku: I kwihi Jehova, Loyi a hi humesileko le tikweni ga Gipite, Loyi a hi rangeleko xiwuleni, lomu tikweni ga zigwangwa ni marinzi, Hi tsemakanya a tiko gi omileko ni ga nzhuti wa kufa, A tiko gi nga hi hava vahunzi ni vaaki?

⁷ Nzi lo mu neha a tikweni ga pfuno. Kasi mu taga mihanzu ya gona ni kunanziha ka gona. Kanilezi loku mu enghenile ka gona, mu nyenyezisile a tiko ga mina, Ni tshomba ya mina mu yi mahile manyala.

⁸ A vapristi a va wutisangi, vaku: I kwihi Jehova ke? Ni vakhomi va nayo a va nzi tivangi, A varangeli va lo nzi fularela, Ni vaprofeti ve profetile ha Baali, Va lanza lezi zi nga vuniko nchumu. 1 Sam. 2:12; 12:21

⁹ Hikwalaho nza ha ta mu kecara, ku wula Jehova, Ni kala ka vazukulu va nwina nzi ta va kecara.

¹⁰ Hi nga pelani muya zihlaleni za Kitimu, mu ya wona; Rumelani Kedari, mu hlotisisa khwatsi; Mu wona loku a xilo xa kunghahi xi wa sina xi mahekile.

¹¹ Xana ku ngava kona a tiko gi hunzulusileko a vanungungulu va gona, Hambu lezi va uga hiko vanungungulu ke? Kanilezi a vanhu va mina va tsikile a wudumo gabye, Va khozela a nungungulu a nga vuniko nchumu.

¹² Hlamalani ha zona, O matilo! Chavani nguvu mu rurumela, ku wula Jehova. Deut. 32:1; Isa. 1:2

¹³ Hakuva a vanhu va mina va mahile a kubiha kumbiri: Va nzi tsikile, mina loyi nzi nga xibuka xa mati ma hanyako, Va ti akela mathangi ma nga ni tifa, Ma nga zi kotiko ku hlayisa mati. Tis. 36:9; Joh. 4:13

¹⁴ Xana Israeli a ngava khumbi yi xabyilweko, Kutani khumbi yi pswalilweko lomu ndlwini ke? Hikuyini a phangiwako ke?

¹⁵ A tinghalana ti wele hehla kakwe na ti tsewuza hi gezu ga tona, Ti hanzulela a tiko gakwe, a miti yakwe yi hisilwe ku nga tshami munhu kona.

¹⁶ Hambu ni vanana va Nofi ni va Takapanesi va panza a tshavatshava ga wena.

¹⁷ Xana a ku ti vangelangi ha wece a khombo, Kota lezi u tsikileko Jehova a Nungungulu wa wena Laha yena a nga ku rangela ndleleni ke?

¹⁸ Ni makunu, u fambela yini hi ndlela ya Gipite, A ku yanwa a mati ya Nilo ke? U fambela yini hi ndlela ya Assiria, A ku yanwa a mati ya congo ke?

¹⁹ Hi kubiha ka wena ku ta nga ku tsayisa, U biwa hi kukhunguvanyeka ka wena. Hikwalaho, tiva lezaku zi bihile a ku tsika Jehova, Nungungulu wa wena, Ni ku nga mu chavi ka vanga kubayiseka, ku wula Hosi, Jehova wa tiyimpi.

²⁰ Hakuva hi kale na u tshovile muyoko wa wena, U phewulela a tingoti ta wena, uku: Nzi nga ha ta tira. Hakuva u baramile zitsungeni zontlhe zo tlakuka. Ni lomu hasi ka tontlhe tisinya to nyuka, u maha wubhayi.

²¹ Nzi lo ku byala na u hi sinya yo saseka ya vina, Ya lixaka li nene; Hikuyini makunu u hunzukileko u maha sinya ya limbe lixaka ke? Mat. 21:33; Mar. 12:1; Lu. 20:9

²² Hambu loku u nga hlamba hi nitro, U tsutsa sabawu yo tala, A kubiha ka wena ku ta sala mahlweni ka mina, Ku wula Hosi Jehova.

²³ Xana u nga wutisa kuyini, uku: A nzi nyenyeziswangi, A nzi lanzelangi Baali? Hi nga wona a ndlela ya wena le nzhelelweni, Alakanya lezi u zi mahileko. Wena u kameli ga mazambo, legi gi tsutsumelako lahaya ni lahaya.

²⁴ Wena u fanana ni nkati wa mangwa, Leyi loku yi chikelelwa hi xikhati xo lava matsune A ku bhangula ka yona a ya ha tlheliswi hi munhu; A matsune loku a yi lava a nga ta karala, I ta yi kuma hwetini ya yona.

²⁵ Chela kota lezaku a nkonzo wa wena wu nga lahlekelwi hi xilato, Ni nkolo wa wena a kuva ni tora. Kanilezi wena u ngalo: Wa ti karatela mahala, Hakuva nzi ranza a vanungungulu va vamatiko, Nza ha ta va lanzela.

²⁶ Ku khwatsi hi khamba loku gi kumilwe, gi na ni tingana. Hilezo a yindlu ya Israeli yi ni tingana, Zinwe ni tihosi ta yona ni tihosana ta yona, A vapristi va yona ni vaprofeti va yona,

²⁷ Lava va wulako ka dzanza, vaku: Wena u dadani wa mina, Vaku ka ribye: Mina nzi pswalilwe hi wena. Hakuva va nzi fularele, a va nzi cuwukeli; Kanilezi a xikhatini xa khombo va taku ngalo: Yima, u hi hlanguta!

²⁸ Makunu va kwihi a vanungungulu va wena lava u ti maheleko ke? Hi nga va tsika va yima, hi wona loku va zi kota ku ku hanyisa xikhatini xa makhombo! Hakuva a vanungungulu va wena va ringana ni tsengo wa miti ya wena, o Juda. Deut. 32:37; Vala. 10:14

²⁹ Mu holova na mina hikuyini ke? Nwina nwentlhe mu hambunyetile mu vukela mina, ku wula Jehova.

³⁰ Nzi bile mahala a vanana va nwina, A va vumelangi ku kawukiwa. A supado ya nwina yi khadamule a vaprofeti va nwina, Khwatsi i nghala yi hlakahlako. 1 Tih. 19:10; Mat. 23:34

³¹ Nwina va xizukulwana lexi, ingisani a mhaka ya Jehova! Xana nzi wa hi tiko ga xiwula a ka Israeli ke? Kutani kuva tiko ga munyama? Hikuyini a vanhu va mina vaku: Hi tlhatlhekile, Hi nga ta engeta hita ka wena.

³² Xana a nhwana a nga rivala a wubombi gakwe ke? Kutani a muswika ku rivala a nchalachala wakwe? Kasike a tiko ga mina gi nzi rivele hi kale.

³³ U tlharihile nguvu ndleleni ya wena ya ku ya hlota liranzo! Hikwalaho u gonzisile ni vava sati vo biha a tindlela ta wena.

³⁴ Ni lomu minzhungweni ya nguwo ya wena ku kumiwa a nkhata Wa zisiwana lezi zi nga hiko na nanzu, Lava u nga va kumangiko na va bhoxa a yindlu ya wena, Kanilezi u va dele, hakuva u ranza a zakunghahi. Ekso. 22:2

³⁵ Hambu zi hi tano, u ngalo: Kota lezi nzi nga hava nanzu, A zanga yakwe yi sukile ka mina. Languta, nzi ta ku kecara, Lezi u nge ngalo: A nzi onhangi!

³⁶ Hikuyini u hatlisako nguvu ku hunzula a ndlela ya wena ke? Hi Gipite kambe u ta wisiwa tingana Kotisa lezi u nga wisiwa tingana hi Assiria. 2 Kro. 28:20

³⁷ Na zona u ta huma kona na u tlhatekile a mandla ya wena hlokweni, Hakuva Jehova i alile lava u va tsumbako, U nga ta humelela ha vona. 2 Sam. 13:19