Jeremia 13 - Tshwa Bible

A bhandi ga muprofeti.

¹ Jehova i te ngalo ka mina: Famba u ya ti xavela a bhandi ga wukene, u gi boha xiwunwini xa wena, kanilezi u nga gi peti matini.

² Lezoke nzi lo ya ti xavela a bhandi ga wukene, kota lezi Jehova a nzi leleteleko, nzi gi boha xiwunwini xa mina.

³ Zonake a gezu ga Jehova gi lota ka mina hi khati ga wumbiri, giku:

⁴ Teka a bhandi legi u gi xavileko, gi nga xiwunwini xa wena, suka uya Eufrate, u ya gi fihla seyo lomu kovotlweni wa ribye.

⁵ Mina nzi lo famba nzi ya gi tsimbeta kusuhani ni Eufrate, kota lezi Jehova a nzi leleteleko.

⁶ Na ku hunzile masiku yo tala, Jehova i te ngalo ka mina: Suka uya Eufrate, u ya teka bhandi legi nzi ku layileko a ku gi tumbeta kona.

⁷ Zonake nzi loya le Eufrate, nzi ya kela, nzi teka bhandi lomu nzi nga gi tumbetile kona. Kanilezi a bhandi gi wa bolile, gi nga ha vuni nchumu.

⁸ A gezu ga Jehova gi lota ka mina, giku:

⁹ Jehova i ngalo: Nzi ta maha matshanza ya Juda ma bola kota lezi, ni matshanza ya hombe ya Jerusalema.

¹⁰ A tiko legi go biha, legi gi nga vumeliko a kuzwa a magezu ya mina, legi gi fambako hi kunonoha ka mbilu ya gona, gi lanzela vanungungulu vanwani, gi va tirela ni ku va khozela, gi ta fanana ni bhandi legi gi nga vuniko nchumu.

¹¹ Hakuva kota lezi a bhandi gi namarelako xiwunwini xa munhu, hizalezo nzi mahile yontlhe a yindlu ya Israeli ni yontlhe a yindlu ya ka Juda ti namarela ka mina, ku wula Jehova, kasi vave ka mina a tiko, ni vito, ni wudzunzo, ni wukulu; kanilezi a va vumelangi ku ingisa. Deut. 26:19

A maguwana ma fayekileko.

¹² Hikwalaho u ta va byela mhaka leyi, uku: Jehova a Nungungulu wa Israeli i ngalo: A guwana ginwe ni ginwani gi ta tatiswa hi vinya. Vona va taku ka wena: Xana na hina a hi zi tivi lezaku a maguwana wontihe ma ta cheliwa vinya ma tala ke?

¹³ Zonake u taku kabye: Jehova i ngalo: Languta, vontlhe vaaki va legi tiko, na tona tihosi ti tshamako xitshanwini xa wuhosi xa Davida, ni vapristi, ni vaprofeti, ni vaaki vontlhe va Jerusalema, nzi ta va tatisa hi kupopiwa.

¹⁴ Nzi ta va pswhandlasa, va fayana, a vararu ni vana, ku wula Jehova. Nzi nga ta va hawukela, hambu ku va tsetselela, nzi nga tava ni tipswalo lezaku nzi nga va lovisi.

¹⁵ Zwanani, mu riya tindleve; Mu ngave na matshanza, hakuva Jehova i wulile.

¹⁶ Dumisani Jehova Nungungulu wa nwina, Hi mahlweni na a nga se ku humesa munyama, A mikonzo ya nwina na yi nga se ku khunguvanyeka zitsungeni zo phuma; Na ma ha langutela kuwonekela i ta ku hunzula kuva nzhuti wa kufa, Ni munyama wu hunzeleleko ku phuma.

¹⁷ Kanilezi loku mu nga zi ingisi, Nzi ta rila zihundleni hi kota ya matshanza ya nwina, A mahlo ya mina ma ta rila nguvu, ma humesa mihloti, Hakuva a tlhambi wa Jehova wu yisiwa wukhumbini.

¹⁸ Byela hosi ni mamani wa hosi, uku: Ti koramiseni, mu tshama hasi, Hakuva a mubhodi wa wukosi ga nwina wu wile, Xi nga xona xidlodlo xa nwina xa wuhosi.

¹⁹ A miti ya le Dzongeni yi valilwe, A nga kona a to yi vulula; Vontlhe va ka Juda va yisilwe kukhonweni, A ku salangi ni munwe.

²⁰ Tlakusani mahlo ya nwina, mu wona lava va tako hi le Nwalungu. Wu kwihi a ntlhambi lowu u nga nyikilwe wona, A ntlhambi wa wena wo saseka ke?

²¹ U ta kuyini loku a veka hehla ka wena a maxaka ya wena u fumelwa hi wona? Hi wena u va gonzisileko a kuva venyi va wena. Xana zi nga ta bayisa ka wena kota wasati a lunwako ke?

²² Loku u wula mbilwini ya wena, uku: Zita hikuyini lezi zilo hehla ka mina ke? Tiva lezaku a nguwo ya wena yi tlakusilwe hi kota ya kubiha ka wena ka hombe. Ni zirenze za wena zi biwa. Isa. 47:2; Nah. 3:5

²³ Xana a maEtiopia a nga hunzula a hlonge yakwe ke, Hambu a yingwe a mavalavala ya yona ke? Loku zi hi tano na nwinawo mu nga zi kota ku maha zinene, Nwina lava mu toloveleko ku maha kubiha.

²⁴ Hikwalaho nzi ta va hangalasa a ku fanana ni mungu Lowu wu hahiswako hi mheho ya xiwula.

²⁵ Lexi hi xiavelo xa wena lexi u ringaniselweko hi mina, Ku wula Jehova; Hakuva u nzi rivele, u tsumba mawunwa.

²⁶ Hikwalaho nzi ta tlakusa a xiambalo xa wena kala nghoheni ya wena, Lezaku ku woneka a tingana ta wena.

²⁷ Nzi wonile a wubhayi ga wena ni kurila ka kunavela ka wena, A wugango ga wena go hunzeleta le zitsungeni ni lomu masinwini. Khombo ka wena Jerusalema! Xana u ta rinzela kala rini na u nga basiswi ke?