Jakobe 1 - Tshwa Bible

¹ Mina Jakobe, a nanza ga Nungungulu, ni ga Hosi Jesu Kristu, nza rungula ka khume ga tixaka ni timbiri leti ti hangalakileko. Miti. 12:17; 26:7; Juda 1

A kutlhariha ka Nungungulu.

² Vamakabye va mina, ngha mu wula lezaku kutsaka ntsena loku mu wela lomu minzhingweni yi tsalangeneko; Mat. 5:12; Miti. 5:41; 1 Ped. 1:6

³ na mu tiva lezaku a kuringwa ka kukholwa ka nwina ku vanga kutimisela. Rom. 5:3

⁴ Kanilezi a kutimisela a kuve ni ntiro lowu wu mbheleleko, lezaku mu mbhelela ni ku tala, mu nga kiyelelwi ha nchumu.

⁵ Kanilezi loku munwani wa nwina a vumala wutlhari, a kombele ka Nungungulu, loyi a nyikako vontlhe hi matsenya na a nga soli, zonake i ta nyikiwa. 1 Tih. 3:9, 11, 12; Joh. 16:23

⁶ Kanilezi ngha a kombela hi kukholwa, a nga kanakani; hakuva loyi a kanakanako i fanana ni mabyandlati ya bimbi ma kukuletwako hi mheho ma ndlengandlengiswa. Mar. 11:24

⁷ A munhu wa kunghaho ngha a nga tsumbi lezaku i ta hiwa nchumu hi Hosi,

⁸ munhu loyi a nga ni timbilu timbiri, wa ndlengandlengiswa tindleleni takwe tontlhe.

⁹ Ngha makabye loyi a koramileko a ti kulisa hi kota ya kutlakuswa kakwe;

¹⁰ ni loyi a fumileko a ti kulise hi kota ya kukoramiswa kakwe; hakuva i ta hunza khwatsi hi xitsangi xa byanyi. Joba 14:2; Isa. 40:6; 1 Ped. 1:24

¹¹ Hakuva a gambo gi tsuwuka, gi neha mumu gi wunisa a byanyi, a zitsangi za gona zi tlhatlheka, ku nwalala a kusaseka ka gona; zinghaho ni munhu a fumileko, i ta wuna mitirweni yakwe yontlhe.

A minzhingo.

¹² I katekile a munhu loyi a timiselako minzhingweni; hakuva loku a ringilwe a kumeka na a tiyile, i ta amukeliswa a xidlodlo xa wutomi, lexi a Hosi yi tsumbisileko lava va yi ranzako. Kuv. 2:10; Joba 5:17; 1 Ped. 5:4

¹³ Loku munhu a ringwa ngha a nga wuli, aku: Nzi ringwa hi Nungungulu; hakuva Nungungulu a nga zi koti ku ringwa hi kubiha, yena wutsumbu a nga na ku ringa munhu.

¹⁴ Kanilezi munwe ni munwani i ringwa hi kunavela kakwe ntsena, a kokiwa ni ku xengwa.

¹⁵ Zonake a kunavela, loku ku xurile nyimba ku pswala kuonha; ni kuonha laha na ku kulile ku pswala kufa. Tis. 7:14; Rom. 6:21

¹⁶ Mu nga ti kanganyisi, vamakabye va mina va ranzekako.

¹⁷ Zontlhe zinyikiwo zo saseka ni zinyikiwo zontlhe zi mbheleleko zita hi le hehla, zi relela hi ka Dadani wa kuwonekela, loyi a nga hiko na kuhunzuluka, a ka yena a ku na kuhunzuka-hunzuka kuva kuwonekela ni munyama. Mitse. 23:19; Mal. 3:6; Joh. 3:27

¹⁸ Hi kuranza kakwe i hi belekile hi mhaka ya zinene, kasi hi tava a mihanzu yo rangula ya zivangwa zakwe. Kuv. 14:4; Jer. 2:3; Joh. 1:13

A vazwi ni vamahi va mhaka.

¹⁹ Nwina ma zi tiva lezi vamakabye va mina va ranzekako. Kanilezi ngha munwe ni munwani a hatlisa kuzwa, a nonoka ku wulawulela nonoka ku zangara; Mav. 16:32; Kutsa. 5:1, 2

²⁰ hakuva a zanga ya munhu a yi tiri a kululama ka Nungungulu.

²¹ Hikwalaho hoxani a zivi zontlhe ni kubiha kontlhe, mu amukela hi kutikoramisa a mhaka leyi yi byalilweke ka nwina, leyi yi zi kotako ku hanyisa a mihefemulo ya nwina. Rom. 1:16; Kol. 3:8; 1 Ped. 1:9

²² Kanilezi ngha mu hi vamahi va mhaka, mu nga hi vazwi ntsena, mu ti kanganyisa. Mat. 7:21; Rom. 2:13

²³ Hakuva loku munhu azwa a mhaka, a nga yi mahi, i fanana ni munhu loyi a wonako a nghohe yakwe lomu wonini; Lu. 6:47

²⁴ wa ti cuwuka yena wutsumbu, kanilezi loku a suka wa kohlwa lezaku i munhu wa ku yiniyini,

²⁵ Kanilezi loyi a cuwukako nayweni wu mbheleleko, lowu wa kutlhatlheka, a nonohisa ka wona, na a nga hi muzwi a rivalako, kanilezi na hi loyi a tirako, a munhu loyi i ta katekiswa kumaheni kakwe; Joh. 13:17; 2 Kor. 3:18

²⁶ Loku a hi kona loyi a alakanyako ku ngalo mukholwa, na a nga khomi lirimi lakwe, kanilezi a khohlisa mbilu yakwe, a kukholwa ka munhu loye a ku vuni nchumu. Tis. 39:1; 1 Ped. 3:10

²⁷ A kukholwa ku basileko, loku ku nga hiko na kusoleka mahlweni ka Nungungulu wa hina a Dadani, hi loku: A kuya kamba zisiwana ni tinoni kuxanisekeni kabye, ni ku ti hlayisa a nga hi na bala hi za tiko. Isa. 1:16; Mat. 25:36; Rom. 12:2