Isaya 7 - Tshwa Bible

Nungungulu i ta hanyisa Juda.

¹ A masikwini ya Ahazi, nʼwana Jotamu, a nʼwana Uzzia, a hosi ya ka Juda, Rezini a hosi ya Siria, na Peka, a nʼwana Remalia, a hosi ya ka Israeli, va lo kanziha Jerusalema a ku yalwa zinwe nago, kanilezi a va gi Wulangi.

² Zonake a yindlu ya ka Davida yi byeliwa lezaku: Siria i govile le ka Efraime, zonake a mbilu ya Ahazi ni timbilu ta vanhu vakwe ti lo rurumela, khwatsi a tisinya ta khwati ti tsekatsekiswako hi mheho.

³ Kanilezi Jehova aku ka Isaya: Suka ni nʼwana wa wena Xear-jaxuba, muya le magumelweni ya nkele wa tiva legi gi nga le hehla, mu ya tlhangana na Ahazi le ndleleni ya simu ga vahlazi.

⁴ Uku ka yena: Ti wonele, u rutisa; u nga chavi, ni mbilu ya wena yi nga mbheli ntamu hi kota ya zihunyana lezi zimbiri zi tuvikako musi, hikwalaho ka zanga ya Rezini ni ya Siria, ni ya nʼwana Remalia;

⁵ hakuva Siria, na Efraime, ni nʼwana Remalia, va mahile xikungo xo biha va vukela wena, vaku:

⁶ A hi kanziheni hi ya vukela Juda, hi gi hlokisa, hi khungumula ligingisi la kona, hi yimisa nʼwana Tabeali a kuva hosi ya gona.

⁷ Hikwalaho ku wula Hosi Jehova, aku: A mhaka leyi yi nga ta maheka, va nga ta humelela.

⁸ Hakuva a zinza ga Siria hi Damaseku, ni hloko ya Damaseku hi Rezini; loku ku hunzile 65 wa malembe Efraime i ta hangalasiwa, a nga ta ha hlayiwa xikari ka matiko.

⁹ A zinza ga Efraime hi Samaria, ni hloko ya Samaria hi nʼwana Remalia. Loku mu nga kholwi, cima mu nga ta tiya.

¹⁰ Jehova a engeta, aku ka Ahazi:

¹¹ Kombela muwoniso ka Jehova, Nungungulu wa wena; u kombela lezaku wu huma hi le hasi, kutani hi le hehla tilweni.

¹² Kanilezi Ahazi i te ngalo: Nzi nga ta kombela nchumu, a nzi lavi ku ringa Jehova.

¹³ Isaya aku: Ingisani makunu, nwina va yindlu ya ka Davida: Kasi xilo xitsongwani loku mu karata vanhu, ko kala mu karata na Nungungulu wa mina ke?

¹⁴ Hikwalaho yona Hosi wutsumbu yi ta mu nyika muwoniso: A nhwana i ta xura nyimba, a pswala nisanyana, i ta chula vito ga yena Immanueli. Mat. 1:23; Lu. 1:31

¹⁵ I taga mawomba ni wulombe kala a tiva ku ala za kubiha, a hlawula kusaseka.

¹⁶ Hakuva a mahlweni a nwanana na a nga se ku tiva ku ala za kubiha, ni ku hlawula kusaseka, a tiko legi u chavako a tihosi ta gona ta timbiri gi tava xiwula. 2 Tih. 15:29; 16:9

¹⁷ Jehova i ta neha hehla ka wena, ni vanhu va wena, ni hehla ka yindlu ya raru wa wena a masiku lawo ma kalako ma nga se kuta kusukela siku lego Efraime a nga hambana na Juda: yona hosi ya le Assiria.

¹⁸ A ka xikhati lexo Jehova i ta bela noti a tinhongani ti nga magumo ka micongo ya Gipite, ni tinyoxi ti nga tikweni ga Assiria.

¹⁹ Ti tata ti ta humula tontlhelele lomu mikoveni ya xiwula, ni lomu mikovotlweni ya maribye, lomu ka mizwa yontlhe ni wuriselweni gontlhe.

²⁰ A ka siku lego a Hosi yi ta cinga tiko hi likari li lombilweko le tlhatukweni wa congo, li nga yona hosi ya Assiria, yi ta cinga hloko ni mafefeleti ya milenge, a cinga ni xilevu kambe. 2 Sam. 10:4

²¹ Xikhatini lexo a munhu munwe ni munwani i ta fuya a thokazi ni tiyivu timbiri,

²² kanilezi hi kota ya kutala ka masi a ta nga ma kuma, yena i taga mawomba, hakuva vontlhe lava va ta ngava va sele tikweni lego va taga mawomba ni wulombe.

²³ A ka siku lego a xivineni lexi ku nga hi ni 1,000 wa mivina, yi ringeneko ni 1,000 wa macheleni ya siliva, ku ta mila zigetlwani ni mizwa.

²⁴ A vanhu va ta enghena kona na va hi ni mawura ni tigalala, hakuva a tiko gontlhe gi ta tala hi zigetlwani ni mizwa.

²⁵ Ni ka zontlhe zitsunga lezi zi nga rimiwa hi xikomu, ku nga ha ta fambiwa ka zona hi ku chava zigetlwani ni mizwa; ku ta mahiwa wuriselo ga tihomu, ku kanzihelelwa hi tiyivu.