Isaya 66 - Tshwa Bible

¹ Jehova wa wula, aku: A tilo xitshamu xa mina xa wuhosi, A misava xikhegetelo xa mikonzo ya mina. I yindlu ya kuyini mu ta nga nzi akela yona, Wutshamu muni gi ta ngava wuhumulelo ga mina ke? 1 Tih. 8:27; Mat. 5:34; Miti. 7:48

² Hakuva zontlhe lezi zilo zi mahilwe hi canja ga mina, Hikwalaho zontlhe zi lova kona, ku wula Jehova. Nzi ta cuwuka loyi a ti tsongahatako, a nga ni moya wu tshovekileko, Loyi a rurumelako hi gezu ga mina.

³ Loyi a tlhavako homu i fanana ni loyi a dayako munhu; Loyi a phahlelako hi yivana i fanana ni loyi a sokorotako a mbyana; Loyi a mahako munyikelo wa mapa i fanana ni loyi a nyikelako hi nkhata wa khumba; Loyi a hisako a libani i fanana ni loyi a khozelako xifananiso. Kota lezi va ranzako a tindlela tabye wutsumbu; Ni mihefemulo yabye yi tsakela manyalataniso,

⁴ Hizalezo mina nzi ta ranza ku va nehela makhombo, Nzi ta tisa hehla kabye lezi va zi chavako; Hakuva laha nzi nga vitana a nga kona a nga vumela, Ni laha nzi nga wulawula a nga kona a nga ingisa; Kanilezi va mahile kubiha mahlweni ka mina, Va ranza lezi zi nga nzi tsakisiko.

⁵ Zwanani a mhaka ya Jehova nwina lava mu rurumelako hi gezu gakwe! Hakuva a vamakwenu lava va mu vengako, Lava va mu hlongolako hi kota ya vito ga mina, Ve ngalo: Jehova a kombisa a wukulu gakwe, Kasi ha fela ku wona kutsaka ka nwina! Kanilezi va tawa tingana.

⁶ Ku zwala huwa le mutini, a gezu gi huma tempeleni! I gezu ga Jehova loyi a ti photelako ka valala vakwe.

⁷ Hi mahlweni Zioni na a nga se ku lunwa i lo pswala, Na a nga se ku bayiseka i lo hefemula nisanyana.

⁸ Himani a ngazwa a xilo xo kota lexo? Himani a nga wona a zakunghahi? A tiko ga zi kota ku pswaliwa hi siku ginwe ke? Kutani lixaka li nga wumbelwa hi xitshuketi Ko kala Zioni a pswala vana na a ha ku lunwa ke?

⁹ Xana mina nzi buvisako a nyimba nzi nga tsona ntamu wo beleka ke? Mina loyi nzi hefemulisako nzi nga vala timbeleko ke? Ku wula Nungungulu wa wena.

¹⁰ Nengelani zinwe ni Jerusalema, Mu mu tsakela nwina nwentlhe mu mu ranzako. Bhumani hi litsako zinwe naye, Nwina nwentlhe mu mu rilelako;

¹¹ Kasi mu ta anwa mu xura Hi mali ya kuchavelelwa kakwe; Kasi mu ta buzela, Mu tsakiswa hi wunyingi ga mavele yakwe.

¹² Hakuva Jehova i ngalo: Nzi ta mu nehela, kurula ko khwatsi i congo, Ni wukosi ga matiko ko fanana ni congo wu hlatako; Zonake mu ta anwa, mu tlakuliwa, mu wukarelwa.

¹³ Khwatsi hi munhu a tangaliswako hi mamani wakwe, Hizalezo mina nzi ta mu tangalisa; Mu ta tangaliswa mutini wa Jerusalema.

¹⁴ Mu ta zi wona, a timbilu ta nwina ti tsaka, A marambu ya nwina ma ta kuma ntamu khwatsi lihunga. Zi ta tibyiwa lezaku a woko ga Jehova gi zinwe ni malanza yakwe, Ni lezaku a zangarela a valala vakwe.

¹⁵ Hakuva Jehova i tata hi nzilo, Ni tikareta takwe ti ta fanana ni xipupuri; Kasi ku neha zanga yakwe yi hisa, A kawuka hi malangavi ya nzilo. 2 Tes. 1:8; 2 Ped. 3:7

¹⁶ Hakuva Jehova i ta lamula hi nzilo, A tsayisa a nyama yontlhe hi supado yakwe; Lava Jehova a ta nga va daya va tava vanyingi. Kuv. 19:20

¹⁷ Lava va ti nyikelako, va ti basisa masinwini, na va rangelwa hi munwe a yimileko xikari; lava va gako nyama ya khumba, ni zilo za manyala ni makondlo, vontlhe va ta lova, ku wula Jehova.

¹⁸ Hakuva nza yi tiva mitiro yabye ni maalakanyo yabye. A xikhati xata laha nzi ta nga tsombanyisa a matiko wontihe ni tirimi; va tata va ta wona kungangamela ka mina.

¹⁹ Nzi ta yimisa a xikombiso xikari kabye; lava va ta nga pona nzi ta va rumela matikweni, vaya le Tarxixi, le Pule, ni le Ludi, lava va fulako hi mawura, le Tubale, ni le Javane, ni le matikweni ya le kule le bimbini, lawa ma kalako ma nga se kuzwa a wudumo ga mina; vona va ta tlhatlhambutela a wukulu ga mina xikari ka matiko.

²⁰ Va ta neha vamakwenu vontlhe hi le matikweni a kuva munyikelo ka Jehova. Va tata na va khilele mahaxi, ni tikareta, va tlakuliwa hi machira, vanwani va famba hi mamula ni makameli, vaya xitsungeni xa mina xi basileko le Jerusalema, ku wula Jehova; va nehiwa khwatsi hi vanana va ka Israeli va nehako minyikelo yabye lomu zibyeni zi basileko a ndlwini ya Jehova. Levi 2:1

²¹ Ni xikari ka vonawu nzi ta teka lava va ta ngava vapristi ni vaLevi, ku wula Jehova. 1 Ped. 2:5

²² Hakuva khwatsi hi lezi a matilo maswa ni misava yiswa leyi nzi ta nga yi maha, zi ta nga tsonzoma mahlweni ka mina, ku wula Jehova, zinghaho a lixaka la nwina ni vito ga nwina zi ta tshama zi hi kona. Jer. 31:35; 2 Ped. 3:13; Kuv. 21:1

²³ Zonake a kuhumeni ka hweti yinwe ni yinwani, ni ka sabado ginwe ni ginwani, a nyama yontlhe yi tata ku ta nzi khozela, ku wula Jehova.

²⁴ Zonake va ta huma, va wona a zirumbi za lava va hambunyetileko mahlweni ka mina; hakuva a xiwungwani xabye xi nga tafa, ge hambu a nzilo wabye wu nga ta timeka. Va ta maha xinyenyeko ka nyama yontlhe. Dan. 12:2; Mar. 9:48