Isaya 65 - Tshwa Bible

Jehova i ta tlhelisela.

¹ Nzi wa longile ku hlamula lava va nga kala va nga nzi vitani, Nzi vumele ku kumiwa hi lava va nga kala va nga nzi lavi. A ka tiko legi gi nga vitwangiko hi vito ga mina, nzi waku: Hi mina loyi! hi mina loyi! Rom. 10:20

² Nzi nawulutile a mandla ya mina siku gontlhe a ka tiko gi hluwukileko, Legi gi fambako hi ndlela leyi yi nga hiko yi nene, Va lanzela maalakanyo yabye wutsumbu.

³ I tiko legi gi nzi zangarisako xontlhe xikhati Hi ku phahlela lomu masinwini, Ni ku hisa tibani hehla ka ma alati ya zitini;

⁴ Va tshama lomu zilahleni, Va heta wusiku lomu timhakweni; Vaga a nyama ya khumba, Ni mingelo yabye yi tele hi za kuga zo nyenyeza;

⁵ Lava vange: Tlhela nzhako, U nga tshineli ka mina, hakuva nzi basile ku hunza wena. Va fanana ni musi lomu tinhovini ta mina, I nzilo wu vurako gontlhe siku. Deut. 32:22; Jer. 17:4

⁶ Languta, ku tsalilwe mahlweni ka mina: Nzi nga ta miyela nzi kala nzi tlhelisela; Kunene, nzi ta tlhelisela ka vona,

⁷ A zigoho zabye, ku wula Jehova, Zinwe ni zigoho za vadadani vabye, Lava va hisileko tibani hehla ka zitsunga, Va nzi rukatela hehla ka miganga. Hikwalaho nzi ta va pimela a hakhelo ya mitiro yabye ya kale. Ekso. 20:5; Hos. 4:13

⁸ Jehova i ngalo: Loku ku hi ni dosi lomu ka xitata xa mauva, ve ngalo: U nga xi tsemi, hakuva xa ha hi ni zikatekiso! Minawo nzi ta mahisa lezo hi kota ya malanza ya mina: Nzi nga ta lovisa vontlhe.

⁹ Nzi ta humesa vana hi ka Jakobe, Ni xiga-tshomba xa zitsunga za mina hi ka Juda. A va hlawulilweko va mina va ta fumela tiko, Ni malanza ya mina ma ta aka kona.

¹⁰ Xaroni i tava wuriselo ga tiyivu, Ni nkova wa Akora wu tava zumbo ga tihomu, A ka tiko ga mina gi nzi hlotileko. Jox. 7:26; 1 Kro. 27:29; Hos. 2:15

¹¹ Kanilezi nwina lava mu tsikako Jehova, Mu rivalako a xitsunga xa mina xa kubasa, Mu longiselako Gadi a meza, Mu khelako Meni a vinya;

¹² Nzi ta mu nyikela ka supado, Mu ta korama nwentlhe mu tlhabyiwa, Hakuva laha nzi nga vitana a mu hlamulangi; Laha nzi nga wulawula a mu ingisangi; Kanilezi mu mahile kubiha mahlweni ka mina, Mu ti hlawutela lezi zi nga nzi tsakisiko.

¹³ Hikwalaho Hosi Jehova i ngalo: A malanza ya mina ma taga, kanilezi nwina mu tava ni ndlala, A malanza ya mina ma tanwa, kanilezi nwina mu tazwa tora; A malanza ya mina ma ta tsaka, kanilezi nwina mu tava ni tingana.

¹⁴ Langutani a malanza ya mina ma ta yimbelela hi kutsaka ka timbilu tabye, Kanilezi nwina mu ta rila hi kubayiseka ka timbilu, Mu kanyuluka hi kukarateka ka moya.

¹⁵ A vito ga nwina gi ta sala gi hi xiruko xikari ka vahlawulilweko va mina, Hosi Jehova i ta ku daya, Zonake i ta nyika malanza yakwe a ginwani vito. Jer. 29:22; Kuv. 2:17

¹⁶ Kasi ni wihi loyi a ti katekisako laha misaveni I ta ti katekisa hi Nungungulu wa zinene; Ni wihi lomu tikweni a ta nga hlambanya, I ta hlambanya hi Nungungulu wa zinene. Hakuva a makhombo ya kale ma rivelwe, Ma fihlilwe mahlweni ka mina.

A Tilo giswa ni Misava yiswa.

¹⁷ Hakuva nzi ta vanga a tilo giswa ni misava yiswa, A zilo za kale zi nga ta ha alakanyiwa, Ge hambu ku wuya lomu malangeni. 2 Ped. 3:13; Kuv. 21:1

¹⁸ Kanilezi mu ta tsaka mu nengela ka zontlhe lezi nzi ta nga zi vanga, Hakuva Jerusalema nzi ta mu vangela migiyo. Ni vanhu va kona nzi ta va vangela litsako.

¹⁹ Mina nzi ta tsaka hi Jerusalema. Nzi tsakela vanhu va mina; Cima ku nga ta ha zwala ka yena a gezu ga kurila, Hambu gezu ga tihuwa.

²⁰ Ku nga ta kuva kona kambe a lisana li to hanya masiku matsongwani ntsena, Ge hambu xikhosana leʼxi nga mbhetisiko a tsengo wa masiku ya xona. Hakuva a xinwanana xi tafa na xi hi ntangeni ya zana ga malembe, A muonhi i ta rukateliwa loku a hi ni zana ga malembe.

²¹ Loku va aka tiyindlu va ta tshama ka tona, Ni loku Va byala zivina va taga mihanzu ya zona.

²² Va nga ta akela ku kasi vanwani va tshama lomo, Va nga ta byalela ku kasi vanwani vaga mihanzu ya kona; Hakuva a masiku ya vanhu ma ta ringana ni masiku ya tisinya, Ni vahlawulilweko va mina va ta tsakela mitiro ya mandla yabye.

²³ Va nga ta ti karatela mahala, Va nga ta beleka vanana kasi ku fela khombyeni, Hakuva va tava lixaka leli li katekisilweko hi Jehova; A vana vabye va ta hanya zinwe navo. 1 Kor. 15:38

²⁴ Ku ta maheka lezaku na va nga se ku vitana nzi ta va hlamula, Ni loku va ha wulawula nzi ta ingisa. Gen. 24:15; Dan. 9:23; Mat. 7:7

²⁵ A hlolwa ni yivana zi taga zinwe A nghala yi taga byanyi khwatsi i homu; Ni nyoka yi taga ntshuri. Va nga ta lamata hambu ku lovisa Lomu xitsungeni xontlhe xa mina xi basileko, Ku wula Jehova.