Isaya 64 - Tshwa Bible

¹ O, loku ku wo khwatsi wa hanzula matilo u chika, Kasi a zitsunga zi wa ta tseka-tseka mahlweni ka wena, Vala. 5:4

² A kukotisa a nzilo wu dzivelako tihunyi ti womileko, A nzilo wu vilisa mati; Lezaku a valala va wena va fela ku tiva a vito ga wena, Ni matiko ma rurumela mahlweni ka wena.

³ Laha na u mahile a zilo zo tshisa, Lezi hi nga kala hi nga rinzelangi, U lo chika kasi a zitsunga zi wa tsekatseka mahlweni ka wena.

⁴ Hakuva kusukela kaleloko a ku na nga zwiwa, A ku na nga ingisiwa hi ndleve, Ge hambu ku woniwa hi mahlo a Nungungulu munwani Loyi a mahako mitiro ya kunghahi ka lava va mu langutelako.

⁵ Wa tlhangaveta lava va tsakako ku maha kululama, Lava va ku alakanyako tindleleni ta wena: Languta, u wa zangara hakuva hi ku onhele; Zi wa hi tano ni kale, hi ta hanyiswa ke?

⁶ Hina hontlhe hi fanana ni loye a nga hlazekangiko, Ni kontlhe kululama ka hina ku fanana ni nguwo yi nga ni chaka; Hina hontlhe hi wuna kukotisa matluka, Ni zigoho za hina za hi kukuleta ku fanana ni mheho.

⁷ A ku na munhu a khongelako vitweni ga wena, Loyi a vukako kasi ku namarela ka wena; Hakuva u hi fihlele a nghohe ya wena, U hi tsika hifa zigohweni za hina.

⁸ Kanilezi makunu, wena Jehova u dadani wa hina; Hina hi wumba, wena u muwumbi wa hina, Hina hontlhe hi ntiro wa mandla ya wena, Jer. 3:19; Rom. 9:20

⁹ U nga zangari ku hunzisa, O Jehova, U nga hi alakanyeli kugoha kala kupinzuka! Kanilezi alakanya lezaku hina hontlhe hi vanhu va wena.

¹⁰ A miti ya wena yi basileko yi mahile xiwula, Zioni gi mahile xiwula, Jerusalema i rumbi.

¹¹ A yindlu ya hina yi basileko leʼyo saseka, Leyi a vadadani va hina va nga ku dumisa ka yona, Yi swile hi nzilo, Ni zontlhe lezi zi nga hi tsakisa zi wonhilwe. 2 Tih. 25:9; 2 Kro. 36:19

¹² A ka zontlhe lezo u ta ti khoma ke, O Jehova? U ta miyela, u hi hlokisa ku hunza mpimo ke?