Isaya 63 - Tshwa Bible

A Siku ga ku Photela.

¹ Himani loyi a tako hi le Edome, Na huma hi le Bozra, a ambeleko tinguwo to pswhuka to khazamula, A fambako hi wukulu ga ntamu wakwe? Hi mina loyi nzi wulawulako hi kululama, nzi nga ni ntamu wa ku hanyisa.

² Hikuyini a tinguwo ta wena ti pswhukileko, Ti fanana ni ta loye a kameleko a vinya ke? Kuv. 19:13

³ Nzi wa kanzihele lomu xigowolweni xa vinya na nzi hi nzoce, Ni munwe xikari ka matiko nzi wa nga hi naye. Ina, nzi va kanzihelele zangeni ya mina, Nzi va ganyetela hi kota ya khulo ga mina; Ni nkhata wabye wu phandlukele a tinguwo ta mina, Nzi nyenyezisa a nguwo ya mina yontlhe.

⁴ Hakuva nzi wa xuvile a siku ga kutiphotela, A lembe ga mina go va tirula gi chikele.

⁵ Nzi lo cuwuka, ku wa nga hi na muvuni; Nzi lo hlamala hikuva ku nga hi na munhu wo nzi seketela. Hikwalaho a canja ga mina nwinyi gi lo nzi vuna, Ni khulo ga mina gi lo nzi seketela.

⁶ Nzi lo kanzihelela matiko zangeni ya mina, Nzi va popisa hi khulo ga mina, Nzi halata nkhata wabye laha misaveni.

A mitiro ya Jehova ya wuxinji.

⁷ Nzi taba hungu hi mitiro ya Jehova ya wuxinji, Ni wudzunzo ga Jehova, Maringano ni zontlhe lezi Jehova a hi maheleko, Ni wunene gakwe ga hombe hehla ka yindlu ya ka Israeli, Legi a va maheleko hi wuxinji gakwe Ni liranzo lakwe la hombe.

⁸ Hakuva i te ngalo: Hakunene, mbanhu va mina, A vanana va ta nga kala va nga hluwuki; Zinghaho ava muhanyisi wabye.

⁹ Lomu zikaratweni zabye zontlhe i lo karateka zinwe navo, Ni ngelosi yi nga mahlweni kakwe yi lo va ponisa. Hi kota ya liranzo lakwe ni ku va zwela kakwe i lo va tirula. I lo va tlakula a va rwala masikwini wontihe ya kaleloko. Ekso. 13:21; 14:19; 32:34

¹⁰ Kanilezi vona va lo hluwuka, va bayisa Moya wakwe wa ku Basa, Hikwalaho i lo maha nala wabye, alwa navo.

¹¹ Zonake va lo khumbula masiku ya kaleloko xikhatini xa Mosi, vaku: I kwihi loyi a nga va humesa lomu bimbini, Zinwe ni varisi va tlhambi wakwe? I kwihi loyi a nga veka Moya wakwe wu basileko xikari kabye? Ekso. 14:29; Mitse. 11:25

¹² Loyi a nga fambisa a woko gakwe ga wukulu le reveni ga xinene ga Mosi, Loyi a nga avanyisa mati mahlweni kabye kasi ku ti mahela a vito ga pinzukelwa?

¹³ Loyi a va rangeleko matshanwini ya kueta, kota haxi lomu xiwuleni, A ku kasi va nga khuveki?

¹⁴ Khwatsi zifuyo zi relelako nkoveni, A Moya wa Jehova wu lo va nyika kuhumula. Hizalezo u nga rangela tiko ga wena, Kasi u ti mahela a vito gi dumileko.

¹⁵ Cuwuka lahasi hi le tilweni, u wona Hi le ndlwini ya wena ya wubaswa ni kungangamela. Ku kwihi kupangama ka wena ni mitiro ya wena ya ntamu ke? A lixuve la mbilu ya wena ni wuxinji ga wena a za ha tiri ka mina.

¹⁶ Kasi u dadani wa hina, Hakuva Abrahama a nga hi tivi, Na Israeli a nga ha hi alakanyi. Wena Jehova, u dadani wa hina, A vito ga wena Mutiruli wa hina wa pinzukelwa.

¹⁷ Jehova, hikuyini u hi tsikako hi hambuka tindleleni ta wena, U nonohisa timbilu ta hina kasi hi nga ku chavi ke? Tlhela hi kota ya malanza ya wena, A tixaka ta tshomba ya wena.

¹⁸ A vanhu va wena va basileko va fumele tiko xikhatanyana ntsena; A valala va hina va kanzihele a yindlu ya wena yo basa.

¹⁹ Makunu hi fanana ni vanhu lava cima u nga va fumelangiko, Khwatsi hi lava va nga vitwangiko hi vito ga wena.