Isaya 62 - Tshwa Bible

¹ Hi kota ya Zioni nzi nga ta miyela, Hi kota ya Jerusalema nzi nga ta humula Kala kuwonekela kakwe ku huma khwatsi wuronga, Ni kuhanyisa kakwe ku woningela kota kandiya.

² A vamatiko va ta wona kululama ka wena, Ni tihosi tontlhe ti ta wona kungangamela ka wena; Wena u ta vitaniwa hi vito giswa, Legi gi ta nga chuliwa hi nomu wa Jehova.

³ U tava xidlodlo xa wumbhuri a canjeni ga Jehova, Ni mubodi wa wuhosi lomu canjeni ga Nungungulu wa wena.

⁴ U nga ta ha wuliwa lezaku u Loyi a tsikilweko, Ge hambu tiko ga wena ku vitanwa lezaku Wa xiwunza; Kanilezi u ta vitanwa aku Xiranzwa, Ni tiko ga wena gi ta vitanwa aku Khosikazi; Hakuva Jehova wa xalaliswa ha wena, Ni tiko ga wena gi tava ni nuna.

⁵ Hakuva khwatsi hilezi a jaha gi chadako nhwana, Zinghaho a vana va wena va ta tekana na wena; Ni kota lezi a muyeni a tsakelako muswika wakwe, Zinghaho a Nungungulu wa wena i ta ku tsakela.

⁶ Nzi vekile varinzeli makhurisini ya wena Jerusalema, Cima va nga ta miyela hlikanhi ni wusiku. Nwina lava mu nga vakhumbuxeti va Jehova mu nga dzuki mu humula;

⁷ Mu nga mu tsiki a humula Kala a vuxa Jerusalema, a gi maha gi dzunzeka misaveni. Lu. 18:1

⁸ Jehova i hlambanyile hi canja gakwe ga xinene, Hi woko gakwe ga ntamu, aku: Hizinene, nzi nga ta ha nyikela a mavele ya wena a kuva zakuga za valala va wena, A vamatiko va nga tanwa a vinya ga wena, legi wena u gi tireleko.

⁹ Lava va tshovelako va taga na va bonga Jehova; Ni lava va elulako xivina va tanwa vinya lomu tihubyeni ta yindlu ya mina.

¹⁰ Humani, humani tinyangweni, mu lulamisa a ndlela ya tiko! Bhoxani ndlela, ecanyetani a gonzo, susani maribye; Tlakuselani a mujeke a ka matiko.

¹¹ Langutani, Jehova i bile hungu kala magemetamusi ya misava, aku: Byelani a nhwana Zioni, muku: A kuhanyiswa ka wena kala; Wata ni nchachazelo wakwe, Ni muphango wakwe wa mu rangela, Mat. 21:5; Joh. 12:15

¹² Va ta vitanwa lezaku Mbanhu va basileko, A vatirulwa va Jehova; Na wena u ta wuliwa lezaku u Loyi a labyiwako, A muti wu nga tsikiwiko.