Isaya 60 - Tshwa Bible

A kungangamela ka Jerusalema giswa.

¹ Suka u yima, u khazamula, hakuva a kuwonekela ka wena ku chikele, Ni kungangamela ka Jehova ku vukile hehla ka wena.

² Languta, a munyama wu fenengetile misava, Ni kuphuma ku fenengeta a matiko; Kanilezi Jehova i ta woneka hehla ka wena, Ni kungangamela kakwe ku ta woniwa ka wena. Joh. 1:5, 9, 14

³ A matiko ma ta famba kuwonekeleni ka wena, Ni tihosi ti ta famba kuhatimeni ka kuvuka ka wena. Lu. 2:32; Kuv. 21:24

⁴ Tlakusa a mahlo ya wena u lunguza, Languta: va tsombene vontlhelele, vata ka wena; A vana va wena va tata hi le kule, Ni vanhwana va wena vata na va wukarelwe.

⁵ Zonake u ta zi wona u tsaka, A mbilu ya wena yi ta tlula-tlula yi nengela, Hakuva a kufuma ka bimbi ku ta tiswa ka wena, Ni titshomba ta matiko ti tata ka wena.

⁶ A makameli yo tala ma ta ku fenengeta, Ni marole ya makameli ya le Midiani ni ya le Efa; Vontlhe va le Xeba va tata va neha nzalama ni hlakati, Va taba nyiwo hi kudumiswa ka Jehova.

⁷ A mitlhambi yontlhe ya le Kedare yi ta tsomhanyiswa ka wena, A tihamba ta Nebaiote ti ta ku tirela; Ti ta humesiwa ganzelweni ga mina khwatsi hi munyikelo wu khesekako, Nzi sasekisa a yindlu ya wukulu ga mina.

⁸ Mbamani lava va tako khwatsi i refu, Va ku khwatsi matuva ma purumako xihahlweni xa wona ke?

⁹ Hizinene, a matiko ya le bimbini ma nzi lavelela, Ku ranga a mataru ya le Tarxixi mata, Ma neha a vana va wena hi le kule Zinwe ni siliva yabye ni nzalama, Hi kota ya vito ga Jehova, Nungungulu wa wena, Ni Loyi a Basileko wa ka Israeli, loyi a ku kulisako.

¹⁰ A vamatiko va ta aka ligingisi la wena, Ni tihosi tabye ti ta ku tirela. Kunene nzi ku bile zangeni ya mina, Kanilezi hi kota ya tipswalo ta mina nzi ku rivalele.

¹¹ A tinyangwa ti ta tshama ti vululwe xikhati xontlhe, Mumu ni wusiku ti nga ta valiwa; Kasi a kufuma ka vamatiko ku fela ku enghena kona, A tihosi ta wona ti longoloka nako. Kuv. 21:24

¹² Hakuva a tiko ni mufumo wu to kala wu nga ku tireli wu ta lova, Ina, a matiko lawo ma ta hahlulwa maku bhi!

¹³ A wukosi ga Lebanoni gi tata ka wena, A kipres ni pinyero ni seringa khatiginwe, Kasi ku bombisa a wutshamu ga mina gi basileko; Nzi ta ngangamelisa a wutshamu legi ku yimileko ka gona a milenge ya mina.

¹⁴ A vana va vaxanisi vawena va tata ka wena va ku koramela, Ni vontlhe lava va nga ku nyenya va ta ku khizamela mikonzweni ya wena, Va ta ku vitana lezaku u Muti wa Jehova, A Zioni wa Loyi a Basileko wa ka Israeli.

¹⁵ Hambu lezi u nga tsikilwe u vengiwa, Laha kaku a munhu a nga ku tsemakanyeli, Nzi ta ku maha uva wutshamu ga lisima kala kupinzuka, A xilo xa litsako ka zizukulwana zinyingi.

¹⁶ U ta anwa a mafi ya matiko, Ina, u ta anwa a mavele ya tihosi; Zonake u ta zi tiva lezaku mina Jehova nzi Muhanyisi wa wena Ni Mutiruli wa wena, a Nyamintamu wa ka Jakobe.

¹⁷ Wutshanwini ga suku nzi ta neha nzalama, Ni wutshanwini ga xiketse nzi ta neha siliva, A suku wutshanwini ga tisinya Ni xiketse wutshanwini ga ma ribye. Nzi ta veka kurula a kuva mufumeli wa wena, Ni nongameto a kuva nwinyi wa wena.

¹⁸ A tihanyi ti nga ta ha zwiwa lo mu tikweni ga wena, A kuhahlulwa ni kulobyiswa zi nga tava kona tikweni ga wena, Kanilezi u ta vitana a tigingisi ta wena lezaku Kuhanyiswa, Ni tinyangwa ta wena lezaku Kudumisa.

¹⁹ A gambo gi nga ta hava kuwonekela ka wena ni hlikanhi, Ge hambu nweti wu nga ta ha ku woningela, Kanilezi Jehova i tava kuwonekela ka wena ka pinzukelwa, Ni Nungungulu wa wena i tava wumbhuri ga wena. 1 Joh. 1:5; Jak. 1:17; Kuv. 21:23

²⁰ A gambo ga wena cima gi nga ta ha pela, Ni hweti ya wena yi nga ta hafa kambe; Hakuva Jehova i tava kuwonekela ka wena ka pinzukelwa, Ni masiku ya nkosi wa wena ma ta mbhela.

²¹ A vanhu vontlhe va wena va tava va lulamileko, A tiko gi ta lumba vona kala magumo. Vona i hluke legi nzi byeleko, A ntiro wa mandla ya mina, kasi nza fela ku dumiswa. Mat. 15:13

²² Loyi tsongwani i ta enzeleka ava khume ga mazana, Ni loyi wa tsongwani nguvu i tava a tiko ga ntamu. Mina Jehova nzi ta zi hatlisisa zikhatini za zona.