Isaya 58 - Tshwa Bible

A kuyila ka zinene.

¹ Kanyuluka hi ntamu, u nga tsetsi a gezu ga wena; Tlakusa a gezu ga wena giku khwatsi i mpunzu, U tlhatlhambutela ka tiko ga mina a kuhambunyeta ka gona, Ni ka yindlu ya ka Jakobe a zionho zabye.

² Kunene, va nzi hlota wontihe masiku, Va ranza ku tiva tindlela ta mina; Kota gi nga tiko gi mahako kululama, Gi nga tsikangiko nongameto wa Nungungulu wa gona; Va kombela ka mina a zileletelo zi lulamileko, Va tsaka hi ku tshinela kusuhani ka Nungungulu.

³ Vaku; Zi hi vuna yini a ku yila, loku wena u nga hi woni? Ni ku hlokisa a mihefemulo ya hina, loku u nga wuli nchumu ha zona? Langutani, a siku legi mu yilako zakuga mu tira mitiro ya nwina, Mu tirisa hi ntamu a zitiri za nwina.

⁴ Langutani, mu ti yilisa zakuga na mu kari mu holovisana ni ku kanetisana, Ni ku banana hi zibhakela za tihanyi. A nyamutlha a mu ti yisili zakuga Lezaku a gezu ga nwina gi zwiwa le hehla.

⁵ Hi kona kuyila loku ku nzi tsakisako ke? Xana i siku legi munhu a hlokisako muhefemulo wakwe? Kasi hi ku koramisa hloko khwatsi lihlanga, Ni ku etlela laha sakweni ni lomu khumeni, Hi zona u zi vitako aku kuyila, Lezaku i siku gi tsakisako Jehova ke? Zak. 7:5; Mat. 6:16

⁶ A kuyila loku ku nzi tsakisako hi loku: Lezaku mu tlhatlha a mangenje ya mona, Ni ku tlhatlha a miyoka ya wukhumbi, Mu tlhatlha lava va tsimbeketilweko, Ni kuva mu tshova a miyoka yontlhelele.

⁷ Ina, u ta phamela loyi a nga ni ndlala a zakuga za wena, Ni ku rurela a ndlwini ya wena lava va vumalako va nga hiko na muti; U ambexa lava va nga hiko na tinguwo, Ni kuva u nga fulareli loyi a nga nyama ya wena hi xiviti. Mat. 25:35

⁸ Zonake a kuwonekela ka wena ku ta woneka kota wuronga, Ni xilonza za wena zi ta hatlisa ku hola, A kululama ka wena ku ta ku rangela Ni wukulu ga Jehova gi ta ku vikela lenzhako.

⁹ Zonake Jehova i ta ku hlamula loku u kombela, Ni loku u vitana, yena i taku: Nzi laha! Loku u susa miyoka xikari ka wena, Ni loku u tsika ku lumbeta hi titiho ni ku wulawula kubiha,

¹⁰ Loku u avela zakuga za wena ka loyi a zwako ndlala, Ni ku xurisa loyi a hlokiswako, Zonake a kuwonekela ka wena ku ta woneka munyameni, Ni munyama wa wena wu hunzuka wu maha hlikanhi.

¹¹ Lezo Jehova i ta ku rangela xontlhe xikhati, I ta xurisa muhefemulo wa wena matshanwini ma womileko, Ni ku tiyisa a marambu ya wena; U ta fanana ni simu gi cheletelweko mati, Ni xibuka lexi a mati ya xona ma nga pswhiko,

¹² A vanhu va wena va ta tlhela va vuxa marumbi ya kale, Uta aketa a ziseketelo za kaleloko; U ta vitanwa lezaku Muvuxi wa makhurisi ma bhoxilweko Ni Mululamisi wa tindlela lezaku vanhu va aka laha tikweni.

A ku hlayisa Sabado.

¹³ Loku u khoma a nenge wa wena lezaku wu nga onhi a sabado, U nga mahi a ntiro wa wena hi siku ga mina go basa; Loku u wula lezaku a siku ga sabado litsako la wena, Lezaku legi gi basileko ga Jehova gi fanele ku chabyiwa, Loku u gi dzunza hi ku nga fambi tindleleni ta wena wutsumbu, Ni ku nga mahi kuranza ka wena ni ku wulawula timhaka ta hava,

¹⁴ Kwalaho u ta tsakela Jehova, Nzi ta ku kanzihisa zitsungeni za misava, Nzi ku nyika a kuga a tshomba ya Jakobe a dadani wa wena, Hakuva a nomu wa Jehova wu wulile lezo!