Isaya 55 - Tshwa Bible

Va khongotelwa ku hunzuluka.

¹ Nwina nwentlhe mu nga ni tora, ngonani matini; Na nwina lava mu nga hava mali, Ngonani mu ta xava mavele muga; Ina, Ngonani mu ta xava mavele ahandle ka mali, Mu kuma vinya ni masi mahala. Mat. 11:28; Joh. 7:37; Kuv. 22:17

² Hikuyini mu xakelako mali hi ku xava lezi zi nga hiko zakuga ke? Hikuyini mu humesako hakhelo ya nwina hi kota ya lezi zi nga xurisiko ke? Nzi ingiseni, mu taga zo nanziha, mu ti tsakisa hi lezi zi nonileko.

³ Dembani tindleve, muta ka mina; Zwanani, kasi mihefemulo ya nwina ya hanya. Nzi ta maha xivumelwano xa pinzukelwa na nwina, Kasi ma amukela a tipswalo leti nzi tsumbisileko ka Davida. 2 Sam. 7:15; 1 Tih. 8:25; Miti. 13:34

⁴ Langutani, nzi mu yimisile a kuva mboni ka vamatiko, A hosana ni murangeli wa matiko.

⁵ Languta, u ta vitana a matiko lawa u nga ma tiviko, Ni matiko lawa ma nga ku tiviko ma ta tsutsumela ka wena, Hi keta ya Jehova, Nungungulu wa wena, Ni Loyi a Basileko wa ka Israeli, loyi a ku dumisileko.

⁶ Hlotani Jehova na a ha kumeka, Mu vitaneni na a ha hi kusuhani!

⁷ A wa kubiha ngha a tsika ndlela yakwe, Ni loyi a nga lulamangiko a tsike maalakanyo yakwe; Ngha a tlhelela ka Jehova, na yena i tava ni tipswalo kakwe, Ni ka Nungungulu wa hina, hakuva i ta tsetselela hi matsenya.

⁸ Hakuva a maalakanyo ya mina a hi maalakanyo ya nwina, Ge hambu a tindlela ta nwina a hi tindlela ta mina, Ku wula Jehova.

⁹ Khwatsi hi matilo ma tlakukile ko ku hunza misava, Zinghaho a tindlela ta mina ti tlakukile ku hunza ta nwina, Ni maalakanyo ya mina ma hunza ya nwina.

¹⁰ Kota lezi a vula ni gapongo zi nako hi le tilweni, Zi nga tlheliko na zi nga se ku tsakamisa misava, Zi yi nonisa ni ku yi milisa, Kasi ya nyika mbewu ka mubyali, ni zakuga ka mugi;

¹¹ Yi tava tano a mhaka ya mina yi humako nonwini wa mina; Yi nga ta tlhelela ka mina mahala; Kanilezi yi ta maha lezi nzi zi xuvako, Yi ta hetisa lezi nzi yi rumeleko zona, Joh. 6:63; Miti. 12:24

¹² Hakuva mu ta huma hi kutsaka, Mu rangelwa hi kurula. A zitsunga ni miganga zi ta tlhava zizimba mahlweni ka nwina, A tisinya tontlhe ta khwati ti ta phakatela mandla.

¹³ A wutshanwini ga mizwa ku ta mila kipres, Ni wutshanwini ga zigetlwani ku ta huma a mirta; Zi ta zwakalisa a vito ga Jehova, Zi tava xikombiso xa pinzukelwa xi to kala xi nga vinyiwi,