Isaya 46 - Tshwa Bible

A zifananiso a zi zi koti ku hanyisa.

¹ Beli i vumbamile, Nebo wa korama, A zifananiso zabye zi rwaliwa hi zifuyo ni tihomu; Lezi mu nga zi rwala zi pakelwa ka zihari zi kareleko.

² Va koramile, vawa zinwe, A va zi koti ku ponisa nzhwalo; Vona wutsumbu va yile wukhumbini.

³ Nzi ingiseni, nwina va yindlu ya Jakobe, Nwina nwentlhe mu seleko ka yindlu ya ka Israeli; Nwina lava nzi mu rweleko kusukela kupswalweni ka nwina, Nzi mu beleka na ma ha hi rumbyini ga nyine wa nwina. Ekso. 19:4; Deut. 1:31; 32:11

⁴ Nzi tava tano kala wukhosaneni ga nwina, Nzi ta mu rwala kala mu huma wuvu; Nzi zi mahile, nzi ta engeta nzi mu rwala, Nzi ta mu hlayisa, nzi mu ponisa.

⁵ Mu ta nzi fananisa na mani, nzi ecana naye? Mu ta nzi ringanisa na mani, lezaku hi fanana ke?

⁶ Va humesa a nzalama mikwameni, va pima a siliva xikalwini; Va vitana a mufuli a kuva a maha nungungulu ha zona, Loyi va ta nga mu khizamela, va mu khozela. Vala. 17:4; Jer. 10:3

⁷ Va mu tlakula, va mu rwala hi makatla, Va ya mu veka wutshanwini gakwe, Zonake a tshama laho, a nga zi koti ku suka. Loku va kanyuluka kakwe a nga hlamuli nchumu, Hambu ku va ponisa zikaratweni zabye.

⁸ Alakanyani lezi zilo, muva vavanuna, Nwina vahambunyeti, ti alakanyeni!

⁹ Alakanyani a zilo zi mahekileko kaleloko, Hakuva hi mina Nungungulu, a nga kona munwani; Nzi Nungungulu, a nga kona a fananako na mina.

¹⁰ Nzi tlhatlhambutela a zilo na za hi ku sangula, Nzi vumba ni lezi zi kalako zi nga se ku maheka; Nziku: A makungu ya mina ma ta tatiseka, Nzi tira zontlhe lezi nzi zi ranzako.

¹¹ Nzi vitana a gama hi le Mutsuwuka-gambo, Ni munhu loyi a ta nga maha kuranza ka mina hi le tikweni ga le kule. Ina, nzi zi wulile, nzi ta zi maha zi tatiseka; Lezi nzi zi alakanyileko nzi ta zi maha.

¹² Nzi ingiseni nwina va timbilu to nonoha, Nwina valala va kululama.

¹³ Nzi tshinetile a kululama ka mina, Ni kuhanyisa ka mina ku nga ta hlwela; Nzi ta veka kuhanyisa ka mina le Zioni, Ni wudzunzo ga mina ka Israeli.