Isaya 38 - Tshwa Bible

A wubabyi ga Hezekia.

¹ A ka masiku lawo Hezekia i wa babyela kufa. Na muprofeti Isaya a nʼwana Amozi, i lota kakwe, a taku: Jehova i ngalo: Lulamisa a timhaka ta yindlu ya wena hakuva u tafa, u nga ta hanya. 2 Tih. 20:1

² Zonake Hezekia i lo hunzuluka mubhedini a cuwuka khurisini, a kombela ka Jehova, aku:

³ Jehova nza ku khongotela akuva u alakanya lezaku nzi fambile mahlweni ka wena hi kukholeka ni mbilu yi mbheleleko; nzi mahile lezi za zinene mahlweni ka wena. Hezekia i lo rila a tsikwila.

⁴ Zonake a gezu ga Jehova gi lota ka Isaya, giku:

⁵ Tlhela uya ka Hezekia u yaku: Jehova a Nungungulu wa Davida a raru wa wena, i ngalo: Nzi zwile mukombelo wa wena, nzi wonile mihloti ya wena. Languta, nzi ta engetela a masiku ya wena hi khume ga malembe ni ntlhanu;

⁶ nzi ta ku tlhatlhisa mandleni ya hosi ya Assiria, wena ni muti wa wena; nzi ta vikela muti lowu.

⁷ A xikombiso lexi u nyikiwako hi Jehova, xi tiyisako lezaku Jehova i ta maha lezi a zi wulileko, hi lexi:

⁸ nzi ta tlhelisa hi khume ga zikanzihelo a nzhuti lowu wu cikisilweko hi gambo laha ka xikombiso xa xikhati xa Ahazi. Hakunene a gambo gi lo tlhela khume ga zikanzihelo laha ka xikombiso xa xikhati.

A lisimu la Hezekia.

⁹ A lisimu la Hezekia a hosi ya ka Juda, leli a nga li tsala laha a nga kalamukile wubabyini gakwe:

¹⁰ Aku: A hlikanhini wa masiku ya mina nzi enghena tinyangweni ta Xeole. Nzi wutlelwe a masiku ya mina ma seleko. Joba 7:6

¹¹ Nzi waku: Nzi nga ta ha mu wona Jehova, Yena Jehova a tikweni ga vahanyako. Nzi nga ta ha wona munhu xikari ka vaaki va misava.

¹² A yindlu ya mina yi susiwa, yi yiswa kule A kukotisa a xaxa wa murisi; Nzi songile a wutomi ga mina khwatsi hi muluki, Wa nzi tsema lomu ka xikhato; Na ku nga se ku chikela wusiku u nzi mbhetile.

¹³ Nzi miyele kala ni mixo, A ku khwatsi i nghala a fayetela marambu ya mina wontihe. Na ku nga se ku chikela wusiku u nzi mbhetile.

¹⁴ Nzi wa rila kota mbewulwani, ni kukotisa a nyawukolwe, Nzi tsikwila kota tuva, A mahlo ya mina ma wa karala hi ku cuwuka le hehla; Jehova, nzi le kubayisekeni, nzi hlangute!

¹⁵ Nzi ta ku yini? I nzi hlamule, i tirile yena! Nzi ta famba hi ku ti tsongahata malembe ya mina wontihe Hi kota ya kubayiseka ka moya wa mina.

¹⁶ Hosi, a wutomi gi kumeka hi zilo za kunghaho, A moya wa mina wu kuma kuhanya hi ka zona; Hikwalaho u ta nzi holisa, u nzi hanyisa.

¹⁷ A hlomulo loʼwa hombe wa mina wu nzi nehele kurula; Hi liranzo la wena u humesile moya wa mina rinzini ga kubola; Hakuva u hoxile zionho za mina zontlhe lenzhako ka wena.

¹⁸ Hakuva a Xeole a xi na ku ku dumisa, Ni kufa a ku na ku ku khesa; Ni lava va releleko nkeleni a va ha tsumbi kukholeka ka wena.

¹⁹ A vahanyako, ina, a vahanyako va ta ku dumisa, Khwatsi hi lezi nzi mahako nyamutlha; A vadadani va ta kanela ka vanana vabye a kutsumbeka ka wena.

²⁰ Jehova i ta nzi hanyisa; Hikwalaho hi ta yimbelela tisimu hi zitende za hina, Wontihe masiku ya hina lomu ndlwini ya Jehova.

²¹ Zonake Isaya aku: A va nehe a xikhekhetselo xa makuwu, va xi bohelela laha ka xidlayi, na Hezekia i ta hanya.

²² Kanilezi Hezekia aku: Xikombiso muni nzi ta nga nyikiwa xo tiyisa lezaku nzi ta tlhela nziya ndlwini ya Jehova ke?