Isaya 35 - Tshwa Bible

A kutsaka ka vatlhatlhilweko.

¹ A xiwula ni ligwangwa zi ta tsaka, Ni mapanya ma ta nengela, ma baleka khwatsi makonʼwa.

² Ma ta pfepfa ku hunza mpimo, Ma bhuma hi litsako ni kuyimbelela; Ma ta nyikiwa a wukosi ga Lebanoni, Ni kunona ka Karmeli na Xaroni. Va ta wona a wukulu ga Jehova, ni wukenikeni ga Nungungulu wa hina.

³ Tiyisani a mandla ma rerekileko, Mu tiyiseta a madzolo ma hohoveleko.

⁴ Wulani ka vona lava va nga ni hlenekera, muku: Tiyisani timbilu, mu nga chavi! Langutani, wata Nungungulu wa nwina, i ta mu photela, Wu nga wona nchachazelo wa Nungungulu; I tata a ta mu hanyisa.

⁵ Zonake a mahlo ya zikhumu ma ta vululiwa, Ni tindleve ta ziwiri ti ta vululeka.

⁶ A zilema zi ta tlula khwatsi i hlangu, Ni tirimi ta timbeveve ti ta yimbelela; Hakuva a mati ma ta khulunga lomu xiwuleni, Ni micongo yi ta khulungela mapanyeni.

⁷ A misava ya xikhwakhwa yi ta hunzuka yiva tiva, Ni tiko gi womileko gi ta humesa zibuka; Lomu ku tshamileko mahlolwa Ku ta mila byanyi ni tihlanga ni majeka.

⁸ A gonzo gi tava kona laho, ni ndlela, Leyi yi ta nga vitanwa aku i Ndlela yi basileko; A vangahlazekangiko va nga ta hunza ha yona, Yi tava ya vona voce; Lava va ta nga famba ndleleni leyo, Hambu loku va hi zipumbu va nga ta lahleka. Joh. 14:6; Kuv. 21:27

⁹ Yi nga tava ni nghala, Ne ni zivanza zo leva zi nga tava kona, Zi nga ta kumeka lomo; Kanilezi yi ta famba lava va tlhatlhisilweko.

¹⁰ Ina, lava va tirulweko hi Jehova va ta tlhela, Vaya Zioni hi tisimu ta litsako; A kutsaka ka pinzukelwa ku tava tihlokweni tabye, Va ta kuma makatekwa ni litsako, A hlomulo ni kutsikwila zi ta tsutsuma. Joh. 16:22; Kuv. 21:4