Isaya 33 - Tshwa Bible

Nungungulu i ta tlhatlhisa Zioni.

¹ Khombo ka wena loyi u onhako na cima wena u nga onhiwangi; Wena muphangi, loyi u nga phangiwangiko; Loku u mbhetile ku onha, u ta onhiwawu, Ni loku u mbhetile ku phanga, u ta phangiwawu!

² Jehova, ngha u hi ni wuxinji ka hina! Hi ku langutele. Ngha uva muvuni wa hina ka siku ginwe ni ginwani; Ni muhanyisi wa hina zikhatini za zikarato.

³ Hi kota ya guwa ga gezu ga wena a vamatiko va tsutsuma, Loku u vuka, a matiko ma hangalaka.

⁴ A muphango wa nwina wu ta tekiwa khwatsi hilezi a pungwani wu tekisako zona, Va ta ti hoxa ka wona khwatsi hi humbi yi nzulanzulako.

⁵ Jehova i tlakukile hakuva i tshama le hehla; I tatisile Zioni hi nongameto ni kululama.

⁶ Mu ta tshameka masikwini ya wena, A wutlhari ni wutivi gi ta vanga kuhanyiswa; Ni kuchava Jehova hi tshomba ya Zioni.

⁷ Langutani, a tinhenha tabye ta kanyuluka lahandle, Ni mitsukano ya kurula ya rila hi kubayiseka.

⁸ A magonzo ma fuva, a ka ha fambi munhu tindleleni; I tshovile xivumelwano, i kanyisile miti, A nga khataleli vanhu. Vala. 5:6; 2 Tih. 18:14

⁹ A tiko gi le nkosini, ga hloka; Lebanoni i na ni tingana, i wunile; Xaroni o khwatsi ligwangwa, Baxani na Karmeli va tlhatlheka matluka yabye.

¹⁰ Makunu nzi ta vuka, ku wula Jehova; Makunu nzi ta ti tlakusa, nzi ti kulisa.

¹¹ Mu ta xura a nyimba ya mungu, mu pswala byanyi gi womileko; A kuhefemula ka nwina i nzilo wo mu lovisa.

¹² Zonake a matiko ma taswa kota mhemba, Khwatsi hi mizwa yi tsemilweko, yi hiswa.

¹³ Nwina va le kule, zwanani lezi nzi zi mahileko; Na nwina va laha kusuhani, tivani a ntamu wa mina.

¹⁴ A vaonhi va le Zioni va chava; A vakubiha va rurumela, vaku: Himani xikari ka hina a ta nga tiya a yima nzilweni lowu wu hisako? Himani a ta nga hanya malangavini ma nga timekiko? Deut. 4:24; Isa. 30:27

¹⁵ Hi yena loyi a fambako kululameni, a wulawulako zinene; Loyi a alako a titshomba ti wulilweko, Loyi a mandla yakwe ma nga amukeliko zakuxavelelwa. Loyi a tindleve takwe ti nga ingiseliko a timhaka ta kudaya, Loyi a valako mahlo yakwe lezaku ma nga woni kubiha.

¹⁶ Hi yena a ta nga aka wutshanwini gi tlakukileko, A wuchavelo gakwe gi tava khokhola ga maribye, I ta nyikwa zakuga zakwe, ni mati yakwe ma nga tapswha.

¹⁷ A mahlo ya wena ma ta wona hosi wumbhurini ga yona, Ma ta wona a tiko gi anamileko.

¹⁸ A mbilu ya wena yi ta alakanya a xikhati xa kuchava. Uku: I kwihi mutsaleli, i kwihi loyi a pimako nzuvo ke? I kwihi loyi a nga hlaya makhokhola?

¹⁹ U nga ta ha wona a vanhu va tihanyi, Va wulawulako a lirimi li nga pimekiko, A vanhu va manghakamela lawa a munhu a kalako a nga zi koti ku maswa,

²⁰ Languta Zioni, a muti wa mibuzo ya hina! A mahlo ya wena ma ta wona Jerusalema, wuakelo ga kurula; A tenda legi gi to kala gi nga susiwi, Legi a timhingu ta gona ti to kala ti nga kunulwi, Ni tingoti ta gona ti nga ta phewuka, ne ni yinwe.

²¹ Hakuva Jehova i tava zinwe na hina lomo hi wukulu gakwe. A wutshanwini ga micongo yo anama ni zicongwana, Leyi yi nga engheniwiko hi tingalava ti fambiswako hi makasiya, Ge, hambu a mataru ya hombe a ma hunzi ha kona.

²² Hakuva Jehova hi mulamuli wa hina, Jehova munyiki wa nayo wa hina, Jehova i Hosi ya hina, i ta hi hanyisa.

²³ A magota ya wena ma nyesetilwe, Ma wa nga zi koti ku tiyisa a mulingwati, ni ku gwimba tangi. Kanilezi xikhatini lexo ku ta aveliwa a muphango wa hombe, Hambu ni zilema zi ta phanga.

²⁴ A ku na muaki ni munwe a ta ngaku: Nza babya! A vanhu va akileko lomu va ta tsetselelwa zionho zabye. Joeli 3:10; Zak. 12:8