Isaya 32 - Tshwa Bible

A kufuma ka kululama.

¹ Langutani, a hosi yi ta fuma hi kululama, Ni tihosana ti ta fuma hi nongameto.

² Munwe ni munwani i ta kotisa wuchavelo loku moya wu bhubhutsa, A kotisa wuponelo ka xingulo; Kukotisa a congo wa mati wutshanwini gi womileko; Ni nzhuti wa ribye ga hombe tikweni gi nga ni tora.

³ A mahlo ya lava va wonako ma nga ta kuva xilutsu, Ni tindleve ta lava va zwako ti ta ingisela.

⁴ A timbilu ta lava va matloti ti ta kuma kutiva, Ni tirimi ta lava va manghakamela ti ta wulawula hi kutlhatlhekileko.

⁵ A xipumbu xi nga ta ha vitwa lezaku xi dzunzekile, Ni mukanganyisi a nga ta ha vitwa a wahombe.

⁶ Hakuva a xipumbu xi wulawula wupumbu, Ni mbilu ya xona yi maha mitiro ya kubiha ni kukhohlisa; I wulawula zahava ha Jehova, A tsona loyi a na nga ni ndlala, Ni loyi a nga ni tora a mu tsona mati.

⁷ A matlhari ya mukanganyisi ma bihile, I aka mano yo lovisa lava va vumalako hi ku hemba mawunwa, Hambu loku a mhaka ya muvumali yi hi yinene.

⁸ Kanilezi a munhu nene i alakanya zinene, I simamisa a yima zineneni. A xiluleko xa vavasati va tshamileko.

⁹ Vukani, nwina vavasati lava mu tshamekileko; Zwanani gezu ga mina, nwina vanhwana mu ti tsumbako; Kangatelani tindleve ka timhaka ta mina.

¹⁰ Ku ta hunza lembe ni masiku yo kari, mu ta karateka nwina mu ti tsumbako, Hakuva a xivina xi nga ta pswala, ku nga ta ha eluliwa mihanzu,

¹¹ Rurumelani nwina vavasati lava mu tshamekileko; Chavani nwina mu ti tsumbako; Tlomulani tinguwo ta nwina, mu ambala tisakwa ziwunwini za nwina.

¹² Va ta tiba zifuva hi kota ya ma simu lawa yo saseka, Ni xivina lexi xi pswalileko nguvu.

¹³ Lomu tikweni ga vanhu va mina ku ta mila mizwa ni zigetlwani, Ina, ni le hehla ka tiyindlu ta kutsaka mutini wa tsakiselelo.

¹⁴ Hakuva a ziluvelo zi ta tsikiwa, A muti lowu wu tlhomeneko vanhu wu ta maha rumbi. A xitsunga ni makhokhola ya valanguteli zi tava tinzawu kala kupinzuka, A wukhanelo ga zihari za khwati ni wuriselo ga mitlhambi;

¹⁵ Kala loku a moya wu chululwe ka hina hi le hehla, Ni xiwula xi maha simu ga pfuno, Ni simu ga pfuno gi hunzuka gi maha xigwangwa. Ezek. 39:29; Joeli 2:28

¹⁶ Zonake a nongameto wu ta aka le xiwuleni, Ni kululama ku ta tshama lomu sinwini gi pfunako.

¹⁷ A ntiro wa kululama wu tava kurula, Ni mihanzu ya kululama yi tava kuhumula ni kutsumba kala kupinzuka.

¹⁸ Zonake a vanhu va mina va ta tshama tikweni ga kurula, Lomu tindlwini ti tsumbekileko, Ni matshanwini ya ku humula hi kurula.

¹⁹ Kanilezi a khwati gi tawa loku kuna maralala, Ni muti wu ta tsongahatiwa.

²⁰ Mu katekile nwina lava mu byalako lomu ku tsakamisilweko hi mati, Nwina lava mu nga bohiko a milenge ya homu ni ya mbongola.