Isaya 29 - Tshwa Bible

A khombo ga Arieli, (Jerusalema).

¹ Khombo ka Arieli, Arieli, a muti lowu Davida a nga govela kona, Engetelani lembe hi lembe, ni mibuzo a yi nyiketane!

² Zonake nzi ta hlokisa Arieli, Ku tava hi xirilo ni hlomulo; Ahemba lezoke, a ka mina i ta simamisa a kuva Arieli.

³ Nzi ta ku govela ka wontihe matlhelo, Nzi ku renzelekela hi tigingisi, Nzi ku vimbezela hi makhurisi.

⁴ U ta koramiswa, a gezu ga wena gi ta humela hasi; A timhaka ta wena ti ta huma hi gome ntshurini, A gezu ga wena gi ta fanana ni legi ga xiruti, gi huma misaveni; Gi huma ntshurini khwatsi hi loyi a nʼununʼutako.

⁵ A xidlemo xa valala va wena xi taku khwatsi i tsutsungwani, Ni xidlemo xa vatsimbeketi xi ta fanana ni mungu lowu wu hahako, Zi ta humela hi xitsuketi.

⁶ Jehova wa tiyimpi i ta ku tsayisa hi kudzinza Ni kutsekatseka ka misava ni guwa ga hombe, Hi xipupuri ni bhubhutsa, ni langavi ga nzilo wu hisako.

⁷ Zonake a xidlemo xa matiko wontihe lawa ma lwako na Arieli, Ni vontlhe lava va vimbezelako muti ni khokhola ga wona, Va ta ku khwatsi i noro, a muwoniso wa wusiku.

⁸ Ku taku khwatsi munhu wa ndlala loku a lora na aga, Laha na a vukako a tizwa na a ha hi ni ndlala; Ni ku khwatsi munhu a zwako tora, a lorako na anwa mati, Loku a vuka a kuma lezaku wa ha womile nkolo; Zi tava tano ni matiko wontihe lawa ma vukelako xitsunga xa Zioni.

A wukhumu ga moya.

⁹ Yimani, mu hlamala, Tsimbani mahlo, muva zikhumu; Va popilwe, kanilezi na ku nga hi hi vinya; Va dedereka, kanilezi na ku nga hi kota ya byala.

¹⁰ Hakuva Jehova i mu chululela a moya wa wurongo, I valile mahlo ya nwina vaprofeti, I fenengetile a tihloko ta vavumbi, va nga varangeli va nwina.

¹¹ Yontlhe miwoniso yi mahile ka nwina kukotisa timhaka ta bhuku gi lemilweko, legi gi nyikiwako ka munhu loyi a tivako ku gonza, vaku: Maha wuxinji, u gonza bhuku legi; yena a hlamula, aku: A nzi zi koti hakuva gi lemilwe. Kuv. 5:1

¹² Zonake a bhuku gi nyikiwa ka loyi a nga gonzangiko, vaku: Maha wuxinji, u gonza bhuku legi; yena a hlamula, aku: A nzi zi tivi ku gonza.

¹³ Hilezo Hosi yi te ngalo: Kota lezi a vanhu lava va tshinelako ka mina hi milomu yabye, Va nzi khesa hi milomu ntsena, A timbilu tabye na ti hi kule na mina, Lezaku a xichavo xabye ha mina hi zileletelo ntsena lezi va zi gonzileko; Mat. 15:8; Mar. 7:6

¹⁴ Hikwalaho nza ha ta maha mahanjalati ka vanhu lava, A mitiro yi riwukisako, leʼyi hlamalisako; A wutlhari ga titlhari tabye gi ta fuva, Ni kupima ka vanhu vabye va tlharihileko ku ta gumelwa.

¹⁵ Khombo ka vona lavo va fihleleko Jehova a xikungo xabye, Va maha mitiro yabye munyameni; Vaku: Hi ta woniwa hi mani, himani a hi tivako?

¹⁶ Ha, a wupumbu ga nwina! A wumba gi nga ringanisiwa ni muwumbi ke? A ximahwa xi ta wula hi mumahi wa xona, xiku: A nga nzi mahangi, Kutani leʼxi vatlilweko xi nga wula hi muvatli wa xona, xiku: A nga pimi nchumu? Isa. 45:9; Rom. 9:20

¹⁷ Hi xikhatanyana Lebanoni i ta maha simu gi nonileko, Ni simu gi nonileko gi ta maha khwati.

¹⁸ Hi siku lego a ziwiri zi tazwa a timhaka ta bhuku, Ni mahlo ya zikhumu ma ta susiwa phume ma wona munyameni;

¹⁹ Lava va kurula va ta tsakela Jehova, Ni vavumali va ta tsakela Loyi wa ku Basa wa ka Israeli.

²⁰ Hakuva a muxanisi i ta lobyiswa ni mutseketseli i ta gumelwa; Zonake ku ta susiwa vontlhe lava va cuwukelako kubiha;

²¹ Lava va nyikako munhu nanzu hi marengu yabye, Va veka ziyo ka loyi a lamulako nyangweni, Va tshanza a mhaka ya loyi a lulamileko hi mawunwa.

²² Hikwalaho Jehova loyi a tlhatlhisileko Abrahama, i byela yindlu ya ka Jakobe, aku: Jakobe a nga ta ha wiswa tingana, ni nghohe yakwe cima yi nga ta ha tsanwa.

²³ Hakuva laha vana vakwe va ta nga wona mitiro ya mina xikari kabye, Va ta chava vito ga mina, va dumisa Loyi a Basileko wa ka Jakobe, Va ta chava Nungungulu wa ka Israeli.

²⁴ Lava a moya wabye wu hambukileko va ta gonza wutlhari, Ni lava va nga kalala va ta kuma wutivi.