Isaya 27 - Tshwa Bible

A kutlheliselwa ka Israeli.

¹ A ka siku lego Jehova i taba hi supado yakwe yo kariha ya hombe ni ya ntamu, A tsayisa Leviatani, a nyoka yi tsutsumako, Leviatani, a nyoka yi ti kokakokako, Zonake a daya drako legi gi nga lomu bimbini. Joba 26:13; Ezek. 29:3

² A ka siku lego ku tava kona a xivina xi teleko hi mihanzu, Va ta yimbelela ha xona, vaku:

³ Mina Jehova nzi muhlayisi wa xona, Nzi ta xi cheletela mati xontlhe xikhati; Nzi xi rinzela mumu ni wusiku kasi munhu a nga xi gohi.

⁴ A nzi xi zangareli, Loku a zigetlwani ni mizwa zi wa talwa na mina, Nzi wa ta zi hlomela, nzi zi hisa zontlhe.

⁵ Loku zi nga hi tano a va tsutsumele khokholeni ga mina, Va kombela kurula ka mina, Ina, a va kombele kurula ka mina.

⁶ A ka zikhati zi tako Jakobe i ta mila mitsu; Israeli i ta pfepfa a hluka, I ta tata misava hi mihanzu yakwe.

⁷ Xana i mu bile ku fanana ni lezi a hisileko zona laʼva mu bileko ke? Kutani i delwe ku fanana ni lezi a deleko a valala vakwe ke?

⁸ U mu bile hi mpimo loku u mu hlongole kule, I mu kukuletile hi bhubhutsa gakwe ga ntamu hi siku ga xipupuri xa Mutsuwuka-gambo.

⁹ Hikwalaho a kugoha ka Jakobe ku ta basiswa; Lowu hi wona mbhanzu wa kutsetselelwa ka xionho xakwe; Laha maribye wontihe ya maganzelo ma panzekile kota maribye ya mhemba, A maAxera ni zifananiso za gambo zi nga ha ta yima. Levi 26:30; Isa. 2:20

¹⁰ Hakuva a muti wu bhiyelweko wu mahile rumbi, Wuakelo gi tsikilweko, gi mahile xiwula; A marole ma gela kona, ma etlela kona, maga maravi ma seleko.

¹¹ Loku maravi ma womile, ma ta tshobyiwa, A vavasati va ta va dzivela nzilo ha wona; Hakuva i tiko gi nga tlharihangiko, Hikwalaho a muvangi wa gona a nga ta gi zwela wusiwana, Ni loyi a nga va wumba a nga ta va mahela tipswalo.

¹² A ka xikhati lexo Jehova i ta kolela mihanzu, Kusukela nzelelweni wa Congo kala congweni wa Gipite, Zonake nwina mu ta vingeretelwa ha munwe-munwe, nwina vana va ka Israeli.

¹³ Masikwini lawo ku ta biwa a punzu wa hombe, Zonake lava va nga wa lahlekile tikweni ga Assiria Ni lava va nga tsutsumele tikweni ga le Gipite, Va tata va ta khizamela Jehova xitsungeni xi basileko le Jerusalema.