Isaya 26 - Tshwa Bible

A lisimu la ka Jehova.

¹ A ka siku lego va ta yimbelela lisimu leli tikweni ga ka Juda: Hi na ni muti wa ntamu; I ta yimisa kuhanyisa a kuva khurisi ni lihlavu.

² Vululani a tinyangwa, kasi ku enghena a vanhu va lulamileko, A vanhu va tsumbekileko.

³ Loyi wa mbilu yi tiyileko u ta mu veka kuruleni, U ta mu nyika kurula hakuva i tsumba wena.

⁴ Tsumbani Jehova kala ku pinzuka, Hakuva Jehova Jehova i ribye ga pinzukelwa. Deut. 32:4; Tis. 18:2

⁵ Hakuva wa tsongahata lava va akako matshanwini ma tlakukileko, I koramisa a muti wu ti tlakusako, Wu reletwa hasi a wu wisa tshurini. Jer. 51:8; Kuv. 14:8; 18:2

⁶ Wu ta kanzihelwa hi mikonzo, Hi mikonzo ni vavumali.

⁷ A ndlela ya loyi a lulamileko nja nongameto, Wena loyi u hunzeleleko ku lulama u basisa a ndlela ya vabasileko.

⁸ Ina, hi ku langutele a ndleleni ya kulamula ka wena, O Jehova; Hi navela a vito ga wena ni xialakanyiso xa wena.

⁹ A muhefemulo wa mina wu ku xuvile ni wusiku, A moya wu nga nzeni ka mina wu hlotisisa wena; Hakuva loku u tsayisa misava kulamuleni ka wena, A vaaki va yona va gonza kululama.

¹⁰ Loku a wa kubiha a rivalelwa, a nga gonzi ku maha kululama, Ni lomu tikweni ga kululama i ta maha kubiha, A nga woni a wukulu ga Jehova.

¹¹ Jehova, a canja ga wena gi na ni ntamu, kanilezi a va zi woni, Va ta wona a kupangama ka wena hi vanhu va wena, vava ni tingana; A nzilo wu ta hisa valala va wena.

¹² Jehova, u ta vanga kurula xikari ka hina, Hakuva a mitiro ya hina yontlhe hi wena u yi mahileko.

¹³ O Jehova, Nungungulu wa hina, Hina hi fumelwe hi tinwani ti hosi a handle ka wena, Hi kota ya wena hi ta dumisa vito ga wena.

¹⁴ Lava va fileko va nga ta ha hanya, Ziruti ntsena, va nga ta ha vuka; Hakuva u va tsayisile, u va lovisa, U fuvisile mavito yabye, ma nga ha alakanyiwi. Deut. 32:26; Joba 14:14

¹⁵ Jehova, u enzelekisile tiko, U enzelekisile tiko, u ti kulisa; U engetele yontlhe mimbhingano ya tiko.

¹⁶ Jehova, va ku langutele kukaratekeni kabye, Laha u nga va tsayisa va lo rilela ka wena.

¹⁷ Khwatsi hi wasati loyi a nga ni rumbu, Loku a chikelelwe hi masiku ya kuhefemula kakwe, Izwa kubayisa, aba huwa kubayisekeni kakwe, Hinawu hi wa hi lezo, O Jehova.

¹⁸ Hi wa hi ni rumbu, hi wa hi ku bayisekeni, Kanilezi hi lo hefemula moya ntsena; A hi hanyisangi tiko, Hambu a vaaki va misava a va ha pswaliwi.

¹⁹ A vafileko va wena va ta tlhela va hanya, A zirumbi za vafi va mina a zi vuke! Vukani mu giya, nwina lava mu etleleko tshurini, Hakuva a nzhokati ya wena i nzhokati ya wuronga, Zonake a misava yi ta tlhela yi humesa a vafileko. Ezek. 37:3

²⁰ Yana, tiko ganga, enghena ti ndlwini ta wena, u ti valela; Fihlala xikhatanyana, kala a zanga yi hunza.

²¹ Hakuva Jehova wata hi le wutshanwini gakwe, A ku ta tsayisa vaaki va misava hi kota ya kugoha kabye; Zonake a misava yi ta funungula a nkhata wu nga ka yona, Yi nga ha fihli a vadelweko va yona. Gen. 4:10; Mik. 1:3; Mat. 23:35