Isaya 18 - Tshwa Bible

A mhaka xungetano ni Etiopia.

¹ He, tiko ga langu ga tipapa, Legi gi nga tlhatuko wa micongo ya Etiopia;

² Legi gi rumelako a mitsukano hi bimbi, Lomo ka zigowolo za tihlanga hehla ka mati. Fambani, nwina mitsukano yo hatlisa, Ka tiko ga vanhu vo leha va ntlhohe, A vanhu vo tshisa kusukela ntumbulukweni wabye kala lezi, A tiko ga ntamu gi kanzihelelako zontlhe, Legi gi tsemakanyilweko hi micongo.

³ Nwina nwentlhe vaaki va matiko, Vanhu vontlhe va misava, Cuwukani loku a nghapa yi tlakuswa hehla ka zitsunga; Ni loku paratana wu biwa, ingisani!

⁴ Hakuva Jehova i nzi byelile, aku: Nzi ta rula, nzi cuwuka na nzi hi lomu ndlwini ya mina, Khwatsi hi mumu wo hisa loku gambo gi cile, Kukotisa a hunguva ya mbhera xikhatini xa ximumu loku ku tshoveliwa.

⁵ Hakuva a mahlweni ka kutshovela, Loku a ziluva zi tlhatlhekile, Ni rari ga mauva na gi kari gi buva, I ta tsema mahluke hi mukwana, A susa ni zimilwa za kona.

⁶ Vontlhe va ta nyikelwa ka makoti ya lomu zitsungeni, Ni ka zivanza za khwati; A makoti ma ta vaga laha ximunwini, Ni zivanza zontlhe za khwati zi ta vaga laha wuxikeni.

⁷ A ka xikhati lexi ku ta nehiwa zinyikiwo ka Jehova wa tiyimpi hi ka tiko ga vanhu vo leha va ntlhohe, a vanhu vo tshisa kusukela ntumbulukweni wabye kala lezi, a tiko ga ntamu gi kanzihelelako zontlhe, legi gi tsemakanyilweko hi micongo; zi ta nehiwa a wutshanwini legi Jehova wa tiyimpi a khozelwako kona, le xitsungeni xa Zioni.