Isaya 13 - Tshwa Bible

Xiprofeto xungetano hi Babuloni.

¹ Xiprofeto hi Babuloni, lexi xi wonisilweko ka Isaya, nʼwana Amozi.

² Yimisani a nghapa hehla ka xitsunga xa libalala, Kanyulukani, va khweneteni hi canja, Kasi va fela ku enghena hi tinyangwa ta vahombe.

³ Nzi leletele a va hlawulekileko va mina, Nzi vitanile a tinhenha ta mina, leʼti tsakelako wukulu ga mina, Lezaku va tira a ntiro wa zanga ya mina.

⁴ A guwa ga zwala zitsungeni khwatsi xidlemo xa hombe; A guwa ga pfilupfilu ya matiko ma tsombeneko; Hi Jehova wa tiyimpi a hlomisako mabutho ya kulwa.

⁵ Va huma tikweni ga le kule, a magemeta-musi ya tilo; Hi Jehova ni matlhari ya zanga yakwe a tako ku ta lovisa tiko gontlhe.

⁶ Huwelelani, hakuva a siku ga Jehova gi tshinele, Gita kota lobyiselelo hi ka Nyamintamo.

⁷ Hikwalaho a mandla wontihe ma rerekile, Tontlhelele timbilu ta vanhu ta nyekiswa.

⁸ Va chava, va khomiwa hi hlenekera ni kuxaniseka, Va tava kubayisekeni kukotisa a wasati loku a lunwa. Va cuwukana hi ku hlamala, a tinghohe tabye tiku khwatsi i nzilo.

⁹ Langutani, a siku ga Jehova gata, Ga hlomulo wa khulo ni zanga yi chavekako; A ku ta hahlula a tiko, Ni ku lovisa vaonhi va nga ka gona.

¹⁰ Hakuva a tinyeleti ta tilo ni mitlhambi ya tona, Zi nga ha ta woningela; A gambo gi ta pfupeliswa kuhumeni ka gona, Ni nweti wu nga ha tava kona. Mat. 24:9; Lu. 21:25; Kuv. 6:12

¹¹ Nzi ta tsayisa misava hi kota ya kubiha ka yona, Ni vakubiha hi kota ya kugoha kabye, Nzi fuvisa a matshanza ya laʼva ti kulisako, Nzi tsongahata laʼva ti kukumukisako.

¹² Nzi ta maha vanhu a kuva va kala ku hunza a nzalama yi hlutilweko, Nzi va maha va vumaleka ku hunza nzalama ya le Ofira.

¹³ Hikwalaho nzi ta tsekatsekisa a tilo, Ni misava yi ta suka wutshanwini ga yona, Hi zanga ya Jehova wa tiyimpi, sikwini lego ga khulo gakwe gi chavisekako.

¹⁴ Va taku khwatsi hi pfundla wu hlongoliswako, Vaku khwatsi hi tiyivu ti nga hiko na muhlayisi, Munwe ni munwani i ta tlhelela ka va ka kabye, Vontlhe va tsutsumela matikweni yabye.

¹⁵ Vontlhe lava va ta nga kamanyetwa va ta tlhabyiwa; Vontlhelele va ta nga khomiwa va ta dawa hi supado.

¹⁶ A zihlangi zabye zi ta pswhandlasiwa mahlweni kabye, A tiyindlu tabye ti ta phangiwa, ni vasati vabye va gohiwa.

¹⁷ Languta, nzi ta va vuxela a maMedi, Lava va nga khataleliko siliva, Hambu ku chela kota hi nzalama.

¹⁸ A mawura yabye ma ta dayetela majaha, Cima va nga ta zwela wusiwana a xihlangi xa hiko nzeni, Ni mahlo yabye ma nga ta nyenyeletela zivanana.

¹⁹ Babuloni, loyi a dzunziwako hi mifumo, A muti lowu a maKaldea ma ti kulisako hi kubombisiwa ka wona, Wu taku khwatsi hi Sodoma ni Gomora laha Nungungulu a nga yi lovisa.

²⁰ Cima gi nga ta ha vuxiwa kambe, Vanhu va nga ta ha aka kona zizukulwaneni zontlhe; Ge hambu a muArabia a nga ta gwimba a tenda gakwe lomo; Ni varisi va nga ta govela kona ni mitlhambi yabye.

²¹ A zihari za xiwula zi ta etlela lomo, A tiyindlu tabye ti ta tala hi zihuluhuhu; Timbuwu ti ta tshama kona, Ni timhongo ti ta khanela lomo. Jer. 50:39; Kuv. 18:2

²² A timhisi ti ta yimba tindlwini ta kona ta wuhosi, Ni mahlolwa lomo ziluvelweni, A xikhati xakwe xi tshinele, ni masiku yakwe ma nga ta hlaya.