Hosea 1 - Tshwa Bible

A muchado wa Hosea.

¹ A mhaka ya Jehova yi tileko ka Hosea a nʼwana Beeri, masikwini ya Uzzia na Jotamu na Ahazi na Hezekia, a tihosi ta ka Juda, ni masikwini ya Jeroboamu nʼwana Joaxi, a hosi ya ka Israeli.

² Laha Jehova a nga ranga a wulawula na Hosea, aku: Famba, uya teka a sati wa wubhayi ni vanana va wubhayi, hakuva a tiko ga maha wubhayi gi fularela Jehova. Vala. 8:33; Ezek. 16:15

³ Zinghaho i lo famba a ya teka Gomera, a nhanyana wa Diblaime; yena i lo xura nyimba a mu belekela a mufana.

⁴ Jehova aku kakwe: Mu chule vito ga Jezreeli, hakuva lokuloku nzi ta photela a nkhata wa Jezreeli ka yindlu ya ka Jehu, nzi mbhetisa a mufumo wa yindlu ya ka Israeli. 1 Tih. 21:1; 2 Tih. 9:8

⁵ A ka siku lego nzi ta tshova a wura ga Israeli mikoveni ya Jezreeli.

⁶ I lo xura nyimba kambe a mu belekela a nhanyana. Jehova aku kakwe: Mu chule a vito ga Lo-ruhama, hakuva nzi nga ha tava ni wuxinji kambe ka yindlu ya ka Israeli, nzi nga ta va tsetselela.

⁷ Kanilezi nzi tava ni wuxinji ka yindlu ya ka Juda, nzi va ponisa ha Jehova a Nungungulu wabye; nzi nga ta va ponisa hi mawura, kutani tisupado ni kulwa, hambu mahaxi ni vakhileli va mahaxi.

⁸ Makunu loku a lumule Lo-ruhama, i lo xura nyimba a beleka mufana.

⁹ Jehova aku kakwe: Mu chule a vito ga Lo-ammi, hakuva nwina a mu vanhu va mina, mina nzi nga tava Nungungulu wa nwina.

¹⁰ Hambulezo a tsengo wa vanana va ka Israeli wu ta fanana ni tsengo wa seke ga bimbi gi nga zi kotiko ku hlayiwa hambu ku pimiwa. Ku ta chikela xikhati xaku lezi va nga byelilwe ku ngalo: A mu vanhu va mina, ku ta wuliwa ka vona lezaku: Mu vana va Nungungulu a hanyako. Gen. 32:12; Rom. 9:25; 1 Ped. 2:10

¹¹ A vana va ka Juda ni vana va ka Israeli va ta tlhangana va ti yimisela hosi yinwe, va huma tikweni, hakuva gi tava ga hombe a siku ga Jezreeli. Joh. 10:16; Efe. 1:22