Habakuka 3 - Tshwa Bible

A mukombelo wa Habakuka.

¹ A mukombelo wa muprofeti Habakuka, wu yimbelelwa zinwe ni zitende.

² Jehova, nzi zwile a mubiko wa wena, nzi wuya nzi chava! Jehova, vuxa a ntiro wa wena xikari ka malembe lawa, A xikari ka malembe lawa u ta wu tivekisa; Alakanya ku hi hawukela zangeni ya wena.

³ Nungungulu wata hi le Temani, Loyi wa ku Basa wata hi le xitsungeni xa Parani. (Sela.) A kungangamela kakwe ku fenengeta a matilo, A misava yi tele hi kudumiswa kakwe. Ekso. 19:16; Deut. 33:2

⁴ A kuhatima kakwe ku fanana ni ka gambo, A miseve ya kuwonekela yata hi canjeni gakwe; Hi kona wu fihlilweko a ntamu wakwe.

⁵ A ntungu wa mu rangela mahlweni, A kufa loku ku hisako ku mu lanza hi lenzhako.

⁶ A yima a pima misava, A cuwuka, a matiko ma rurumela; A zitsunga za kale zi panzeka, A miganga ya kaleloko yi korama; Ti nga tindlela takwe ta kaleloko.

⁷ Nza wona a matenda ya Kuxani na ma hlokiswa, Ku rurumela ni matenda ya tiko ga Midiani.

⁸ Jehova a nga tsanwiswa hi micongo ke? U wa zangarela a micongo ke? Kutani u zangarela a bimbi, Lezi u khilelako a mahaxi ya wena, U famba hi tikareta ta wena ta ku hanyisa?

⁹ A wura ga wena gi le kubaseni; A nkutsu wa wena wu tele hi tigalala. (Sela.) U panzile misava hi micongo.

¹⁰ A zitsunga za ku wona, zi chava; Ku hunza a swinga wa mati. A kueta ku zwata a gezu ga kona, Ku tlakusa a mandla ya kona.

¹¹ A gambo ni hweti zi lo yima matshanwini ya zona, Hi kota ya kuhatima ka tigalala ta wena loku ti hunza, Ni kukwezima ka tlhari ga wena gi hatimako.

¹² U tsemakanya tiko hi zanga, U hula mifumo hi khulo.

¹³ U humela ku ponisa a tiko ga wena, A ku hanyisa loyi a totilweko wa wena; U faya a langwa la yindlu ya vakubiha, U khungumula a yindlu kala xiseketelweni. (Sela.)

¹⁴ Hi tigalala takwe u tlhavile a nduna ya tinhenha takwe, Lava va tako khwatsi xipupuri a ku ta nzi hangalasa, Na va bhuma khwatsi hi loku vaga a zisiwana kufihlaleni.

¹⁵ U famba hehla ka bimbi hi ma haxi ya wena, Hehla ka mabyandlati ya hombe.

¹⁶ Nzi zi zwile, a mbilu ya mina yi rurumela, Hi gezu lego a milomu ya mina yi dzudzumela; Ku enghena kubola marambyini ya mina, na nzi kari nzi rurumela. Nzi yimelwe hi ku rinzela a siku ga khombo, A siku legi a tiko gi ta nga hlaselwa hi valala.

¹⁷ Hambu lezo a kuwu wu to kala wu nga ha hluki, Ge hambu a mivina a ku pswala mihanzu, Ni mihanzu ya maoliva yi nga humi, Ni masimu ma nga humesi zakuga; Hambu loku tiyivu ti vumaleka rangeni, Ni tihomu ti hi hava marangeni,

¹⁸ Hambu zi hi tano, nzi ta tsakela Jehova, Nzi tsakela a Nungungulu wa kuhanyiswa ka mina.

¹⁹ Hosi Jehova hi yena a ntamu wa mina, I ta hunzula a milenge ya mina yi fanana ni ya timhuti, I ta nzi fambisa zitsungeni za mina. 2 Sam. 22:34 A ka muchuli, ku yimbelelwa ka zitende za mina.