Ezra 9 - Tshwa Bible

A xirilo xa Ezra.

¹ Makunu laha zontlhe lezo zi nga wa mahilwe, ku lota ka mina a tihosana ti taku: A vanhu va ka Israeli, ni vapristi, ni vaLevi a va ti hambanyisangi ni vanhu va matiko; kanilezi va maha a manyala ya vona, vaKanani, ni vaHiti, ni vaPerezi, ni vajebusi, ni vaAmoni, ni vaMoabi, ni vaGipite, ni vaAmori.

² Hakuva va tekile a vanhwana vabye, va va tekanisa ni vana vabye, va tlhanganyisa a lixaka la ku basa ni vamatiko; a kuonha loku ku sangulwe hi tihosana ta vanhu ni vafumeli va kona. Ekso. 34:15; Deut. 7:1; Vala. 3:6

³ Makunu laha nzi ngazwa a timhaka leto, nzi lo hanzula a bhaji ga mina, ni tinguwo ta mina, nzi hlurula a misisi ya hloko ya mina, ni xilevu xa mina, nzi tshama lahasi na nzi swirekile.

⁴ Zonake ku lo tsombana ka mina vontlhe va rurumeliswako hi timhaka ta Nungungulu wa ka Israeli, hi kota ya kuonha ka lava va wuyileko hi le wukhumbini. Mina wutsumbu nzi lo tshama lahasi na nzi swirekile kala xikhatini xa muphahlelo wa laha gambyeni.

⁵ Hi xikhati xa muphahlo wa laha gambyeni, nzi lo suka kutikoramiseni ka mina, a bhaji ga mina ni nguwo ya mina na zi hanzulwe, nzi khizama nzi tlakusa a mandla ya mina ka Jehova Nungungulu wa mina,

⁶ nziku: Nungungulu wa mina, nzi na ni tingana ni gome a ku tlakusa a nghohe ya mina ka wena Nungungulu wa mina, hakuva a zigoho za hina zi kulile zi tlakuka hehla ka tihloko ta hina, ni nanzu wa hina wu kulile wu chikela tilweni. Gen. 18:20; Kuv. 18:5

⁷ Kusukela xikhatini xa vadadani va hina ha su simamisa hi maha kubiha ka hombe kala lezi; hi kota ya zionho za hina, ni za tihosi ta hina, ni vapristi va hina, hi nyikelwe lomu mandleni ya tihosi ta matiko, hi xaniswa hi supado, ni wukhumbi, ni kuphangiwa, ni tingana, kota lezi hi nga zona nyamutlha.

⁸ Kanilezi makunu Jehova Nungungulu wa hina, i hi kombisile wunene hi xikhatana lexi lezaku a misalela yo kari yi ponile, a hi nyika a wuchavelo wutshanwini gakwe go basa, kala a Nungungulu wa hina a woninga a mahlo ya hina, a hi humuta lomu wukhumbini ga hina.

⁹ Hakuva hina hakunene hi tikhumbi, kanilezi lomu wukhumbini ga hina Nungungulu wa hina a nga hi tsikangi; kanilezi i lo hi kombisa tipswalo mahlweni ka tihosi ta vaPersia, a hi humuta, lezaku kasi hi aketa a yindlu ya Nungungulu wa hina, yi vuxiwa luswa wutshanwini ga yona, hi nyikiwa a khokhola lomu tikweni ga ka Juda ni Jerusalema.

¹⁰ Nungungulu wa hina, anzhako ka zontlhe lezi hi ta kuyini? Hakuva hi fularele milayo ya wena,

¹¹ leyi u nga hi leletela hi malanza ya wena a vaprofeti, uku: A tiko legi mu yako mu ya enghena ka gona mu gi fumela, i tiko gi nyenyezisilweko hi kubiha ka vamatiko, ni manyala lawa va tatileko ha wona wontihe matlhelo ya gona. Levi 18:25; 20:23

¹² Makunu mu nga nyikeli a vanhanyana va nwina ka vana vabye, hambu ni ku tekela a vafana va nwina a vanhanyana vabye; cima mu nga hloti a kurula ni kuvuvuma kabye; kasi nwina mu fela kuva ni ntamu, muga manone ya tiko, ni ku gi siyela a vana va nwina a tiko legi, a kuva tshomba yabye kala kupinzuka.

¹³ Kota lezi hi humelweko hi makhombo yo tala, hi kota ya zimaho za hina za kubiha, ni milanzu ya hina ya hombe, na hi wona lezaku wena Nungungulu wa hina a ku hi tsayisangi maringano ni kuonha ka hina, kanilezi u hi lonzowotela misalela ya kunghahi,

¹⁴ xana hi wa ta tlhela hi hambunyeta milayo ya wena, hiva ni wuxaka ni vanhu va mahanyela yo biha hi ku tekana navo ke? Xana u nga kala u nga hi zangareli u hi lovisa, u nga ha siyi ni salela munwe wa ku pona ke?

¹⁵ Jehova Nungungulu wa ka Israeli, u lulamile, hakuva hi sele hina lava hi ponileko, kota lezi zi wonekako nyamutlha. Hina hi kwalaha, hi khizamile mahlweni ka wena ni zionho za hina, hakuva a ku na munhu a nga yimako mahlweni ka wena na hi hi ni zakunghahi.