Ezra 6 - Tshwa Bible

¹ Zonake hosi Dariusi i lo leletela lezaku a ku hloliwe lomu ndlwini ya mapapilo ya tihosi ta Babuloni, lomo ku nga wa vekiwa kona titshomba.

² Ku lo kumiwa le Akemeta, mutini wa hosi, tikweni ga Media, a papilo gi nga wa petselwe na gi hi ni timhaka ti tsalilweko ta zikhumbuxeto, ti nge ngalo:

³ Ka lembe go ranga ga kufuma ka Kurusi, hosi Kurusi i lo leletela xungetano ni yindlu ya Nungungulu ya le Jerusalema, lezaku yi aketwa, kasi kuva laho va ta nga nyikela kona a miphahlo; ni xiseketelo xa kona a xi aketwe. A kuleha ka yona ku tava 60 wa mikono, a kuanama ku tava 60 wa mikono.

⁴ A yive ni tixaxa tinharu ta maribye ya hombe, ni lixaxa linwe la timhanze ta tiswa; a mali yo hakela vanhu yi ta huma ndlwini ya hosi, 1 Tih. 6:36

⁵ ni kambe a zibya za nzalama ni za siliva za yindlu ya Nungungulu, lezi Nebukadnezare a nga zi tekile lomu tempeleni ya le Jerusalema a zi neha Babuloni, a zi tlhelele tempeleni ya le Jerusalema wutshanwini ga zona, u ya zi veka lomu ndlwini ya Nungungulu.

⁶ Hikwalaho wena Tatenai, hosi ya le tlhatuko wa congo, na wena Xetarbozenai, ni vanakulobye va Afarsate, va nga tlhatuko wa congo, tshamani kule ni lezo.

⁷ Mu tsika a ntiro wa yindlu ya Nungungulu wu famba mahlweni; ngha a hosi ya va ka Juda ni masingalakati ya kona, va aka a yindlu leyo ya Nungungulu wutshanwini ga yona.

⁸ Ni kambe a xileletelo xa mina xungetano ni lezi mu ta nga zi maha ka masingalakati lawo ya vaJuda, kasi a yindlu leyo ya Nungungulu yi fela ku akiwa hakunene, nzi ngalo: A mali ya nzhuvo wa hosi leyi humako le tlhatuko wa congo, nyikani vavanuna lavo, kasi ku nyikelwa ka ntiro hi fanelo ya kona, kasi va nga hungatelwi.

⁹ Hambu ni lezi zi vumalekako, a tikuzi kutani tihamba, ni tiyivana, za minyikelo ya kuhiswa ya Nungungulu wa le tilweni, hambu a mavele kutani munyu, ni vinya, ni mafura, maringano ni lezi a Vapristi va le Jerusalema va ta nga zi kombela, a va nyikiwe siku ni siku. Mu nga rivali ku maha lezo,

¹⁰ kasi va fela ku nyikela ka Nungungulu wa le tilweni, a miphahlelo ya masema yo nanziha, ni ku kombelela a wutomi ga hosi ni vanana Va yona.

¹¹ Mina nzi leletela, nziku: Loku a mhaka ya mina yi hambunyetwa hi munhu, ngha a mhanze yi susiwa lomu ndlwini yakwe yi kelelwa, zonake a belelwa ka yona; a yindlu yakwe yi hunzulwa yi maha tala hi kota ya lezo.

¹² Ni Nungungulu loyi a vekileko a vito gakwe laho, a wise hasi tontlhe tihosi ni vanhu vontlhe lava va tlakusako a canja kasi ku hunzula a timhaka leti, va gohetele a yindlu leyo ya Nungungulu yi nga le Jerusalema. Mina Dariusi nzi leletele, mahani zalezo!

¹³ Zonake Tatenai a hosi ya le tlhatuko wa congo, na Xetarbozenai, ni vanakulobye, a xikhati va nga wona lezi zi nga wa rumelwe hi hosi Dariusi, va lo hatlisa va maha zalezo.

¹⁴ A masingalakati ya vaJuda va lo aka na va tsakile, na va tiyiswa hi kuprofeta ka muprofeti Hagai na Zakaria nʼwana Ido. Va lo aka va mbheta, khwatsi hi kuleletela ka Nungungulu wa ka Israeli ni kuwula ka Kurusi na Dariusi, na Artaxerxesi a hosi ya le Persia.

¹⁵ A yindlu yi mbhela hi siku ga wunharu ga hweti ya Adara, hi lembe ga wu 6 ga kufuma ka hosi Dariusi.

¹⁶ A va ka Israeli ni vapristi ni vaLevi, ni vanwani lava va nga wuyile hi le wukhumbini, va lo nyikelisisa a yindlu leyo ya Nungungulu hi kutsaka.

¹⁷ A kunyikelisisweni ka yindlu leyo ya Nungungulu va lo tlhava 100 wa tikuzi, ni 200 wa tihamba, ni 400 wa tiyivana, ni 12 wa timhongo ta muphahlelo wa kuonha ka vontlhe va ka Israeli, maringano ni tsengo wa tinyangwa ta va ka Israeli. Mitse. 7:10

¹⁸ Va lo yimisa vapristi mitlaweni yabye, ni vaLevi mitlaweni yabye, a kuva va tira mitiro ya Nungungulu wa le Jerusalema, kota lezi ku tsalilweko bhukwini ga Mosi.

¹⁹ Lava va wuyileko hi le wukhumbini va lo maha a Pasika hi siku ga 14 ga hweti yo sangula.

²⁰ Hakuva a vapristi ni vaLevi va wa ti basisile khatiginwe, vontlhe va wa hlazekile. Va lo tlhavela a Pasika lego vontlhe lava va wuyileko hi le wukhumbini, ni vanakulobye, a vapristi, ni wutsumbu gabye.

²¹ A va ka Israeli lava va wuyileko hi le wukhumbini va loga zinwe ni vontlhe lava va ti hambanyisileko ni manyala ya vanhu va tiko lego, va ta ti tlhanganyisa zinwe navo kasi ku hlota Jehova Nungungulu wa ka Israeli.

²² Va lo maha a mubuzo wa zibaba zi nga hiko na comelo, 7 wa masiku na va tsakile; hakuva Jehova i wa va tsakisile, ni ku kucetela a mbilu ya hosi ya Asiria lezaku yi tiyisa a mandla yabye mitirweni ya yindlu ya Nungungulu wa ka Israeli.