Ezekieli 9 - Tshwa Bible

A lamulelo wa Nungungulu.

¹ Zonake i loba huwa tindleveni ta mina, aku: Tshinelani nwina vatsayisi va muti, munwe ni munwani na hi ni tlhari gakwe gi lovisako canjeni gakwe.

² Languta, ku lota ntlhanu wa vavanuna ni munwe hi tlhelo ga nyangwa ya le hehla, yi ngomamako Nwalungu; a munwe ni munwani na a khomile a mutsayi canjeni gakwe. A munwe wabye i wa ambele a tinguwo ta wukene na hi ni zo tsala ha zona na zi bohilwe laha reveni gakwe. Va lo enghena, va yima kusuhani ni alati ga suku. Ezek. 8:3; Kuv. 15:1, 6

³ A kungangamela ka Nungungulu wa Israeli ku wa sukile laha ka makerubima laha ku nga hi kona, giya nyangweni ya yindlu. Zonake Jehova i lo vitana loyi a nga wa ambele a nguwo ya wukene, loyi a nga hi ni zo tsala ha zona laha reveni gakwe,

⁴ aku ka yena: Famba u ya tsemakanya muti, a xikari ka Jerusalema, u vekela xifungo zimombyeni za vanhu lava va nga ni mahika, va rilako hi kota ya manyalataniso, lawa ma mahiwako, xikari kabye.

⁵ Ni ka vanwani i te ngalo a tindleveni ta mina: Mu lanzeleni, mu tsemakanya xikari ka muti mu hlasela. Ngha mu nga va nyenyeleteli, ne ni ku zwela wusiwana.

⁶ Hihiritani vaku bhi a zikhosana za vavanuna, ni majaha, ni vanhwana, ni zivanana, ni vavasati. Kanilezi mu nga henyi loyi a nga ni xifungo. Sangulani hi le ndlwini ya mina yo basa. Zonake va lo sangula hi zikhosana lezi zi nga hi mahlweni ya yindlu.

⁷ Aku ka vona: Nyenyezisani a yindlu, tatani a tihubye hi zirumbi… Humani! Va lo huma va ya hlasela lomu mutini.

⁸ Laha va nga kari va hlasela, mina na nzi sele nzhako, nzi lowa hi nghohe ya mina, nzi rila, nziku: Ha, Hosi Jehova! u ta lovisa vontlhe vaIsraeli lava va seleko hi ku chulula a zanga ya wena hehla ka Jerusalema ke?

⁹ Aku ka mina: A kugoha ka yindlu ya ka Israeli na Juda ku hunzelele a ku kula. A tiko gi tele hi nkhata, ni muti wu tele hi lunya, hakuva ve ngalo: Jehova i tsikile a tiko, Jehova a nga woni.

¹⁰ Hikwalaho mina nzi nga ta va nyenyeletela, ge hambu ku zwela wusiwana; nzi ta va tlhelisela hi kota ya mitiro yabye.

¹¹ Languta, a munhu loyi a nga ambele a tinguwo ta wukene, a hi ni zo tsala ha zona laha reveni gakwe, i te ngalo: Nzi mahile khwatsi hilezi u nzi leleteleko zona.