Ezekieli 45 - Tshwa Bible

¹ Loku mu avelana a tiko hi ku hlahluva, mu ta maha a munyikelo ka Jehova hi xipanze xa kubasa xa tiko. A kuleha ka gona ku tava 25,000 wa mikono, ni kuanama ka gona ku tava 10,000 wa mikono. Gi tava go basa matlhelweni wontihe ya gona. Jox. 14:1

² Ku tava ni wutshamu ga kubasa ga 500 wa mikono a kuleha ni 500 wa mikono kuanama, wutshamu ga mune wa matlhelo ma ringanako, na gi renzelekelwe hi xipanze xa 50 wa mikono kuanama ka xona.

³ A ka xipanze lexi xa 25,000 wa mikono kuleha ni 10,000 wa mikono a kuanama u ta pima a wutshamu ga kubasa, legi gi basileko nguvu.

⁴ Xipanze xi basileko xa misava; xi ta lumba vapristi lava va tirako wutshanwini ga kubasa, lava va tshinelako ku ta khozela mahlweni ka Jehova. Xi tava wutshamu ga tiyindlu tabye, ni wutshamu gi basileko ga yindlu ya kubasa.

⁵ Ni xipanze xinwani xa 25,000 wa mikono kuleha ni 10,000 wa mikono kuanama xi ta lumba vaLevi, va nga malanza ya yindlu; laho ku tava kona a miti yabye.

⁶ A muti mu ta wu tsemela a xipanze xa 5,000 wa mikono kuanama ni 25,000 wa mikono kuleha, xi gamakana ni xipanze xi nyikilweko ka wutshamu ga kubasa. Xi ta lumba a yindlu yontlhe ya ka Israeli.

⁷ A hosana mu ta yi tsemela a xipanze xa tlhelo ga seno ni ga seniya xa xipanze xa wutshamu ga kubasa ni xipanze xa muti, a xipanze xinwe hi tlhelo ga Mupela-gambo ni xipanze xinwe hi tlhelo ga Mutsuwuka-gambo; a kuleha ku ta ringana ni kuleha ka zipanze za tixaka, ku sukela mbhinganweni wa Mupela-gambo kuya mbhinganweni wa Mutsuwuka-gambo.

⁸ Gi tava tiko ga yona ni xiavelo xa yona lomu ka Israeli. A tihosana ta mina ti nga ta ha tsimbeketa a vanhu va mina, kanilezi ti ta nyika a tiko ka yindlu ya ka Israeli hi kulanzelana ka tixaka tabye.

⁹ Hosi Jehova i ngalo; Nwina tihosana ta ka Israeli, zi ringene! Tsikani tihanyi ni kuphanga, mu maha nongameto ni kululama, mu nga ha hlongoli vanhu va mina tindlwini tabye, ku wula Hosi Jehova. Levi 19:35

¹⁰ Mu tava ni xikalu xi nene, ni efa gi nene, ni bath gi nene.

¹¹ A efa ni bath zi tava mpimo munwe, lezaku a bath gi ta ringana a xipanze xa wukhume xa homeri, a efa na gonawu gi ringana a xipanze xa wukhume xa homeri. A mpimo wa zona wu ta pimiwa hi homeri.

¹² A xekeli gi tava ni 20 wa magera; a mane ya nwina yi tava ni 20 wa maxekeli, 25 wa maxekeli ni 15 wa maxekeli. Ekso. 30:13; Levi 27:25; Mitse. 3:47

¹³ A munyikelo lowu mu ta nga wu nyikela hi lowu: A xipanze xa wuntlhanu ni xinwe xa efa hi homeri ginwe ga tirigo, ni xipanze xa wuntlhanu ni xinwe xa efa hi homeri ginwe ga sevada.

¹⁴ Nwa mafura hi lowu: A xipanze xa wukhume xa bath hi kore ginwe, gi nga khume ga mabath (hakuva homeri ginwe i khume ga mabath).

¹⁵ Ku humesiwa a yivana yinwe ka ntlhambi wa 200 wa tiyivu ta laha mikoveni ya ka Israeli, kasi yiva a munyikelo wa zakuga ni wa kuhiswa ni wa kurula, kasi ku maha a nzhiho wabye, ku wula Hosi Jehova.

¹⁶ A vanhu vontlhe va tiko va ta humesela hosana ya ka Israeli a hlengo lowo.

¹⁷ Ku tava fanelo ya hosana a ku humesa a minyikelo ya kuhiswa, ni ya tinzhoho, ni ya kunwa, lomu mibuzweni ni xikhatini xa kuwoneka ka hweti, ni masiku ya sabado, ni tihlengeletanweni tontlhe ta yindlu ya ka Israeli. Hi yona yi ta nga humesa minyikelo ya kuonha, ni ya tinzhoho, ni ya kuhiswa, ni ya kurula, kasi ku mahela nzhiho a yindlu ya ka Israeli.

¹⁸ Hosi Jehova i ngalo: Hi hweti yo ranga, hi siku go sangula ga hweti, u ta teka a honwana yi nga hiko na vala, u basisa a yindlu ya kubasa.,

¹⁹ A mupristi i ta teka a nkhata wa munyikelo wa kuonha, a tota laha ka timhanze ta tivati ta yindlu, ni lomu ka mune wa magwitsi ya wukanzihelo ga alati, ni laha ka timhanze ta tinyangwa ta hubye ya lomu xikari.

²⁰ U ta maha zalezo hi siku ga wuntlhanu ni mambiri ga hweti, u mahela lava va onhileko hi ku hoheta ni hi kota ya kungativi. Mu ta maha lezo kasi kuva nzhiho wa yindlu.

²¹ Hi hweti yo ranga, hi siku ga 14 ga hweti, mu tava ni pasika, a mubuzo wa ntlhanu wa masiku ni mambiri; mu taga zibaba zi nga comelwangiko. Ekso. 12:18; Mitse. 28:16

²² A siku lego a hosana yi ta humesa a honwana a kuva munyikelo wa kuonha ka yona zinwe ni tiko gontlhe.

²³ A siku ni siku laha mubuzweni lowu wa ntlhanu wa masiku ni mambiri yi ta humesa ntlhanu wa tihonwana ni timbiri ni ntlhanu ni timbiri a tihamba to kala vala a kuva munyikelo wa kuhiswa, zinwe ni mhongo yinwe hi siku ya munyikelo wa kuonha.

²⁴ I ta humesa a munyikelo wa tinzhoho, efa ginwe ka honwana yinwe ni yinwani, ni efa ginwe ka hamba yinwe ni yinwani, ni hini ginwe ga mafura ka efa ginwe ni ginwani.

²⁵ Hi hweti ya wuntlhanu ni timbiri, hi siku ga 15 ga mubuzo, yi ta maha zalezo a ka masiku ya ntlhanu ni mambiri hi tlhelo ga minyikelo ya kuonha, ni ya kuhiswa, ni ya tinzhoho, ni ya mafura.