Ezekieli 42 - Tshwa Bible

¹ Zonake i lo nzi humesa a nzi yisa ka hubye ya lahandle hi tlhelo ga Nwalungu, a nzi enghenisa matsawini lawa ma cuwukeneko ni wutshamu ga xisirelo ngomama ni yindlu hi tlhelo ga Nwalungu.

² Leyi yi nga hi 100 wa mikono a kuleha, ni kuanama ku wa hi 50 wa mikono, ni nyangwa ya kona yi wa hi tlhelweni ga Nwalungu.

³ Ngomama ni 20 wa mikono ya hubye ya lomu xikari ni lilonze la tlhelo ga hubye ya lehandle ku wa hi ni tihubye ti nga wa cuwukene lixaxeni la wunharu la zitezi.

⁴ Le mahlweni ka matsawu ku wa hi ni ndlela yi nga hi ni 10 wa mikono a kuanama, a kuleha ka yona ku wa hi 100 wa mikono, yiya enghena lomu nzeni, a tivati ta kona ti wa ngomama le Nwalungu.

⁵ Makunu a matsawu ya le hehla ma wa hlonganile, hakuva a tigumbagumba ta kona ti wa anamile ku hunza ta lahasi ni leti ta xikari ka yindlu.

⁶ Hakuva a matsawu ma wa akilwe hi zitezi zinharu, na ma nga hi na timhanze to kota ta tihubye. Hikwalaho a matsawu ya le hehla ma wa hlonganile ku hunza ta lahasi ni ta laha xikari.

⁷ A khurisi ga lahandle gi nga wa gamekene ni matsawu hi tlhelo ga hubye ya lahandle, a kuleha ka gona ku wa hi 50 wa mikono.

⁸ Hakuva a kuleha ka matsawu lawa ma cuwukeneko ni hubye ya lahandle ku wa hi 50 wa mikono, kasike le mahlweni ka tempeli ku wa hi 100 wa mikono.

⁹ Lahasi ka matsawu lawa ku wa hi ni nyangwa yi cuwukako tlhelo ga Mutsuwuka-gambo, loku ku enghenwa ka wona hi tlhelo ga hubye ya lahandle.

¹⁰ Lomu xikari ka khurisi ga hubye ya tlhelo ga Mutsuwuka-gambo, ngomama ni wutshamu ga xisirelo, ku wa hi ni matsawu.

¹¹ Le mahlweni ka wona ku wa hi ni ndlela yo fanana ni leyi yi nga hi kona laha ka matsawu ya tlhelo ga Nwalungu, ti wa ringana hi kuleha ni kuanama; a tivati ni tinyangwa ta kona ti wa hi ta mahela ginwe.

¹² Kota lezi ku nga hi ni tivati ta matsawu ya tlhelo ga Dzonga, ku wa hi ni nyangwa laha masangulweni ya ndlela yi nga kusuhani ni khurisi ga tlhelo ga Wuca, loku ku enghenwa ka wona.

¹³ Zonake yena aku ka mina: A matsawu ya tlhelo ga Nwalungu ni ya tlhelo ga Dzonga, lawa ma cuwukeneko ni wutshamu ga xisirelo, matsawu yo basa; hi lomo a vapristi laʼva tirelako Jehova va ta nga gela kona a zilo zi hunzeleleko kubasa; hi lomo va ta nga veka kona a zilo zi hunzeleleko kubasa, a minyikelo ya zakuga, ni minyikelo ya kuonha, ni ya milanzu: mbutshamu gi basileko.

¹⁴ Loku a vapristi va enghenile a hubye ya laha xikari, ngha va nga humi ka yona vaya ka leyi ya lahandle na va nga se ku veka a tinguwo leti va tirako ha tona a wutshanwini legi go basa, va ambala tinwani; zonake va ta zi kota kuya ka wutshamu legi gi nga ni vanhu.

¹⁵ Makunu laha na mhhetile ku pima a yindlu ya laha xikari, i lo nzi humesa hi nyangwa ya tlhelo ga Mutsuwuka-gambo, a yi pima lahandle hi matlhelo wontihe.

¹⁶ I lo pima a khurisi ga tlhelo ga Mutsuwuka-gambo hi lipimo la nhonga, ku wa hi 500 wa mikono hi lipimo la nhonga.

¹⁷ I lo pima kambe a khurisi ga tlhelo ga Nwalungu, ku wa hi 500 wa mikono hi lipimo la nhonga.

¹⁸ I lo pima a khurisi ga tlhelo ga Dzonga, ku wa hi 500 wa mikono hi lipimo la nhonga.

¹⁹ I lo renzeleka aya tlhelo ga Muhlwa-gambo, a ya pima 500 wa mikono hi lipimo la nhonga.

²⁰ I lo pima a wutshamu hi mune wa matlhelo. Gi wa renzelekelwe hi khurisi, a kuleha ka gona ku wa hi 500 wa mikono ni kuanama ku wa hi 500 wa mikono. Gi wa hambanyisa xikari ka lexi xi basileko ni lexi xa nyalidede.