Ezekieli 39 - Tshwa Bible

¹ Wena nʼwana wa munhu, profetela Goge, uku: Hosi Jehova i ngalo: Nzi yimekelene na wena Goge, hosi ya Roxa, Mexeke na Tubale. Ezek. 38:2; Kuv. 20:8

² Nzi ta ku humesa nzi ku nzulanzulisa, nzi ku kanzihisa hi le magemetamusi ya tlhelo ga Nwalungu, nzi ku chiketa zitsungeni za ka Israeli.

³ Nzi ta wutla a wura ga wena canjeni ga wena ga xibhabha, nzi wisa a tigalala ta wena hi lomu canjeni ga wena ga xinene.

⁴ U ta wela zitsungeni za ka Israeli, wena ni mitlawa ya wena yontlhe, ni matiko lawa ma nga zinwe na wena. Nzi ta ku nyikela u giwa hi makoti ya tixakaxaka, ni zivanza za khwati.

⁵ U ta wela livaleni, hakuva nzi wulile lezo, ku wula Hosi Jehova.

⁶ Zonake nzi ta rumela a nzilo le Magoge, ni ka lava va akileko hi kurula le zihlaleni; va ta zi tiva lezaku hi mina Jehova.

⁷ Nzi ta maha a vito ga mina ga kubasa gi tibyiwa xikari ka tiko ga mina Israeli; cima nzi nga ta ha tsika a vito ga mina ga kubasa gi nyenyeziswa kambe. A matiko ma ta zi tiva lezaku hi mina Jehova, Loyi wa ku Basa wa ka Israeli.

⁸ Languta, zata, zi ta maheka, ku wula Hosi Jehova; hi siku gwalegi nzi wulawulileko ha gona.

⁹ Lava va akileko mitini ya ka Israeli va ta huma, va ya maha tihunyi hi matlhari, a zitlhangu ni tingenge, a mawura ni tigalala, a zigomba ni mahubula, va ta dzivela ha zona a nzilo a ntlhanu wa malembe ni mambiri.

¹⁰ Va nga ta lava tihunyi lomu khwatini, hambu ku tsema tisinya lomu khwatini; hakuva va ta dzivela a nzilo hi matlhari. Va ta phanga lava va nga hi vaphangi vabye, va wutlela lava va nga va wutlela, ku wula Hosi Jehova.

¹¹ A siku lego Goge nzi ta mu nyika wutshamu ga xilahla lomu tikweni ga Israeli, wu nga nkova wa vahunzi hi tlhelo ga Mutsuwuka-gambo wa bimbi. Xi ta vala a ndlela ya vahunzi. Lomo ku ta lahlelwa kona Goge ni xidlemo xakwe; wu ta vitanwa ku i Nkova wa Hamoni-goge.

¹² Ku ta hunza a ntlhanu wa tihweti ni timbiri a yindlu ya ka Israeli na yi va lahla kasi ku basisa a tiko. Deut. 21:23

¹³ Vontlhe vanhu va tiko va ta va lahla; ku tava wudzunzo ka vona hi siku lego nzi ta nga dumisiwa ha gona, ku wula Hosi Jehova.

¹⁴ Va ta hlawula a vanhu va ta nga fambafamba lomu tikweni va lahla lava va nga wa hunza, lava va seleko livaleni, kasi ku basisa a tiko. Loku ku mbhelile a tihweti leti ta ntlhanu ni timbiri va ta huma va ya lava.

¹⁵ Laha na va fambafamba lomu tikweni, loku munwe wa vona a wona rambu ga munhu, i ta veka xikombiso kona, kala valahli va ta gi ketela lomu nkoveni wa Hamoni-goge.

¹⁶ Ku ta va kona a muti wu to chuliwa a vito ga Hamona, Va ta gi basisisa lezo a tiko.

¹⁷ Wena nʼwana wa munhu, Hosi Jehova i ngalo: Wulawula ka tinyanyani ta tixaka tontlhe, ni ka zontlhe zihari za khwati, uku: Tsombanani, muta! tsombanani mu ranzela a muphahlo wa mina lowu nzi mu maheleko, wu nga muphahlo wa hombe lomu zitsungeni za ka Israeli, kasi maga a nyama, munwa a nkhata. Isa. 34:6; Kuv. 19:17

¹⁸ Mu taga a nyama ya tinhenha, munwa a nkhata wa tihosana ta misava, ni wa tihamba, ni tiyivana, ni timhuti, ni tinkavi, wontihe a manonanona ya le Baxani.

¹⁹ Mu taga mafura kala mu xura, munwa a nkhata kala mu popiwa laha muphahlweni lowu nzi mu mahelako.

²⁰ Laha mezeni ya mina mu ta xura hi mahaxi yo khilele ni ya tikareta, hi tinhenha ni vanhu vontlhe va yimpi, ku wula Hosi Jehova.

²¹ Nzi ta wonekelisa a wukulu ga mina xikari ka matiko, wontihe matiko ma ta wona a kulamula loku nzi ku mahileko, ni canja ga mina legi nzi va bileko ha gona.

²² Zinghaho a yindlu ya ka Israeli yi ta zi tiva lezaku hi mina Jehova a Nungungulu wabye, kusukela lego siku kuya mahlweni.

²³ A matiko ma ta zi tiva lezaku a yindlu ya ka Israeli yi wa yisilwe wukhumbini hi kota ya kugoha kabye; kota lezi va nga nzi hluwuka, nzi lo va fihlela a nghohe ya mina. Hikwalaho nzi lo va nyikela mandleni ya valala vabye, vontlhe va lo dawa hi supado.

²⁴ Nzi lo maha ka vona maringano ni zivi zabye ni zihambunyeto zabye; nzi lo va fihlela a nghohe ya mina.

²⁵ Hikwalaho Hosi Jehova i ngalo: Makunu nzi ta tlhelisa kambe a tikhumbi ta Jakobe, nzi ta yi mahela wuxinji yontlhe a yindlu ya ka Israeli, nzi ta pangamela a vito ga mina go basa.

²⁶ Va ta rivala a tingana tabye ni zihambunyeto zabye lezi va nzi maheleko, laha va ta nga aka hi kurula tikweni gabye, a ku na munhu a ta nga va dzuxa.

²⁷ Laha nzi ta nga va humesa xikari ka matiko, nzi va tsombanyisa va huma matikweni ya valala vabye nzi ta hlawuleka ha vona kuwoneni ka matiko vontlhe.

²⁸ Va ta zi tiva lezaku hi mina Jehova a Nungungulu wabye, loyi nzi nga va yisile matikweni va hi tikhumbi, nzi tlhela nzi va tsombanyisa lomu tikweni gabye, nzi nga ta siya ni munwe wabye lenzhako,

²⁹ ge hambu ku va fihlela a nghohe ya mina kambe; hakuva nzi chulule a Moya wa mina hehla ka yindlu ya ka Israeli, ku wula Hosi Jehova. Joeli 2:28; Miti. 2:17