Ezekieli 37 - Tshwa Bible

A xiprofeto xa marambu ma womileko.

¹ A canja ga Jehova gi wa hi hehla ka mina, i lo nzi humesa hi Moya wa Jehova, a ya nzi veka lomu xikari ka livala li nga wa tele hi marambu.

² I lo nzi maha nzi ma renzelekela laha kusuhani; languta, ma wa tele lomu livaleni, na ma womile nguvu.

³ Aku ngalo ka mina: Nʼwana wa munhu, a marambu lawa ma nga tlhela ma hanya ke? Mina nzi hlamula, nziku: Hosi Jehova, zi tibyiwa hi wena,

⁴ Aku ka mina: Profeta ka marambu lawa, uku ka wona: Nwina marambu ma womileko, zwanani a gezu ga Jehova!

⁵ Hosi Jehova i ngalo ka marambu lawa: Nzi ta enghenisa a moya ka nwina, mu hanya. Gen. 2:7; Tis. 104:30

⁶ Nzi ta vekela misiha ka nwina, nzi milisa a nyama hehla ka nwina, nzi mu fenengeta hi hlonge, nzi enghenisa moya nzeni ka nwina, mu ta hanya; mu ta zi tiva lezaku hi mina Jehova.

⁷ Nzi lo profeta kota lezi nzi nga wa leletelwe. A xikhati nzi nga wa profeta ku lo zwala a guwa, zalezo ku wa suva ni wugotsogotso, a marambu ma tlhangana ma lungelelana ginwe ka ginwani.

⁸ Nzi lo wona a misiha ka wona, ku mila ni nyama, ni hlonge yi lo ma fenengeta; kanilezi ku wa nga hi na moya nzeni ka wona.

⁹ Zonake aku ka mina: Profeta ka moya, wena nʼwana wa munhu profeta uku ka moya: Hosi Jehova i ngalo: Wena moya, tana hi le matlhelweni ya mune ya misava, u pupuxela hehla ka lava va delweko, kasi va fela ku hanya.

¹⁰ Nzi lo profeta khwatsi hilezi a nga wa nzi leletele, a moya wu lo enghena ka vona, va si hanya, va suka va yima hi milenge yabye, va wa hi yimpi ya tsanza-vahlayi.

¹¹ Zonake aku ka mina: Nʼwana wa munhu, a marambu lawa hi yindlu yontlhe ya ka Israeli. Languta, ve ngalo: A marambu ya hina ma womile, hi mbhelelwe hi kutsumba, hi lovele magumo.

¹² Hikwalaho, profeta, uku ka vona: Hosi Jehova i ngalo: Nzi ta vulula a zilahla za nwina, nzi mu humesa lomu zilahleni za nwina, nwina vanhu va mina; nzi ta mu wuyisa tikweni ga ka Israeli.

¹³ Mu ta zi tiva lezaku hi mina Jehova, laha nzi ta nga vulula a zilahla za nwina, nzi mu humesa lomu zilahleni za nwina, nwina vanhu va mina.

¹⁴ Nzi ta chela a Moya wa mina nzeni ka nwina, mu hanya; nzi mu tlhelisa ka tiko ga nwina venyi; zonake mu ta zi tiva lezaku hi mina Jehova nzi wulileko lezo, nzi wuya nzi zi maha, ku wula Jehova,

A tinhonga timbiri.

¹⁵ A gezu ga Jehova gi lota ka mina kambe, giku:

¹⁶ Wena nʼwana wa munhu, teka a nhonga u tsala ka yona ku: Ya Juda ni vanghana vakwe xikari ka Israeli; zonake teka yinwani nhonga, u tsala ka yona ku: Ya Josefa, i nhonga ya Efraime ni vontlhe a vanghana vakwe xikari ka yindlu ya Israeli.

¹⁷ Zonake tlhavinyeta a tinhonga leto ti maha yinwe, kasi tiva nhonga yinwe canjeni ga wena.

¹⁸ Laha a vana va tiko ga wena va ta nga ku wutisa, vaku: U nga ta hi tlhamusela lezi u wulako hi lezi zilo ke?

¹⁹ U ta va hlamula, uku: Hosi Jehova i ngalo; nzi ta teka a nhonga ya Josefa leyi yi nga canjeni ga Efraime ni tixaka ta ka Israeli a vanghana vakwe, nzi ti tlhanganyisa ni nhonga ya Juda, nzi ti maha nhonga yinwe, ti tava yinwe canjeni ga mina.

²⁰ A tinhonga leti u tsalako ka tona u ta ti khoma canjeni ga wena a mahlweni kabye.

²¹ U ta wula ka vona, uku: Hosi Jehova i ngalo: Langutani, nzi ta humesa, a vanana va ka Israeli lomu matikweni lawa va yileko ka wona, nzi ta va tsombanyisa hi ka matlhelo wontihe, nzi va wuyisa a tikweni gabye,

²² Nzi ta va maha mufumo munwe laha tikweni, hehla ka zitsunga za ka Israeli, vontlhe va ta fumelwa hi hosi yinwe; va nga ha ta kuva matiko mambiri kambe, va nga ha ta avanyiswa hi mifumo mimbiri. Hos. 1:11; Joh. 10:16

²³ Va nga ta ha ti nyenyezisa hi zifananiso zabye, hambu hi manyalataniso yabye, ge hambu hi zihambunyeto zabye. Kanilezi nzi ta va ponisa wuakelweni gabye gontlhe legi va onhileko ka gona, nzi va basisa. Zonake va tava vanhu va mina, mina nziva Nungungulu wabye.

²⁴ A nanza ga mina Davida i tava hosi yabye; vontlhe va tava ni murisi munwe. Va ta lanzela zileletelo za mina, va hlayisa milayo ya mina, va yi maha. Isa. 40:11; Jer. 23:5; Joh. 10:11

²⁵ Va ta aka tikweni legi nzi gi nyikileko Jakobe a nanza ga mina, lomu ku nga wa akile a vakoko va nwina. Va ta aka lomo, vona ni vana vabye, ni vazukulu vabye kala kupinzuka. Davida a nanza ga mina i tava hosi yabye kala kupinzuka.

²⁶ Nzi ta maha navo a xivumelwano xa kurula; xi tava xivumelwano xa simasima. Nzi ta va yimisa kona, nzi va anzisa; a yindlu ya mina yo basa yi tava kona xikari kabye kala kupinzuka. 2 Kro. 6:16; Jer. 31:31

²⁷ Ni wuakelo ga mina gi tava xikari kabye; nzi tava Nungungulu wabye, na vona va tava vanhu va mina. Levi 26:11; 2 Kor. 6:16; Kuv. 21:3

²⁸ A matiko ma ta zi tiya lezaku hi mina Jehova loyi a basisako Israeli, laha a yindlu ya mina yo basa, yi ta ngava xikari kabye kala kupinzuka.