Ezekieli 36 - Tshwa Bible

A kutlheliselwa ka Israeli.

¹ Wena nʼwana wa munhu, profeta ka zitsunga za ka Israeli, uku: Nwina zitsunga za ka Israeli, zwanani a gezu ga Jehova!

² Hosi Jehova i ngalo: Hakuva a nala a teku ka nwina, Ha-ha! niku: A zitsunga lezi za kale zi tlakukileko hi zi fumele makunu.

³ Hikwalaho profeta, uku: Hosi Jehova i ngalo: Hakuva va mu hahlule, va mu mita matlhelo wontihe, kasi mu fela ku fumelwa hi matiko manwani, ni lezi mu nga milonwini yo biha ya vanhu ni ya va mahlevo,

⁴ hikwalaho nwina zitsunga za ka Israeli, zwanani a mhaka ya Hosi Jehova! I wula lezo Hosi Jehova ka zitsunga ni miganga, ka micongo ni minzhelelo, ka marumbi ma mahileko ziwula, ni ka miti yi tsikilweko, leyi yi mahileko muphango ni xihlekiso ka mifumo leyi yi ranzelekeleko.

⁵ Hikwalaho Hosi Jehova i ngalo: Hakunene nzi wulawulile hi kuhisa ka kupangama ka mina nzi vukela a matiko manwani ni gontlhe tiko ga Edome, lava va ti nyikileko a tiko ga mina a kuva va gi fumela hi migiyo ya timbilu tabye, ni xikanya xa mihefemulo, va gi maha muphango wabye.

⁶ Hikwalaho profeta hi tiko ga ka Israeli, u wula ka zitsunga ni miganga, ni ka micongo ni minzhelelo, uku: Hosi Jehova i ngalo: Languta, nzi wulawulile hi kupangama ni zanga ya mina, hakuva mu mahile a xihlekiso xa vamatiko.

⁷ Hikwalaho Hosi Jehova i ngalo: Nzi tlakusile a canja ga mina nzi hlambanya, nziku: Hakunene a matiko lawa ma mu ranzelekeleko ma ta maha zihlekiso na wonawu.

⁸ Kanilezi nwina zitsunga za ka Israeli, mu ta hluka maravi ya nwina, mu pswala mihanzu ka Israeli a tiko ga mina; hakuva vona va laha kusuhani ni ku wuya.

⁹ Hakuva nzi na nwina, nzi ta mu hunzulukela, mu ta rimiwa mu byaliwa timbewu.

¹⁰ Nzi ta anzisa a vanhu hehla ka nwina, a yindlu yontlhe ya ka Israeli. A miti yi ta akiwa, ni marumbi ma ta vuxiwa.

¹¹ Hehla ka nwina nzi ta anzisa a vanhu ni zihari, zi ta anza zi beleka. Mu tava ni vaaki kota kusanguleni, nzi ta maha khwatsi ka nwina ni ku hunza kusanguleni ka nwina; mu ta zi tiva lezaku hi mina Jehova.

¹² Nzi ta rumela vanhu va tshama ka nwina kambe, vona va ka Israeli; va ta ku fumela, u tava tshomba yabye, a kusukela lezi u nga ta ha daya vana vabye.

¹³ Hosi Jehova i ngalo: Lezi va nge ngalo ka wena: Tiko nziwena u mugi wa vanhu, u lovisa vana va tiko;

¹⁴ hikwalaho u nga ha taga vanhu, hambu ku lovisa vana va tiko; ku wula Hosi Jehova.

¹⁵ Nzi nga ta ku tsika uzwa kambe a xiruko xa matiko, hambu ku rwala a nzhukano ya vanhu; u nga ta khunguvanyisa a tiko ga wena kambe, ku wula Hosi Jehova.

¹⁶ A gezu ga Jehova gi lota ka mina, giku:

¹⁷ Nʼwana wa munhu, a xikhatini lexi a va yindlu ya ka Israeli va nga wa akile tikweni gabye, va lo gi nyenyezisa hi hanyela gabye ni zimaho zabye. A hanyela gabye mahlweni ka mina gi wa nyenyezile ku fanana ni wasati loyi a nga xikhatini xakwe xa kutsawukana.

¹⁸ Hilezo nzi lo chulula a zanga ya mina hehla kabye hi kota ya nkhata lowu va wu halatileko lomu tikweni, ni lezi va nga gi nyenyezisile hi zifananiso zabye.

¹⁹ Nzi lo va hangalasa xikari ka matiko, nzi va xwanya le matikweni, nzi va lamula maringano ni hanyela gabye ni zimaho zabye.

²⁰ Loku va chikele matikweni lawa va nga hangalaka ka wona, va lo nyenyezisa a vito ga mina go basa, kala a vanhu va wulawula ha vona, vaku: Lava mbanhu va Jehova, va humile tikweni gakwe. Isa. 52:5; Rom. 2:24

²¹ Kanilezi nzi lo xanisekela a vito ga mina gi basileko, legi a yindlu ya Israeli yi nga gi nyenyezisa xikari ka matiko, lawa va ngaya ka wona.

²² Hikwalaho wula ka yindlu ya ka Israeli, uku: Hosi Jehova i ngalo: A nzi mahi lezi hi kota ya nwina va yindlu ya ka Israeli, kanilezi hi kota ya vito ga mina go basa, legi mu gi nyenyezisileko xikari ka matiko lawa mu yileko ka wona.

²³ Nzi ta basisa a vito ga mina ga hombe, legi gi nyenyezisilweko xikari ka matiko, legi mu gi nyenyezisileko xikari ka wona. A matiko ma ta zi tiva lezaku hi mina Jehova, ku wula Hosi Jehova, laha nzi ta nga basiswa xikari ka nwina a mahlweni kabye.

²⁴ Nzi ta mu humesa lomu xikari ka matiko, nzi mu tsombanyisa hi le matikweni wontihe, nzi mu yisa tikweni ga nwina.

²⁵ Nzi ta mu nwatsekela a mati ma basileko, mu ta basa; nzi ta mu hlaza a chaka ga nwina gontlhe, ni ka zifananiso za nwina zontlhe.

²⁶ Nzi ta mu nyika a mbilu yiswa, nzi mu chela a moya muswa. Nzi ta susa ambilu ya ribye nyameni ya nwina, nzi mu nyika a mbilu ya nyama. Jer. 31:33; 32:39; Maheb. 10:16

²⁷ Nzi ta mu chela a Moya wa mina nzeni ka nwina, nzi mu fambisa zilayelweni za mina, mu ta hlayisa a zileletelo za mina, mu zi maha.

²⁸ Mu ta aka tikweni legi nzi gi nyikileko a vadadani va nwina; mu tava vanhu va mina, mina nzi tava Nungungulu wa nwina.

²⁹ Nzi ta mu ponisa ka kontlhe a ku nga hlazeki ka nwina. Nzi ta vitana a mavele, nzi ma enzelekisa, nzi nga ha vangi a ndlala xikari ka nwina. Hos. 2:21; Joeli 2:21

³⁰ Nzi ta anzisa a mihanzu ya tisinya, ni pfuno wa masimu, kasi mu ngavi na xiruko xikari ka matiko hi kota ya ndlala.

³¹ Zonake mu ta alakanya a tindlela ta nwina to biha, ni zimaho za nwina zo nyenyeza. Mu ta ti swihala hi kota ya kubiha ka nwina ni manyalataniso ya nwina.

³² Zi tiveni lezaku a nzi mahi lezi hi kota ya nwina, ku wula Hosi Jehova. Ngha muva ni tingana, mu kanganyiseka hi kota ya tindlela ta nwina va yindlu ya ka Israeli.

³³ Hosi Jehova i ngalo: Loku nzi mu hlazile ka zontlhe zigoho za nwina, nzi ta maha a miti yiva ni vanhu, a marumbi ma vuxiwa.

³⁴ A tiko legi gi nga hahlulwe gi ta rimiwa, legi gi nga hi xiwula kuwoneni ka vahunzi vontlhe.

³⁵ Va taku: A tiko legi gi nga wa hahlukile, makunu gi fanana ni simu ga Edeni; ni miti leyi yi nga wa hahlulwe yi maha marumbi yi bhiyelwe, yi na ni vanhu.

³⁶ Zonake a matiko lawa ma seleko kusuhani na nwina ma ta zi tiva lezaku hi mina Jehova nzi vuxileko a matshamu ma khungumulweko, nzi byala lezi zi nga hi xiwula; mina Jehova nzi zi wulile, nzi ta zi maha.

³⁷ Hosi Jehova i ngalo: Tlhatakumbiri, nza ha ta labyiwa hi yindlu ya ka Israeli a kuva nzi va mahela zona. Nzi ta enzelekisa a vanhu lezaku va fanana ni mitlhambi.

³⁸ A marumbi ma ta tlhela ma tala hi mitlhambi ya vanhu, a ku fanana ni mitlhambi ya miphahlo, kukotisa a mitlhambi ya tiyivu le Jerusalema xikhatini xa mibuzo ya gona; vona va ta zi tiva lezaku hi mina Jehova.