Ezekieli 33 - Tshwa Bible

A murinzeli.

¹ A gezu ga Jehova gi lota ka mina, giku:

² Nʼwana wa munhu, wulawula ka vanhu va tiko ga wena, uku ka vona: Loku nzi neha a supado hehla ka tiko go kari, loku a vanhu va tiko va hlawula munhu munwe xikari kabye va mu maha murinzeli;

³ loku a xikhati a wonako supado na yita tikweni aba mpunzu, a tlharihisa vanhu:

⁴ zonake ni wihi loyi a zwako a guwa ga mpunzu, a nga gi khatali, loku a supado yi chikela yi mu susa, a nkhata wakwe wu tava hehla ka hloko yakwe.

⁵ I gi zwile a guwa ga mpunzu, a nga gi khataleli; hilezo a nkhata wakwe wu tava hehla kakwe; kasi loku a wa gi khatalele ngha a ponisile a wutomi gakwe.

⁶ Kanilezi loku a murinzeli a wona a supado na yita, a ngabi a mpunzu, a vanhu va nga tharihiswi, kala a supado yi ta chikela yi susa ni wihi munhu xikari kabye, i delwe hi xigoho xakwe, kanilezi a nkhata wakwe wu ta labyiwa mandleni ya murinzeli.

⁷ Zinghaho wena nʼwana wa munhu, nzi ku vekile kota murinzeli wa yindlu ya ka Israeli; hikwalaho zwana a mhaka yi humako nonwini wa mina, u va tlhatlhisa vitweni ga mina.

⁸ Loku nzi wula ka wakubiha, nziku: Wena munhu wa kubiha, u tafa futsi, loku u nga wulawuli u tlharihisa a wakubiha ndleleni yakwe, inaloye wakubiha i tafa hi kota ya xigoho xakwe, kanilezi a nkhata wakwe wu ta labyiwa canjeni ga wena.

⁹ Kasike loku u tlharihisa a wakubiha hi kota ya hanyela gakwe, kanilezi a nga hunzuluki, i tafa hi kota ya xigoho xakwe, kanilezi wena u tava u ponisile a muhefemulo wa wena.

¹⁰ Wena nʼwana wa munhu, wula ka yindlu ya ka Israeli, uku: Nwina mu wula muku: A zihambunyeto za hina ni zionho za hina zi le hehla ka hina, hina ha wonza hi kota ya zona; hi nga hanyisa kuyini ke? Levi 26:39; Ezek. 24:23

¹¹ Wula kabye uku: Nza hlambanya hi kuhanya ka mina, ku wula Hosi Jehova, a nzi xalaliswi hi kufa ka wakubiha; kanilezi nzi xalaliswa hi kuhunzuluka ka wakubiha a ndleleni yakwe a hanya. Hunzulukani, hunzulukani mu suka tindleleni ta nwina to biha! Mu ta lova hikuyini, nwina va yindlu ya ka Israeli?

¹² Wena nʼwana wa munhu, wula ka vanhu va tiko ga wena, uku: A kululama ka a lulamileko ku nga ta mu ponisa hi siku ga kuhambunyeta kakwe. Ni kubiha ka wakubiha ku nga ta mu wisa a siku a hunzulukako a tsika kubiha kakwe; ge hambu loyi a lulamileko a nga zi koti ku hanya hi nongameto wakwe a sikwini ga kuonha kakwe.

¹³ Loku nziku ka loyi a lulamileko; Futsi u ta hanya; loku a tsumba a kululama kakwe a maha kubiha, ni ximahwana xinwe xa kululama kakwe xi nga ta alakanyiwa; kanilezi i ta fela kugoheni kakwe loku a ku mahileko.

¹⁴ Ni kambe, loku nziku ka wakubiha: Futsi u tafa; loku a hunzuluka xionhweni xakwe, a maha lezi zi nga za nayo ni kululama;

¹⁵ loku a wakubiha a tlhelisela a seve ni lexi a xi wutlileko, a famba hi milayo ya kuhanya, a nga mahi kubiha, hizinene i ta hanya, a nga tafa. Ekso. 22:26; Deut. 24:13

¹⁶ A ku na xionho ni xinwe xa lezi a zi mahileko xi ta nga alakanyiwa; i mahile lezi zi nga za nayo ni kululama, hizinene i ta hanya.

¹⁷ Kasike a vana va tiko ga wena ve ngalo: A ndlela ya Hosi a yi lulamangi; kasi lezo hi ndlela yabye yi nga lulamangiko.

¹⁸ Loku a wakululama a hunzuluka kululameni kakwe, a maha kubiha, i ta fela kubiheni loku.

¹⁹ Ni loku a wakubiha a hunzuluka kubiheni kakwe, a maha lezi zi nga za nayo ni kululama, i ta hanya ha kona.

²⁰ Nwina ma haku: A ndlela ya Hosi a yi lulamangi. Nwina va yindlu ya ka Israeli, nzi ta mu lamula nwentlhe, munwe ni munwani hi tindlela takwe. A mahungu ya kuwa ka Jerusalema.

²¹ Hi lembe ga wukhume ni mambiri ga wukhumbi ga hina, hi hweti ya wukhume, hi siku ga 5 ga hweti, a munwe loyi a nga ponile le Jerusalema i lota ka mina, a taku: A muti wu hlulilwe!

²² Makunu a canja ga Jehova gi wa hi hehla ka mina ni gambo, hi mahlweni loyi wo pona na a nga se chikela; kanilezi ni mixo na a nga se ku chikela i lo vulula a nomu wa mina, nzi wa nga ha hi mbeveve kambe.

²³ Zonake a gezu ga Jehova gi lota ka mina, giku:

²⁴ Nʼwana wa munhu, lava va akileko marumbini ya tiko ga ka Israeli ve ngalo: Abrahama i wa hi munwe basi, hambu lezo i loga tshomba ya tiko. Kanilezi hina hi vanyingi, a tiko gi nyikilwe ka hina akuva tshomba.

²⁵ Hikwalaho wulawula ka vona, uku: Hosi Jehova i ngalo: Muga nyama yi nga ni nkhata, mu tlakusela a zifananiso a mahlo ya nwina, mu halata nkhata; mu ta fumela a tiko ke? Gen. 9:4; Levi 19:26; Ezek. 18:6

²⁶ Mu ti tiyiseta hi tisupado ta nwina, mu maha manyalataniso, a munwe ni munwani a nyenyezisa a sati wa muakelane; mu ta fumela a tiko ke?

²⁷ U ta wula ka vona, uku: Hosi Jehova i ngalo: Nza hlambanya hi kuhanya ka mina, hizinene lava va akileko lomu marumbini va ta dawa hi supado, ni loye a nga lomu koveni nzi ta mu nyikela a khadamulwa hi zivanza, ni lava va nga lomu makhokholeni ni lomu timhakweni, va tafa hi ntungu.

²⁸ A tiko nzi ta gi maha marumbi ni xirewukiso, a matshanza ya ntamu wakwe ma ta mbhela. A zitsunga za ka Israeli zi ta hahlulwa, laha kaku ni munhu a nga hunzi hi ka zona.

²⁹ Zonake va ta zi tiva lezaku hi mina Jehova, laha a tiko nzi gi maha marumbi, ni xirewukiso, hi kota ya manyalataniso wontihe lawa va ma mahileko.

³⁰ Kasi loku ku hi wena, nʼwana wa munhu, a vana va tiko ga wena va wulawula ha wena lomu makhurisini ni lomu tinyangweni ta tiyindlu, va wulawula munwe ni munwani ka nakulobye, vaku: Hi ngata, u tazwa a mhaka leyi yi tako hi ka Jehova.

³¹ Vata ka wena kota tolovelo, va tshama mahlweni ka wena kukotisa a vanhu va mina, va ingisela a timhaka ta wena, kanilezi va nga ti mahi. Hi milomu yabye va kombisa liranzo, kanilezi a timbilu tabye ti lanzisela a mabhinzu yabye.

³² Languta, a ka vona u fanana ni loyi a yimbelelako a lisimu la liranzo hi gezu gi tsakisako, loyi a zi tivako a kuba xitende. Hakuva vazwa a timhaka ta wena, kanilezi a va ti mahi.

³³ Laha lezi zi ta nga maheka (hakuva zata), zonake va ta zi tiva lezaku ku wa hi ni muprofeti xikari ka vona.