Ezekieli 31 - Tshwa Bible

¹ Hi lembe ga wukhume ni ginwe, hi hweti ya wunharu, hi siku go sangula ha hweti, a gezu ga Jehova gi lota ka mina, giku:

² Nʼwana wa munhu, wula ka Faro a hosi ya le Gipite, ni ka zidlemo zakwe, uku: U fanana na mani hi wukulu ga wena ke?

³ U wa hi sedare le Lebanoni, a sinya yi sasekileko, Ya maravi yo tlhuma lawa ma nyikako a nzhuti, U wa hi sinya yo tlakuka, a tichoka ta wena ti wa chikela marefini.

⁴ A mati ma lo yi milisa, ni kueta ku yi kulisa, A micongo yi lo khulungela a wutshamu legi yi byalilweko ka gona, Yi bhoxa milonga yo tsakamisa tontlhe tisinya ta khwati.

⁵ Hikwalaho yi wa hi sinya yi nga lehile ku hunza tontlhe tisinya ta khwati, Ni maravi ya yona ma wa anzile ma leha hi kota ya kutala ka mati.

⁶ Tontlhe tinyanyani ta tilo ti wa aka a zisaka za tona maravini ya yona, Zontlhe zihari za khwati zi wa pswala lahasi ka maravi ya yona, Ni matiko wontihe ya hombe ma wa akile a nzhutini wa yona.

⁷ Yi wa sasekile hi kota ya wukulu ga yona ni kuleha ka maravi ya yona, Hakuva a mitsu ya yona yi wa hi lomu matini yo tala.

⁸ A tisedare ta simu ga Nungungulu ti wa nga zi koti kuyi sireta, A misululwani yi wa nga ringani ni maravi ya yona, A tisinya ta xiwulane ti wa nga ringani ni maravi ya yona; Ku wa nga hi na sinya sinwini ga Nungungulu yi nga ringana na yona hi wumbhuri.

⁹ Nzi yi sasekisile hi kutala ka ma ravi ya yona, Lezaku tontlhe tisinya ta Edeni ti nga lomu sinwini ga Nungungulu Ti wa hi ni wukhuxu ha yona.

¹⁰ Hikwalaho Hosi Jehova i ngalo: Hakuva u ti tlakusile hi wukulu, u lehisa a tichoka ta yona xikari ka marefu, u ti kukumukisa hi kota ya kuleha ka yona;

¹¹ nzi ta yi nyikela mandleni ya loyi wa ntamu a ka matiko; i ta tira a ntiro wakwe ka yona, hakuva nzi yi tsikile hi kota ya kubiha ka yona.

¹² A vamatiko, a vanhu vo tshisa, va yi tsemile va yi tsika. A maravi ya yona ma wele lomu zitsungeni ni lomu minzhelelweni yontlhe, ma tshovekela lomu milongeni yontlhe ya tiko. A matiko wontihe ma humele nzhutini wa yona ma yi siya.

¹³ Lomu mahlavini ya yona tontlhe a tinyanyani ta tilo ti ta aka, ni zihari zontlhe za khwati zi ta tshama xikari ka wona.

¹⁴ Ku maheka lezo kasi a tisinya ti nga kusuhani ni mati ti nga ti kukumukisa hi kuleha ka tona, ti nga tlakusi a tichoka ta tona marefini, ge hambu leti ti nwako mati ti kombisa a kuleha ka tona. Hakuva tontlhe ti nyikelwe kufeni, tiya lehasi ka misava, a xikari ka vana va vanhu, zinwe ni lava va relelako nkeleni.

¹⁵ Hosi Jehova i ngalo: A siku lego yi nga relela le Xeole nzi lo maha xirilo. Nzi lo fenengeta a bimbi hi kota ya yona, nzi diva a micongo ya gona, a mamati ya hombe ma lo yima. Nzi lo maha Lebanoni a yi rilela, ni tisinya tontlhe ta tiko ti lo wuna hi kota ya yona.

¹⁶ Nzi lo maha matiko ma rurumela hi guwa ga kuwa ka yona, laha nzi nga yi hoxa Xeole zinwe ni lava va relelako nkeleni. Tontlhe tisinya ta Edeni, leti ti hlawulekileko ta Lebanoni, tontlhe leti ti nwako mati, ti lo chavelela lehasi ka misava.

¹⁷ Na tonawu ti yile Xeole zinwe nayo, a ka lava va delweko hi supado; ina, lava va nga hi woko ga yona, lava va nga wa tshama nzhutini wa yona xikari ka matiko.

¹⁸ U fanana ni yihi hi wumbhuri ni wukulu xikari ka tisinya ta Edeni? hambu zi hi tano, u ta yisiwa hasi ka misava zinwe ni tisinya ta Edeni. U ta etlela xikari ka makhuna, zinwe ni lava va delweko hi supado. Loye hi Faro ni xidlemo xakwe xontlhe, ku wula Hosi Jehova.