Ezekieli 3 - Tshwa Bible

¹ Aku ka mina: Nʼwana wa munhu, gana lezi u zi kumako; gana a bhuku legi, u famba u ya wulawula ka yindlu ya ka Israeli.

² Nzi lo ahlama nomu, i lo nzi gisa a bhuku ga kona.

³ Aku ka mina: Nʼwana wa munhu, gisa a rumbu ga wena, u xurisa marambu ya wena hi bhuku legi nzi ku nyikako. Nzi lo giga; gi wa tsombela nonwini wa mina ku fanana ni wulombe.

⁴ I te ngalo ka mina: Nʼwana wa munhu, famba uya ka yindlu ya ka Israeli, u ya va byela magezu ya mina.

⁵ A nzi ku rami ka vanhu va lirimi u nga li tiviko leli li nga pimekiko, kanilezi ka yindlu ya ka Israeli.

⁶ A ku rumiwi ka matiko yo tala ya lirimi u nga li tiviko, leli li karatako, lava a magezu yabye u nga ma pimiko. Hakunene, loku nzi wa ta ku ruma ka vona, va wa ta ku ingisa.

⁷ Kanilezi a yindlu ya ka Israeli yi nga ta ku ingisa, hakuva a va ranzi ku nzi ingisa; yontlhe a yindlu ya ka Israeli mbanhu va tihloko to nonoha ni timbilu to sihalala.

⁸ Languta, nzi ta nonohisa a nghohe ya wena yi fanana ni tinghohe tabye, nzi nonohisa a ximombo xa wena lezaku xi fanana ni zimombo zabye.

⁹ Ina, nza nonohisa a ximombo xa wena lezaku xi nonoha ku hunza daimani. U nga va chavi, hambu ku rurumela hi tinghohe tabye, hambu lezi va nga va yindlu yi hluwukileko.

¹⁰ I lo engeta aku ka mina: Nʼwana wa munhu, amukela a mbilwini ya wena a magezu wontihe lawa nzi wulako ka wena, u tizwa hi tindleve ta wena.

¹¹ Famba, uya ka lava va khomilweko, a ka vana va tiko ga wena, u ya wulawula navo, u va byela, uku: Hosi Jehova i ngalo; kutani va ta ingisa, kani va nga ingisi.

¹² Zonake a moya wu lo nzi tlakusa, na nzizwa anzhako ka mina a huwa ya xidlemo xa hombe, yiku: A gi dumiswe a wukosi ga Jehova laha wutshanwini gakwe.

¹³ Nzi lozwa a guwa ga tipapa ta zivangwa zi hanyako, khwatsi hilezi ti nga wa khumbana, ni guwa ga maranzani laha mareveni ya zona, ni guwa ga xidlemo xa hombe.

¹⁴ Zonake a moya wu to nzi tlakula, wu nzi susa. Nzi lo famba hi kukarateka na nzi hiseka moyeni wa mina, ni canja ga Jehova gi wa tira hi ntamu hehla ka mina.

Muprofeti a fananiswa ni murinxeli.

¹⁵ Zonake nzi lo chikela ka vona lava va nga hi wukhumbini le Tel-abib, lava va nga wa akile kusuhi ni congo wa Kebare, ni le wugovelweni gabye; nzi lo tshama xikari kabye ntlhanu wa masiku ni mambiri na nzi su kaye hi kuxaniseka.

¹⁶ Na ku hunzile ntlhanu wa masiku ni mambiri, a gezu ga Jehova gi lota ka mina, giku:

¹⁷ Nʼwana wa munhu, nzi ku mahile murinzeli wa yindlu ya ka Israeli. U tazwa a magezu ma humako nonwini wa mina, zonake u ta va tlharihisa vitweni ga mina.

¹⁸ Loku nziku ka wakubiha: U yimelwe hi kufa, wena na u nga mu tlharihisi, ge hambu ku wulawula nchumu kasi ku tlharihisa loye wakubiha ndleleni yakwe yo biha kasi ku mu ponisa; inaloyi wa kubiha i tafa kugoheni kakwe, kanilezi a nkhata wakwe nzi ta wu lava canjeni ga wena.

¹⁹ Kasike loku u tlharihisa loye wa kubiha, na a nga hunzuluki kubiheni kakwe, kutani ku nga humi ndleleni yakwe yo biha, i ta fela kubiheni kakwe, kanilezi wena u tava u ponisile a muhefemulo wa wena.

²⁰ Kambe loku a munhu a lulamileko a huma kululameni kakwe, a maha kubiha, mina nzi ta veka zikhunguvanyiso mahlweni kakwe, afa. Hikuva u nga mu tlharihisangiko i ta fela xionhweni xakwe, ni zimaho zakwe zi lulamileko zi nga ha ta alakanyiwa; kanilezi a nkhata wakwe nzi ta wu lava canjeni ga wena.

²¹ Kasike loku u tlharihisa loyi a lulamileko lezaku a nga onhi, kunene a nga onhi, futsi i ta hanya hakuva i vumele ku kawukiwa; na wena u ponisile muhefemulo wa wena.

²² A canja ga Jehova gi wa hi hehla ka mina, aku ka mina: Suka uya livaleni, nzi ta wulawula na wena laho.

²³ Nzi lo suka nziya livaleni, nzi lo wona laho a kungangamela ka Jehova khwatsi hi lezi nzi nga ku wona laha congweni wa Kebare; nzi lowa hi nghohe ya mina.

²⁴ A moya wu lo enghena ka mina, wu nzi yimisa hi milenge ya mina; wu wulawula na mina wuku: Famba u ya ti valela ndlwini ya wena.

²⁵ Languta, wena nʼwana wa munhu, va ta ku boha hi magota, lezaku u nga tlheli u huma xikari kabye.

²⁶ Nzi ta namarelisa a lirimi la wena malakalakeni ya wena, lezaku u maha mbeveve u tsanzeka ku va kawuka; hakuva vona va hi yindlu yi hluwukileko.

²⁷ Kanilezi loku mina nzi wulawula na wena, nzi ta vulula a nomu wa wena, lezaku u zi kota kuva byela, uku: Hosi Jehova i wula lezi! Zonake loye a ranzako kuzwa ngha a ingisa, ni loye a nga ranziko kuzwa ngha a nga ingisi, hakuva va hi yindlu yi hluwukileko.