Ezekieli 28 - Tshwa Bible

¹ A gezu ga Jehova gi lota ka mina kambe, giku:

² Nʼwana wa munhu, byela a hosana ya Tire, uku: Hosi Jehova i ngalo: Hakuva a mbilu ya wena yi ti tlakusile, u wuya uku: Mina nzi nungungulu, nzi tshamile xitshanwini xa nungungulu xikari ka mabimbi; kasilezo u munhu, a ku nungungulu, hambu lezi u yimisileko a mbilu ya wena ku fanana ni mbilu ya nungungulu. Isa. 31:3; Dan. 5:20; Miti. 12:22

³ Kunene, u tlharihile ku hunza Danieli; a ku na fihlakalo wu fihlilweko ka wena.

⁴ Hi wutlhari ga wena ni kupima ka wena u ti kumele kufuma, u ti vekela a nzalama ni siliva mabakweni ya wena.

⁵ Hi wukulu ga wutlhari ga wena ni mabhinzu ya wena u anzisile a kufuma ka wena; a mbilu ya wena yi ti tlakusile hi kota ya kufuma ka wena.

⁶ Hikwalaho Hosi Jehova i ngalo: Kota lezi u yimisileko a mbilu ya wena ku fanana ni mbilu ya nungungulu,

⁷ hikwalaho nzi ta ku nehela a vamatiko, lava va chavisekako xikari ka matiko. Va ta hlomula a tisupado tabye va onha a wumbhuri ga wutlhari ga wena, va nyenyezisa a kungangamela ka wena.

⁸ Va ta ku relelisa nkeleni, ufa hi fela ga vona lava va tlhabyilweko xikari ka mabimbi.

⁹ Xana u ta wula ka loyi a ta nga ku tlhava, uku: Nzi nungungulu? kasi lezo a ku nungungulu, kanilezi u munhu a canjeni ga loyi a ku khuvazako.

¹⁰ U tafa a fela ga makhuna hi canja ga vamatiko, hakuva hi mina nzi zi wulileko, ku wula Hosi Jehova.

¹¹ A gezu ga Jehova gi lota ka mina, giku:

¹² Nʼwana wa munhu, bela nkosi a hosi ya le Tire, uku ka yona: Hosi Jehova i ngalo: U wa mbhelele, u tele hi wutlhari, u mbhelela hi wumbhuri.

¹³ U wa hi le Edeni, a sinwini ga Nungungulu, u fenengetwa hi maribye ya tsengo, ma nga marubisi, ni topaze, ni daimani, niberile, ni onikisi, ni jasperi, ni safira, ni emeraldi, ni karbunkele, ni nzalama. A ntiro wo maha tingoma ni maxava wu wa hi kona ka wena, a siku lego u nga vangiwa ha gona.

¹⁴ Wena u wa hi kerubima legi gi totilweko gi ungamelako; nzi lo ku yimisa kasi kuva hehla ka xitsunga xa Nungungulu, u fambafamba ka xona xikari ka maribye ma kwezimako. Ekso. 25:20; Isa. 14:13

¹⁵ U wa mbhelele tindleleni ta wena kusukela a siku lego u nga vangiwa, kala ku kumiwa a kubiha xikari ka wena.

¹⁶ Laha u nga kari u maha wukwewu go tala u lo tala hi tihanyi, uwa xionhweni. Hikwalaho nzi ku hlongole xitsungeni xa Nungungulu kota loye a nyenyezileko; nzi ku lovisile lomu xikari ka maribye ma kwezimako, wena kerubima gi ungamelako.

¹⁷ A mbilu ya wena yi wa ti kukumukisa hi kota ya wumbhuri ga wena, u lo lahlekelwa hi wutlhari ga wena hi kota ya kungangamela ka wena. Nzi ku hoxile lahasi, nzi ku veka mahlweni ka tihosi kasi ti fela ku ku wona.

¹⁸ U nyenyezisile a tiyindlu ta wena to basa hi kubiha kunyingi ka mabhinzu ya wena; hikwalaho nzi ku vangele a nzilo xikari ka wena, u hiswa ha wona, u hunzuka a tala ga khuma laha misaveni a mahlweni ka vontlhe lava va ku wonako. Vala. 9:20; Ezek. 19:14

¹⁹ Vontlhe, vamatiko lava va ku tivako va ku dzuka; u mahile lexi xi chavisako, U nga ta ha kuva kona kambe.

A xiprofeto ha Sidoni.

²⁰ A gezu ga Jehova gi lota ka mina, giku:

²¹ Nʼwana wa munhu, hunzuluka u cuwuka Sidoni, u mu profetela, uku:

²² Hosi Jehova i ngalo: Nzi yimekelene na wena Sidoni, nzi ta dumisiwa xikari ka wena; va ta zi tiva lezaku hi mina Jehova laha nzi ta nga mu lamula, nzi ti komba loyi a basileko.

²³ Hakuva nzi ta mu rumela a ntungu ni nkhata maphangweni yakwe; lava va khuvazilweko va tawa xikari kakwe hi supado leyi yi bako hi matlhelo wontihe. Va ta zi tiva lezaku hi mina Jehova.

²⁴ Ku nga ha ta kuva kona a hlehlo gi tlhavako a ka yindlu ya ka Israeli, hambu a muiwa wu bayisako xikari ka lava va yi ranzeleko, va yi kanyisa; va ta zi tiva lezaku hi mina Hosi Jehova.

²⁵ Hosi Jehova i ngalo: Laha nzi ta nga tsombanyisa a yindlu ya ka Israeli hi ka matiko lawa va hangalakileko xikari ka wona, nzi ti komba loyi a basileko xikari ka vona a mahlweni ka vamatiko, zonake va ta aka a tikweni gabye legi nzi nga gi nyika a nanza ga mina Jakobe.

²⁶ Va ta tshamiseka lomo; ina, va ta aka tiyindlu, va byala zivina, va tshama hi kurula, loku nzi tsayisile vontlhe lava va va ranzeleko lava va va xanisako. Va ta zi tiva lezaku hi mina Hosi Jehova.