Ezekieli 24 - Tshwa Bible

A mbita yi viluko,

¹ Hi lembe ga wuntlhanu ni mune, hi hweti ya wukhume, hi siku ga wukhume ga hweti, a gezu ga Jehova gi lota ka mina, giku:

² Nʼwana wa munhu, tsala a vito ga siku legi, hakuva hi siku legi ga nyamutlha a hosi ya Babuloni yi tshinele Jerusalema. 2 Tih. 25:1; Jer. 52:4

³ Wulawula hi mufananiso ka yindlu ya vahluwuki, uku: Hosi Jehova i ngalo: Xungeta a mbita, yi kungete u chela mati.

⁴ Chela a zitluwu za nyama nzeni ka yona, a zitluwu zontlhe zo saseka, a tshambukhulu ni xipanga, u yi tata hi marambu ma nene.

⁵ Teka ni milangwa ya ntlhambi, u chela tihunyi lahasi ka mbita, u yi vilisa nguvu kala a marambu ma buva lomu nzeni ka yona.

⁶ Hikwalaho Hosi Jehova i ngalo: Yowe, a muti lowu wa nkhata, a mbita leyi yi tshutshumbeleko, leyi a kutshutshumbala ka yona ku nga sukiko! Zi tsawule a zitluwu za yona, mu nga zi mahi khwatsi tihlolo.

⁷ Hakuva, a nkhata lowu wu halatilweko ka wona wu kona xikari ka wona, i wu chulule hehla ka ribye ga likwembu, a nga wu chululangi lahasi ni ku wu seletela hi ntshuri; Joba 18:18

⁸ kasi ku vuxa a zanga yi to phota ha wona, nzi chulule a nkhata lowu a wu halatileko hehla ka ribye ga likwembu, kasi wu fela ku kala wu nga seletelwi. Levi 17:13; Deut. 12:16, 24

⁹ Hikwalaho Hosi Jehova i ngalo: Yowe a muti lowu wa nkhata! Minawu nzi ta maha a tsikelo ga hombe.

¹⁰ Vingereta a tihunyi, u hlanganyeta a nzilo, u bhika a nyama khwatsi, tiyisa a muru, u hisa a marambu.

¹¹ Zonake yi kungete laha ka makhala ya nzilo na yi hi phanga, kasi ya fela ku hisa, wuswa a suku wa kona, kasi a chaka ga yona gi ta nyeka, kuswa a kutshutshumbala ka yona.

¹² Yi nzi rerile hi ntiro wa kona, kanilezi a kutshutshumbala ka yona ko tala a ku suki; a kutshutshumbala ka yona ku lomu nzilweni.

¹³ Kota lezi a chaka ga wena gi bihileko nguvu, ni kota lezi nzi nga ku hlaza kanilezi a ku basangi, hikwalaho a chaka ga wena gi nga ta hlaziwa kambe kala loku nzi rengisile a zanga ya mina hehla ka wena.

¹⁴ Mina Jehova nzi wulile; zi ta tatiseka, mina nzi ta zi maha. Nzi nga ta tlhelela nzhako, ge hambu ku nyenyeletela, kutani ku hunzuluka. U ta lamulwa kukotisa a mahanyela ya wena ni zimaho za wena, ku wula Hosi Jehova.

A kufa ka sati wa muprofeti.

¹⁵ A gezu ga Jehova gi lota ka mina, giku:

¹⁶ Nʼwana wa munhu, Languta, hi xitshuketi nzi ta ku tekela lexi xi ranziwako hi mahlo ya wena; kanilezi u nga ta rila, hambu kuba nkosi, ni mihloti ya wena yi nga ta xilila.

¹⁷ Hefemuteka na u miyele, u nga mahi xirilo xa loyi a fileko; boha xihuku xa wena, u ambala zilato mikonzweni, u nga fenerigeti xilevu xa wena, u ngagi xibaba xa xirilo. Levi 10:6; 13:45; 2 Sam. 15:30; Mika 3:7

¹⁸ Nzi lo wulawula ni vanhu ni mixo, a sati wa mina afa ni gambo; hi manziko wa kona nzi lo maha lezi nzi nga wa leletelwe.

¹⁹ A vanhu vaku ka mina: U nga ta hi tlhamusela aku zi wula yini ka hina lezi u zi mahako ke?

²⁰ Nziku kabye: A gezu ga Jehova gi lota ka mina, giku:

²¹ Wulawula ka yindlu ya ka Israeli, uku: Hosi Jehova i ngalo: Langutani, Nzi ta nyenyezisa a yindlu ya mina ya kubasa, ku nga matshanza ya ntamu wa nwina, ni kunavela ka mahlo ya nwina, lezi a moya wa nwina wu zi ranzako; a vafana va nwina ni vanhanyana va nwina lava va mu siyeleko va ta dawa hi supado.

²² Mu ta maha khwatsi hilezi mina nzi zi mahileko: mu nga ta fenengeta a malevu ya nwina, ge hambu a kuga xibaba xa zirilo.

²³ Mu ta tshama mu bohile zihuku tiklokweni ta nwina, ni zilato mikonzweni ya nwina. Mu nga ta rila ge hambu kuba nkosi; kanilezi mu ta jomoloka zigohweni za nwina, mu keta munwe ka munwani.

²⁴ Ezekieli i tava xikombiso ka nwina; zontlhe lezi a zi mahileko nwinawu mu ta zi maha. Loku lezi zilo zi tatiseka hi kona mu ta nga zi tiva lezaku hi mina Hosi Jehova.

²⁵ Wena nʼwana wa munhu, a siku lego nzi ta nga va tekela a khokhola gabye, a litsako la wudumo gabye, ni kunavela ka mahlo yabye ni lezi va ranzako timbilwini tabye, zinwe ni vafana vabye ni vanhanyana vabye,

²⁶ loyi a ponako hi siku lego i ta tsutsumela ka wena a ta ku byela timhaka leti.

²⁷ A sikwini lego a nomu wa wena wu ta vululeka ka yena loyi a ponileko, u wulawula naye, u nga havi mbeveve, Zinghaho u tava xikombiso ka vona; va ta zi tiva lezaku hi mina Jehova.