Ezekieli 21 - Tshwa Bible

¹ A gezu ga Jehova gi lota ka mina, giku:

² Nʼwana wa munhu, hunzuluka, u cuwuka Jerusalema, u kanela ka matshamu ma basileko, u profetela tiko ga ka Israeli,

³ uku ka Israeli: Jehova i ngalo: Languta, nzi ku yimekele, nzi ta hlomula supado ya mina kocelweni wa yona, nzi hihirita a valulamileko ni vakubiha lava va nga ka wena.

⁴ Kota lezi nzi ta nga hihirita a valulamileko ni vakubiha lava va nga ka wena, a supado ya mina yi ta huma kocelweni wa yona, yi vukela vontlhe kusukela Dzongeni kala Nwalungu.

⁵ Zonake vanhu vontlhe va ta zi tiva lezaku mina Jehova nzi hlomule a supado ya mina kocelweni wa yona, yi nga ta ha tlhela kambe.

⁶ Hikwalaho hefemuteka, wena nʼwana wa munhu; u ta hefemuteka hi ku tsemeka-hlana ni kubayiseka mahlweni kabye.

⁷ Ku taku loku vaku ka wena: U hefemutekela yini? wena u taku: Nzi hefemutekela a mahungu lawa ma tako; a timbilu tontlhe ti ta nyekiswa, a mandla wontihe ma mbhela ntamu, a madzolo wontihe ma ta khuvatana. Langutani, ma hata zi ta maheka, ku wula Hosi Jehova.

⁸ A gezu ga Jehova gi lota ka mina, giku:

⁹ Nʼwana wa munhu, profeta uku: Jehova i ngalo: Hi leyo supado, a supado yi lotilwe, kambe yi kutlilwe!

¹⁰ Yi lotelwe ku hlasela, yi kutliwa kasi ya fela ku kwezima. Xana hi nga tsaka ke? A nhonga ya nʼwana wa mina yi kanyisa tontlhe tisinya.

¹¹ I yi humesile kasi ya kutliwa yi khomiwa canjeni; yi kutlilwe ni ku lotiwa kasi ku nyikelwa mandleni ya muhlaseli.

¹² Nʼwana wa munhu, rila u kanyuluka, hakuva yi ta wela hehla ka vanhu va mina, ni hehla ka tontlhe tihosana ta ka Israeli; ti nyikelwe ka supado zinwe ni vanhu va mina; hikwalaho bana tshambukhulu wa wena. Jer. 31:19

¹³ Hakuva ku mahilwe kulamula; ku ta kuyini loku a nhonga leyi yi kanyisako yi mbhetiswa? ku wula Hosi Jehova.

¹⁴ Hikwalaho, wena nʼwana wa munhu, profeta uba mandla ya wena; ngha a supado yi wuyeta kumbiri ni kunharu, i supado yi vangako a timbanga ta kufa, yi hlaselako vahombe yi va ranzela.

¹⁵ Nzi dembile a wutla ga supado ka tontlhe tinyangwa tabye, kasi a timbilu tabye ta nyekiswa, ku enzelekiswa lava va wako. Ha! yi mahilwe ku kwezima, yi dembilwe kasi ku hlasela.

¹⁶ Bana hi ntamu, u tlhava ka ga xinene, hunzuluka u tlhava ka ga xibhabha, ni ka gihi tlhelo u ngomamako kona.

¹⁷ Minawu nzi taba a mandla ya mina, nzi rengisa a khulo ga mina. Mina Jehova nzi zi wulile.

¹⁸ A gezu ga Jehova gi lota ka mina kambe, giku:

¹⁹ Wena nʼwana wa munhu, ti yimisele tindlela timbiri leti ku ta ngata ha tona a supado ya hosi ya Babuloni; hi wumbiri ga tona ti ta huma hi tiko ginwe. Tsala a xikombiso, u xi veka laha mahanzakanyeni ya ndlela yi yako mutini.

²⁰ U ta komba a ndlela leyi supado yi ngaya Rabba ha yona, a mutini wa vana va Amoni, a yinwani yi kongoma Jerusalema, a muti wu bhiyelweko wa ka Juda.

²¹ Hakuva a hosi ya le Babuloni yi yimile laha mahanzakanyeni ya tindlela timbiri, kasi ku vumba; yi chukumisa a tigalala, yi wutisa zifananiso, yi cuwuka lomu ka xivinzi.

²² Canjeni gakwe ga xinene i na ni hlolo yi kombako Jerusalema, lezaku ku vekiwa makina yo bhoxa ligingisi la muti, ku biwa tihuwa kuhlaseleni, lezaku ku yimiswa makina yo bhoxa tinyangwa, ni ku akiwa tinhulu ni makhokhola.

²³ A ka va le Jerusalema ku woneka ku khwatsi kuhlahluva ka mawunwa, ka vona lava va hlambanyileko zifungo. Kanilezi yena wa alakanya a kugoha kabye, lezaku va khomiwa.

²⁴ Hikwalaho Hosi Jehova i ngalo: Kota lezi mu nzi khumbuxetako a kugoha ka nwina, ku vumbululwa a zihambunyeto za nwina, kasi a zionho za nwina za wonekeliswa mitirweni ya nwina yontlhe, kota lezi mu nzi alakanyisako mu ta khomiwa.

²⁵ Na wena loyi u konelweko kufa, hosana yo biha ya ka Israeli, loyi a siku ga wena gi chikelako xikhatini xa kugoha ka magumo,

²⁶ Hosi Jehova i ngalo: Susa xihuku, u susa xidlodlo xa wena; lezi zi nga kona zi ta hunzuluswa. Lezi zi koramileko zi ta tlakuswa, ni lezi za hombe zi ta koramiswa.

²⁷ Nzi ta xi khungumula, nzi khungumula, nzi khungumula; lexi kambe xi nga ta hava kona, kala ku chikela loyi xi lumbako yena, nzi ta mu nyika xona.

²⁸ Wena nʼwana wa munhu, profeta uku: Hosi Jehova wa wulawula xungetano ni vana va ka Amoni, ni xungetano ni xiruko zabye. Wula uku: A supado, a supado yi hlomulwe, yi kutlilwe kasi ku hihirita, kasi ya kwezima.

²⁹ Na va kari va ku wonela miwoniso ya hava, va ku hlahluvela mawunwa, kasi u vekiwa tinhanwini ta laʼvo biha va delweko, lava a siku gabye gi chikelako xikhatini xa kugoha ka magumo.

³⁰ Tlhomeka a supado kocelweni wa yona. Nzi ta ku lamulela wutshanwini legi u vangilweko ka gona, a tikweni legi u pswalelweko ka gona.

³¹ Nzi ta chulula a zanga ya mina hehla ka wena, nzi ta ku pupuxela hi nzilo wa khulo ga mina, nzi ku nyikela mandleni ya vanhu va tihanyi, lava va tlharihileko kuloviseni.

³² Wena u ta maha tihunyi ta nzilo, a nkhata wa wena wu ta khulungela xikari ka tiko; u nga ta ha alakanyiwa kambe, hi mina Jehova nzi zi wulileko.