Ezekieli 20 - Tshwa Bible

A kukausukiwa ni zitsumhiso.

¹ Hi lembe ga wuntlhanu ni mambiri, hi hweti ya wuntlhanu, hi siku ga wukhume ga hweti, a masingalakati yo kari ya ka Israeli ma lota ma ta wutisa Jehova, va tshama mahlweni ka mina.

² A gezu ga Jehova gi lota ka mina, giku:

³ Nʼwana wa munhu, wulawula ka masingalakati ya ka Israeli, uku ka vona: Hosi Jehova i ngalo: Mu tele ku ta nzi wutisa ke? Nza hlambanya hi kuhanya ka mina, a nzi vumeli ku wutisiwa hi nwina, ku wula Hosi Jehova.

⁴ U ta va lamula ke, nʼwana wa munhu, u ta va lamula ke? Va tivise a manyalataniso ya vararu vabye,

⁵ uku ka vona: Hosi Jehova i ngalo: A siku legi nzi nga hlawula ha gona Israeli, nzi lo hlambanya ka pswalo wa yindlu ya ka Jakobe, nzi ti tivekisa kabye lomu tikweni ga Gipite, nziku: Hi mina Jehova a Nungungulu wa nwina. Ekso. 6:8; Deut. 7:6

⁶ A siku lego nzi lo tsumbisa hi ku hlambanya lezaku nzi ta va humesa tikweni ga Gipite nzi va yisa tikweni legi nzi gi hlawuleleko vona, legi gi khulungako a masi ni wulombe, gi sasekileko ku hunza wontihe matiko.

⁷ Nzi te ngalo kabye: A munhu ni munhu a cukumete a manyalataniso ya mahlo yakwe, mu nga ti nyenyezisi hi zifananiso za Gipite, hi mina Jehova a Nungungulu wa nwina.

⁸ Kanilezi va lo nzi hluwuka, va nga vumeli ku nzi ingisa; a munhu ni munhu a nga cukumetangi a manyalataniso ya mahlo yakwe, ge hambu ku tsika a zifananiso za Gipite. Zonake nziku, nzi ta chulula a zanga ya mina hehla kabye, nzi tira hi khulo ga mina kabye lomu tikweni ga Gipite.

⁹ Kanilezi hi kota ya vito ga mina, nzi lo maha lezaku gi nga nyenyeziswi mahlweni ka matiko lawa va nga hi xikari ka wona, lawa nzi nga ti tivekisa mahlweni ka wona, hi ku va humesa tikweni ga le Gipite.

¹⁰ Zinghaho nzi lo va humesa tikweni ga le Gipite, nzi va yisa xiwuleni,

¹¹ Nzi lo va nyika milayo ya mina, nzi va gonzisa a zileletelo za mina, a munhu loyi a zi hlayisako i ta hanya ha zona. Deut. 5:1; Rom. 10:5; Gal. 3:12

¹² Tlhatakumbiri nzi lo va nyika a masabado ya mina, mava xikombiso xikari ka mina na vona, kasi va fela ku zi tiva lezaku hi mina Jehova nzi va basisako.

¹³ Kanilezi a yindlu ya ka Israeli yi lo nzi hluwuka lomu xiwuleni. A va hlayisangi a milayo ya mina, va lo ala a zileletelo za mina, lezi a munhu a ta nga hanya ha zona loku a zi maha; ni masabado ya mina va lo ma nyenyezisa. Zonake mina nziku nzi ta chulula a zanga ya mina hehla ka vona yi va hihirita lomu xiwuleni.

¹⁴ Kanilezi hi kota ya vito ga mina, nzi lo maha lezaku gi nga nyenyeziswi mahlweni ka matiko lawa nzi va humesileko mahlweni ka wona. Mitse. 14:13; Deut. 9:28

¹⁵ Kambe nzi lo va hlambanya lomu xiwuleni lezaku nzi nga ta va yisa tikweni legi nzi va nyikileko, gi khulungako a masi ni wulombe, gi sasekileko ku hunza wontihe matiko. Mitse. 14:21; Deut. 1:34

¹⁶ Hakuva va alile a zileletelo za mina, va nga hlayisi a milayo ya mina, va nyenyezisa a masabado ya mina, hakuva a timbilu tabye ti lanzele a zifananiso zabye.

¹⁷ Ahembalokoke, a tihlo ga mina gi lo va nyenyeletela nzi nga va lovisi, a nzi va hihiritangi lomu xiwuleni.

¹⁸ Nzi te ngalo ka vana vabye lomu xiwuleni; Mu nga fambi hi mikhuwo ya vararu va nwina, mu nga lanzeli mahanyela yabye, ge hambu ku ti nyenyezisa hi zifananiso zabye.

¹⁹ Hi mina Jehova a Nungungulu wa nwina; fambani hi milayo ya mina, mu hlayisa a zileletelo za mina mu zi maha.

²⁰ Hlayisani a masabado ya mina, ma tava a xikombiso xikari ka mina na nwina, kasi ma fela ku zi tiva lezaku hi mina Jehova a Nungungulu wa nwina.

²¹ Kanilezi a vana vabye va lo nzi hluwuka; a va hlayisangi a milayo ya mina, va alile a zileletelo za mina, lezi a munhu a ta nga hanya ha zona loku a zi maha; va lo nyenyezisa a masabado ya mina. Zonake mina nziku nzi ta chulula a zanga ya mina hehla ka vona, nzi tira hi khulo ga mina kabye lomu xiwuleni.

²² Hambu zi hi tano, nzi lo tlhelisa a canja ga mina, hi kota ya vito ga mina nzi lo maha lezaku gi nga nyenyeziswi mahlweni ka matiko lawa nzi va humesileko mahlweni ka wona.

²³ Nzi lo hlambanya ka vona lomu xiwuleni lezaku nzi ta va hangalasa xikari ka vamatiko, nzi va hlongolisa matikweni; Levi 26:39; Deut. 28:64

²⁴ hakuva a va mahangi a zileletelo za mina, kanilezi va alile milayo ya mina, va nyenyezisa a masabado ya mina, ni mahlo yabye ma wa lanzela a zifananiso za vararu vabye.

²⁵ Nzi lo va nyika a milayo yi nga hiko yi nene, ni zileletelo lezi va nga zi kotiko ku hanya ha zona; Miti. 7:42; Rom. 1:24; 2 Tes. 2:10

²⁶ nzi lo va nyenyezisa hi minyikelo yabye, laha va nga hisa hi nzilo wontihe a matewula, lezaku va dzuka va chava, kasi va fela ku zi tiva lezaku hi mina Jehova. 2 Kro. 33:6

²⁷ Hikwalaho, nʼwana wa munhu, wulawula ka yindlu ya ka Israeli, uku ka vona: Hosi Jehova i ngalo: A vararu va nwina va engetele ku nzi rukatela laha va nga nzi hluwuka.

²⁸ Hakuva laha nzi nga va enghenisile a tikweni legi nzi nga hlambanya lezaku nzi ta va nyika gona, a ka xihi xitsunga xo tlakuka va nga xi wona, ni ka tontlhe tisinya to tlhuma va lo mahela ka zona a miphahlo yabye, va nzi zangarisa hi minyikelo yabye; va hisa kambe ni muri wa masema yo nuhela, va chulula kona a minyikelo yabye ya kunwa.

²⁹ Zonake nzi te ka vona: Hi gihi a wutshamu go tlakuka mu yako ka gona ke? A wutshamu lego gi vitanwa Bama ni nyamutlha lezi.

³⁰ Hikwalaho wula ka yindlu ya ka Israeli, uku: Hosi Jehova i ngalo: Xana mu ta ti nyenyezisa hi mikhuwo ya vararu va nwina, na mu lanzela a manyalataniso yabye ke, ku wula Hosi Jehova.

³¹ Laha na mu nyikela a zinyikiwo za nwina, mu hisa a vana va nwina hi nzilo, ma ha ti nyenyezisa hi zifananiso zontlhe za nwina kala nyamutlha. Nzi nga vumela ku wutisiwa hi nwina, va yindlu ya ka Israeli ke? Nza hlambanya hi kuhanya ka mina, a nzi vumeli ku wutisiwa hi nwina, ku wula Hosi Jehova.

³² Lezi nwina mu zi alakanyako zi nga ta maheka, lezi mu nge: Hi ta fanana ni yinwani mifumo ni tixaka ta matiko: hi ta khozela a tisinya ni maribye. Deut. 4:28

³³ Nza hlambanya hi kuhanya ka mina, ku wula Hosi Jehova: nzi ta mu fumela hi canja ga ntamu, ni woko gi nawulutilweko, ni zanga yi chululweko.

³⁴ Nzi ta mu humesa lomu vanhwini, nzi mu tsombanyisa hi le matikweni lawa mu hangalakileko ka wona hi canja ga ntamu, ni woko gi nawulutilweko, ni zanga yi chululweko.

³⁵ Nzi ta mu yisa xiwuleni xa vanhu, nzi ta mu lamula kona na hi cuwukana nghohe ni nghohe.

³⁶ Nzi ta maha na nwina kota lezi nzi nga maha ni vadadani va nwina lomu xiwuleni xa tiko ga Gipite, ku wula Hosi Jehova.

³⁷ Nzi ta mu maha mu hunza hi lahasi ka nhonga, nzi mu tisa xibohweni xa xivumelwano. Levi 27:32

³⁸ Nzi ta phaka xikari ka nwina a vahluwuki ni lava va nzi fularelako, nzi va humesa a tikweni legi va luvelako ka gona; kanilezi va nga ta enghena tikweni ga ka Israeli: mu ta zi tiva lezaku hi mina Jehova.

³⁹ Kasike a ka nwina va yindlu ya ka Israeli, Hosi Jehova i ngalo: Fambani nwentlhelele mu ya khozela zifananiso za nwina. Kanilezi anzhako ka lezo mu ta nzi ingisa, mu nga ha nyenyezisi a vito ga mina hi minyikelo ya nwina ni zifananiso za nwina.

⁴⁰ Hakuva vontlhe va yindlu ya ka Israeli, vontlhe lava va nga lomu tikweni, va ta nzi khozela lomu xitsungeni xa mina xo basa, a xitsunga xo tlakuka xa ka Israeli, ku wula Hosi Jehova. Laho nzi ta va tsakela, nzi amukela kona a minyikelo ya nwina, ni milangelwa ya zinyikiwo za nwina, ni zontlhe lezi mu zi basiselako mina.

⁴¹ Nzi ta mu tsakela loku nzizwa a masema yo nuhela ya miphahlo ya nwina, laha nzi ta nga mu humesa vanhwini, nzi mu tsombanyisa hi ka matiko lawa mu hangalakileko ka wona; nzi ta hlawuleka ha nwina kuwoneni ka vamatiko.

⁴² Mu ta zi tiva lezaku hi mina Jehova, laha nzi ta nga mu wuyiseta tikweni ga ka Israeli, legi nzi nga gi hlambanyela lezaku nzi ta gi nyika a vadadani va nwina.

⁴³ Lomo mu ta alakanya a mahanyela ya nwina, zi zontlhe zimaho za nwina lezi mu nga ti nyenyezisa ha zona; mu ta ti nyenya hi kota ya kontlhe kubiha loku mu ku mahileko.

⁴⁴ Mu ta zi tiva lezaku hi mina Jehova, loku nzi mu mahele lezo hi kota ya vito ga mina, na ku nga hi ku kota ya mahanyela ya nwina yo biha, ni zimaho za nwina zo biha, nwina va yindlu ya ka Israeli, ku wula Hosi Jehova.

A nzilo ni tiyimpi.

⁴⁵ A gezu ga Jehova gi lota ka mina, giku:

⁴⁶ Nʼwana wa munhu, hunzuluka u cuwuka Dzongeni, u kanela a mhaka ya wena tlhelweni ga Dzonga, u profetela a tiko ga makhwati ya le Dzongeni;

⁴⁷ uku ka khwati ga le Dzongeni: Zwana a mhaka ya Jehova; Hosi Jehova i ngalo: Nzi ta dzivela nzilo ka wena, wu ta hisa a tisinya tontlhe to taakama lomo ka wena ni tontlhe ta ku woma. A nhova yi nga ta timiwa: tontlhe tinghohe ti taswa kusukela Dzongeni kala Nwalungu.

⁴⁸ Vontlhe vanhu va ta zi wona lezaku hi mina Jehova nzi wu dziveleko; wu nga ta timiwa.

⁴⁹ Zonake mina nziku: Ha, Hosi Jehova! Va wula ha mina vaku: A hi mukaneli wa mifananiso ke?