Ezekieli 19 - Tshwa Bible

A nkosi hi tihosana ta ka Israeli.

¹ Bela a tihosana ta ka Israeli a nkosi, uku:

² A mamani wa wena i wa hi pswele ga nghonyamo, yi etleleko xikari ka tinghonyamo, Xikari ka zinghalana yi anwisile a zinghalana za yona. Gen. 49:9

³ Yi wundlile a xinghalana xinwe, xi kula xi maha nghala, Yi lo gonza ku khoma pfimba, yi khadamula vanhu. 2 Tih. 23:31; Jer. 22:10

⁴ A ndhuma ya yona yi lo zwakala matikweni, yi phasiwa rinzini ga wona; Va yi boha mukhalo, va yi kokela tikweni ga Gipite.

⁵ Laha a pswele gi nga wona lezaku gi mbhelelwe hi kutsumba, Gi lo teka xinwani xinghalana gi xi kulisa xi maha nghala.

⁶ Yi lo fambafamba xikari ka tinghala kala yi tiyelwa, Yi lo gonza ku khoma pfimba, yi khadamula vanhu.

⁷ Yi lo phanga ziluvelo zabye, yi hahlula miti yabye, Ku rurumela a tiko ni zontlhe zi nga ka gona hi kota ya kudzumadzuma ka yona.

⁸ Zonake a matiko wontihe ma yi ranzeleko ma lo yi vukela, Ma yi vekela maziyo, yi phasiwa lomu rinzini gabye.

⁹ Va lo yi bhoxa mukhalo va yi enghenisa ka xiranga, va yi yisa ka hosi ya Babuloni, Va yi valela makhokholeni, kasi a gezu ga yona gi nga ha zwali zitsungeni za ka Israeli. 2 Tih. 25:6

¹⁰ A mamani wa wena i wa fanana na wena, kukotisa a vina wu byalilweko kusuhi ni mati, Wu pswala nguvu, wu chela tiravi to tala hi kota ya kutala ka mati.

¹¹ Wu wa hi ni tiravi to tiya to ringana a tinhonga ta tihosi, A tsinya ga wona gi wa tlakuka na wu tele hi matluka, Wu woneka kule ni kutala ka maravi ya wona.

¹² Wu lo tsuwulwa hi zanga, wu hoxiwa lahasi, a mheho ya Mutsuwuka-gambo yi lo womisa a mihanzu ya wona, A tiravi ta wona to tiya ti lo tshobyiwa ti wuna, ti hisiwa hi nzilo.

¹³ Makunu wu byelilwe le xiwuleni, Lomu ka sava gi womileko ga tora.

¹⁴ A nzilo wu la su gwava lomu maravini, wu hisa mihanzu, Laha kaku ni ravi go ringana a nhonga ya wuhosi a ga ha hi kona. 2 Kro. 36:11, 19 Lowu hi wona nkosi, va ta nga bela nkosi ha wona.