Ezekieli 14 - Tshwa Bible

A xitsayiso va vakhozeli va zifananiso.

¹ Zonake ku lota ka mina a vokari va masingalakati ya ka Israeli, va ta tshama mahlweni ka mina.

² A gezu ga Jehova gi lota ka mina, giku:

³ Nʼwana wa munhu, a vanhu lava a timbilu tabye va ti nyikele ka zifananiso zabye, va vekile a zikhunguvanyiso mahlweni kabye lexi xi va wisako kubiheni. Nzi nga vumela ku wutisiwa hi vona ke? Isa. 58:2; Ezek. 11:5

⁴ Hikwalaho wulawula ka vona, uku: Hosi Jehova i ngalo: A munhu ni munhu wa ka Israeli loyi a nyikelako a mbilu yakwe ka zifananiso, a veka mahlweni kakwe a zikhunguvanyiso lexi xi mu yisako kubiheni, loku ata ka muprofeti mina Jehova nzi ta mu hlamula kota lezi zi mu faneleko hi kota ya wunyingi ga zifananiso zakwe;

⁵ kasi nza fela ku phasa a yindlu ya ka Israeli hi timbilu tabye, hakuva va nzi fularele hi kota ya zifananiso zabye.

⁶ Hikwalaho wula ka yindlu ya ka Israeli lezaku Hosi Jehova i ngalo: Wuyani, fularelani a zifananiso za nwina, hunzulusani a tinghohe ta nwina, mu tsika a manyalataniso wontihe ya nwina.

⁷ Hakuva munhu ni munhu wa yindlu ya ka Israeli, hambu a muluveli a nga xikari ka Israeli, loyi a ti tsawukanisako na mina, a nyikela mbilu yakwe ka zifananiso, ni ku veka mahlweni kakwe a Zikhunguvanyiso xi mu yisako kubiheni, loku ata ka muprofeti lezaku yena a fela ku mu wutisela mahlweni ka mina, mina Jehova wutsumbu nzi ta mu hlamula. Levi 17:8

⁸ Nzi ta honokela munhu loyi, nzi mu maha ave mahanjalati, kasi a fela kuva xikombiso ni vingu, nzi mu susa xikari ka vanhu va mina; zonake mu ta zi tiva lezaku hi mina Jehova.

⁹ Loku a muprofeti a khohliswa a wula a mhaka yo kari, hi mina Jehova nzi khohlisileko muprofeti loye; nzi ta nawuluta a canja ga mina nzi mu lovisa xikari ka vanhu va mina va ka Israeli. 1 Tih. 22:20; 2 Tos. 2:11

¹⁰ Va ta rwala a tsayiselelo wa kugoha kabye; a kugoha ka muprofeti ku ta ringana ni kugoha ka loyi a yileko ku ya mu wutisa;

¹¹ kasi a yindlu ya ka Israeli yi nga ha ti tsawukanisi na mina, hambu a ku ti nyenyezisa kambe hi zihambunyeto zabye zontlhe. Kanilezi va ta kuva a vanhu va mina, na mina nzi tava Nungungulu wabye, ku wula Hosi Jehova.

¹² A gezu ga Jehova gi lota ka mina, giku:

¹³ Nʼwana wa munhu, loku a tiko gi nzi gohela hi ku hluwuka, nzi nawuluta a canja ga mina hehla ka gona nzi kalisa a kuga ka gona, nzi gi rumela a ndlala, nzi susa ka gona a vanhu ni zihari,

¹⁴ hambu loku a vavanuna lava vanharu, a va Noa na Danieli na Joba, va wa tshamile xikari ka gona, va wa ta ponisa a wutsumbu gabye ntsena hi kululama kabye, ku wula Hosi Jehova.

¹⁵ Loku nzi rumela a zihari zo biha lomu tikweni zi dayetela vanhu, gi sala gi hi xiwula, laha kaku a munhu a nga ha tsemakanyi hi ka gona hi kota ya zihari; Levi 26:22; 2 Tih. 17:25

¹⁶ nza hlambanya hi kuhanya ka mina, ku wula Hosi Jehova, lezaku hambu loku vavanuna lava vanharu va wa hi ka gona, ngha va nga ponisi a varisanyana ni vanhwana; vona wutsumbu va wa ta pona, kanilezi a tiko gi wa ta hahlulwa.

¹⁷ Kutani loku nzi nga neha a supado hehla ka tiko lego, nziku: Supado gi ta tsemakanya a tiko, nzi hihirita vanhu ni zihari;

¹⁸ nza hlambanya hi kuhanya ka mina, ku wula Hosi Jehova, lezaku hambu loku vavanuna lava vanharu va hi ka gona, ngha va nga ponisi a varisanyana ni vanhwana, kanilezi va wa ta ponisa wutsumbu gabye ntsena.

¹⁹ Kutani loku nzi wa ta rumela a ntungu tikweni lego, nzi chulula a zanga ya mina hehla ka gona hi nkhata, kasi ku hihirita vanhu ni zihari; 1 Kro. 21:14

²⁰ nza hlambanya hi kuhanya ka mina, ku wula Hosi Jehova, lezaku hambu loku va Noa na Danieli na Joba va wa hi ka gona, ngha va nga ponisi a nisanyana hambu a nhanyana, va wa ta ponisa a wutsumbu gabye ntsena hi kululama kabye.

²¹ Hakuva Hosi Jehova i ngalo: Nguvunguvu loku nzi rumela hi khati ginwe a mune wa zitsayiso za mina leʼzo biha hehla ka Jerusalema: ku nga supado, ni ndlala, ni zivanza, ni ntungu, a kuva zi hihirita a vanhu ni zihari? 2 Sam. 24:13; Kuv. 6:8

²² Hambulezo ku tava kona a misalela ya varisanyana ni vanhanyana lava va ta nga pona. Langutani, va tata ka nwina, mu ta wona a mahanyela yabye ni zimaho zabye, zonake mu ta chavelelwa mu rivala a khombo legi nzi nga neha hehla ka Jerusalema, zi nga zontlhe lezi nzi mu neheleko zona.

²³ Va ta mu tangalisa loku mu wona a mahanyela yabye ni zimaho zabye; mu ta zi tiva lezaku zontlhe lezi nzi nga zi maha a nzi lo halahala nzi zi maha, ku wula Hosi Jehova.