Ezekieli 11 - Tshwa Bible

A masungukati yo biha.

¹ A moya wu lo nzi tlakusa wu nzi yisa nyangweni ya tlhelo ga Mutsuwuka-gambo ya yindlu ya Jehova, leyi yi cuwukako Mutsuwuka-gambo. Nzi lo wona 25 wa vavanuna na va yimile laha nyangweni; xikari kabye nzi lo wona Jaazania nʼwana Azzura, na Pelatia nʼwana Benaia, va nga tihosana ta tiko.

² Jehova aku ka mina: Nʼwana wa munhu, hi vona vatsemi va xikungo xo biha, lava va nyikako wusungukati ga hava mutini lowu,

³ vaku: Makunu a hi xikhati xo aka tiyindlu. Lowu muti i mbita, hina hi nyama.

⁴ Hikwalaho profeta ha vona! Nʼwana wa munhu, profeta!

⁵ Zonake a Moya wa Jehova wu lo wela hehla ka mina, wuku: Wula, uku: Jehova i ngalo: Mu wula lezo, nwina va yindlu ya ka Israeli; mina nza ma tiva a maalakanyo ya timbilu ta nwina.

⁶ Nwina mu anzisile lava va delweko mutini lowu, mu tatile a maphango ya wona hi zirumbi.

⁷ Hikwalaho Hosi Jehova i ngalo: Lava mu nga va daya xikari ka wona, hi yona nyama, a muti hi mbita ya kona; kanilezi nwina nzi ta mu humesa xikari ka wona.

⁸ Mu chava a supado, nzi ta neha supado hehla ka nwina, ku wula Hosi Jehova.

⁹ Nzi ta mu humesa xikari ka muti, nzi mu nyikela mandleni ya vamatiko, nzi wuya nzi mu lamula.

¹⁰ Mu ta dawa hi supado; nzi ta mu lamula mbhinganweni wa tiko ga Israeli; mu ta zi tiva lezaku nzi mina Jehova.

¹¹ A muti lowu wu nga ta kuva a mbita ka nwina, ge hambu nwina a kuva nyama xikari ka wona. Nzi ta mu lamula mbhinganweni wa tiko ga ka Israeli.

¹² Zonake mu ta zi tiva lezaku nzi mina Jehova, nwina lava mu nga hlayisangiko a zilayelo za mina ni milayo ya mina, kanilezi mu lanzele a milayo ya matiko lawa ma mu ranzeleko.

A zitsumhiso xa kutlheliselwa.

¹³ Laha nzi nga wa profeta, Pelatia nʼwana Benaia i lofa. Zonake nzi lowa hi nghohe nziba huwa hi gezu ga hombe, nziku: Hosi Jehova! u ta lovisa bhi a misalela ya ka Israeli ke? Isa. 10:20; Ezek. 9:8

¹⁴ A gezu ga Jehova gi lota ka mina, giku:

¹⁵ Nʼwana wa munhu, a vanakuloni, ina vanakuloni, a maxaka ya wena ni vontlhe va yindlu ya ka Israeli, vontlhe lava a vaaki va Jerusalema va teku kabye: Tshamani kule na Jehova, hi nyikilwe a tiko legi a ku gi fumela.

¹⁶ Hikwalaho wula uku: Hosi Jehova i ngalo: Hambu lezi nzi va hangalasileko xikari ka vamatiko, nzi va yisa ka matiko manwani, nzi tava wuchavelo gabye a xikhatanyana lomu ka matiko lawa va yileko ka wona.

¹⁷ Hikwalaho u taku: Hosi Jehova i ngalo: Nzi ta mu hlengeletela hi ka matiko lawa mu nga hangalaswa ka wona, nzi ta mu nyika a tiko ga ka Israeli.

¹⁸ Va ta wuya ka gona, va susa zontlhe a zilo zi nyenyezileko ni wontihe a manyalataniso ya gona.

¹⁹ Nzi ta va nyika a mbilu yinwe, nzi chela a moya muswa nzeni ka vona; nzi ta susa a mbilu ya ribye mirini wabye, nzi va nyika a mbilu ya nyama, Jer. 32:39; Zef. 3:9; Miti. 4:32

²⁰ kasi va fela ku hlayisa a zilayelo za mina, va gonga a zileletelo za mina, va zi maha. Va ta kuva vanhu va mina, mina nziva Nungungulu wabye. Ekso. 6:7; Deut. 30:9; Jer. 7:23

²¹ Kanilezi lava a timbilu tabye ti Tanzako a zilo zabye zo nyenyeza ni manyalataniso yabye, nzi ta va tlhelisela a mitiro yabye tihlokweni tabye, ku wula Hosi Jehova.

²² Zonake a makerubima ma lo tlakusa a tipapa ta wona, a maranzani na ma lanzela mareveni ya wona, ni kungangamela ka Nungungulu wa ka Israeli ku hi hehla ka wona.

²³ Ni kungangamela ka Jehova ku lo suka xikari ka muti, ku ya yima hehla ka xitsunga lexi xi nga tlhelo ga Mutsuwuka-gambo wa muti.

²⁴ A moya wu lo nzi tlakula wu nzi yisa Kaldea hi muwoniso wa Moya wa Nungungulu, a ka lava va nga hi wukhumbini. Zonake a muwoniso lowu nzi nga wu wona wu lo suka mahlweni ka mina.

²⁵ Zonake nzi lo hlawutela ka lava va nga hi wukhumbini zontlhe lezi Jehova a nga nzi kombile.