Estere 8 - Tshwa Bible

A vaJuda va vumeliwa ku tivikela.

¹ A siku lego hosi Ahasuerusi i lo nyikela a yindlu ya Hamani, a nala wa vaJuda, ka muzinza Estere. Mordekai i lota mahlweni ka hosi, hakuva Estere i wa tlhamusele makunu a wuxaka gakwe naye.

² A hosi yi lo susa a phera ya yona, leyi a nga yi tekile ka Hamani, a yi nyikela ka Mordekai. Estere i lo yimisa Mordekai kuva nwinyi wa yindlu ya Hamani.

³ I lo simama ku wulawula ka hosi, a ti wisa mikonzweni yakwe, a mu khongotela na rila, lezaku xi nga ha maheki a xikungo lexi Hamani a muAgage a nga wa xi bohele vaJuda.

⁴ Zonake a hosi yi lo tlakusela Estere a nhonga ya nzalama ya wuhosi. Zinghaho Estere i lo suka a yima mahlweni ka hosi;

⁵ aku ka yona: Loku a hosi yi vumela, ni loku yi xalala ha mina, zi kumeka na zi lulamile mahlweni ka hosi, nzi hi loyi hakunene nzi tsakisako ka hosi, ngha ku humeswa a mutsalo wo vinya a xikungo xa Hamani nʼwana Hamedata, a muAgage, lexi a nga wa xi tsalile kasi ku lovisa vaJuda lava va nga matikweni wontihe ya hosi.

⁶ Hakuva nzi ta tiyisa kuyini a ku wona a kubiha loku ku ta nga wela va ka hina? Nzi ta tiyisa kuyini ku wona kulobyiswa ka maxaka ya mina?

⁷ Zonake hosi Ahasuerusi aku ka muzinza Estere na Mordekai a muJuda: Langutani, nzi nyikele a yindlu ya Hamani ka Estere, yena wutsumbu i hayekilwe mhanzeni hi lezi a nga tlhateka mandla yakwe hehla ka vaJuda.

⁸ Nwinawu kambe tsalelani vaJuda hi vito ga mina ni zihi lezi mu zi ranzako, mu veka xifungo xa hosi mutsalweni lowo; hakuva ni wihi mutsalo wu tsalilweko vitweni ga hosi wu tiyiswa hi xifungo xa hosi, a nga kona a nga wu hunzulako. Dan. 6:8, 15, 17

⁹ Zonake a vamatsalani va hosi va lo vitanwa zalezo, hi hweti ya wunharu, yi nga Sivani, hi siku ga 23, va ta tsala khwatsi hi lezi Mordekai a nga xuva a kuva zi leletelwa ka vaJuda, ni ka tinduna, ni vafumeli ni tihosana ta matiko kusukela India kala Etiopia, 127 wa matiko, a ginwe ni ginwani hi matsaiela ya gona, ni ka lixaka linwe ni linwani hi lirimi la lona; ni ka vaJuda hi matsaiela yabye ni lirimi labye.

¹⁰ I lo zi tsala vitweni ga hosi Ahasuerusi a zi tiyisa hi xifungo xa hosi, a mitsukano yi hangalasa mapapilo lawo hi mahaxi ya hosi ya tsutsumela ga nwacima, ma nga belekiwa ziteveleni za hosi.

¹¹ A mapapilo lawo ma wa rumelwa hi hosi ka vaJuda ka muti ni muti kasi va vumelwa ku tsombana va ti vikela wutomi gabye, ni kulwa, hambu ku daya a vanhu lava va ta nga va vukela lomu tikweni lego, a vanana ni vavasati vabye, va teka muphango,

¹² hi siku ginwe ka wontihe matiko ya hosi Ahasuerusi, gi nga siku ga 13 ga hweti ya wu 12, yi nga hweti ya Adare.

¹³ A tiko ginwe ni ginwani gi lo rumelwa a papilo ga mutsalo wa nayo kasi wu fela ku huwelelwa ka tixaka tontlhe ta vanhu, ni ku kasi a vaJuda va fela ku ti longisela ku vikela wutsumbu gabye ka valala vabye.

¹⁴ Zinghaho a mitsukano leyi yi khileleko mahaxi yo tsutsuma nguvu ya hosi yi lo huma hi kutsutsuma, na yi hatlisiswa hi kuleletela ka hosi. Ni le Xuxani a zinzeni ku lo biwa nyiwo leyo.

¹⁵ Mordekai i lo Suka mahlweni ka hosi na ambele a tinguwo ta wukosi ta wukuxe ni to basa, na hi ni xidlodlo xa hombe xa nzalama, ni bhaji go saseka go mahiwa hi wukene go zirila. A muti wa Xuxani wu lo kanyuluka hi kutsaka.

¹⁶ A vaJuda va lo tshama kuwonekeleni hi kutsaka ni wudzunzo.

¹⁷ Matikweni wontihe, ka muti ni muti lowu a mhaka ni zileletelo za hosi zi chikelako, a vaJuda va wa tsaka va maha mubuzo ka siku lego. Vanhu vanyingi va matiko lawo va lo ti maha vaJuda, hakuva a vaJuda va wa mahelwa xichavo xa hombe.