Estere 4 - Tshwa Bible

A kuxaniseka ka vaJuda ni kulaya ka Estere.

¹ Makunu laha Mordekai a ngazwa zontlhe lezi zi nga wa mahilwe, i lo hanzula a tinguwo takwe, a ambala a tinguwo ta xirilo, a huma aya laha xikari ka muti a ya rila hi gezu ga hombe a tsikwila;

² a kala a chikela ni laha nyangweni ya hosi, hakuva a munhu loyi a ambeleko a tinguwo ta xirilo i wa nga vumelwi ku enghena nyangweni ya hosi.

³ Matikweni wontihe, ni kwihi laha a nyiwo yi nga biwa hi nayo wa hosi, ku lo mahiwa zirilo xikari ka vaJuda, va yila, va rila, va tsikwila; vanyingi va lo ambala tinguwo ta xirilo va ti tlhatlhatela khuma.

⁴ A vanhanyana va Estere ni mithenwa yakwe va lo ta mu tivisa; a muzinza i lo tlhaveka nguvu, a rumela a nguwo ka Mordekai kasi a fela ku tlhatlha a zilenda. Kanilezi a nga yi amukelangi.

⁵ Zonake Estere i lo vitanisa Hataki, a munwe wa mithenwa ya hosi, loyi a nga wa yimisilwe kuva muyimeleteli wa muzinza, a ta mu ruma ku ya wutisa Mordekai, lezaku mahungu muni, za kuyini zi humeleleko.

⁶ Zinghaho Hataki i lo huma aya ka Mordekai laha tsenzeleni wa muti, wu nga hi le mahlweni ka nyangwa ya hosi.

⁷ Mordekai i lo hlawutela zontlhe lezi zi nga wa mu humelele, ni tsengo wa mali leyi Hamani a nga tsumbisile ku chela lomu mabakweni ya hosi, kasi ku xava vaJuda a va lovisa.

⁸ Ni kambe i lo mu nyika a papilo ga mutsalo wa nayo lowu wu nga humele le Xuxani kasi ku va lovisa, a ya komba Estere ni ku mu tlhamusela; ni ku mu kombela lezaku aya ka hosi a ya yi khongotela, a kombela lezaku a va ka kabye va pona.

⁹ Hataki i lo wuya a ta hlawutela Estere tontlhe timhaka ta Mordekai.

¹⁰ Zonake Estere i lo wulawula na Hataki, a mu ruma ku yisa mhaka ka Mordekai, a yaku:

¹¹ A malanza wontihe ya hosi, ni vanhu va matiko ya hosi, va zi tiva lezaku ni wihi munhu, a wanuna kutani ngwasati, loku aya ka hosi lomu hubyeni ya le xikari, na a nga vitanwangi, i yimiselwe nayo munwe, lezaku afa; ahandle ka loku a hosi yi mu tlakusela a nhonga ya nzalama ya wuhosi, kasi a fela ku hanya. Kanilezi ku hunzile a 30 wa masiku na nzi nga se ku vitanwa nziya ka hosi.

¹² Va lo ya hlawutela Mordekai a timhaka ta Estere.

¹³ Zonake Mordekai i lo va kombela ku tlhelisa a hlamulo ka Estere, waku: U nga alakanyi lezaku wena u ta pona, hambu loku u hi ndlwini ya hosi a ku hunza vaJuda vontlhe.

¹⁴ Hakuva hambu loku wena u miyela xikhatini lexo, a kuponiswa ka vaJuda ku tata hi ginwani wutshamu, kanilezi wena ni ngango wa raru wa wena, mu ta lova. Kona zi tibyiwa himani a ku kutani u tile laha wukosini hi kota ya mhaka leyi ke?

¹⁵ Zonake Estere i lo va ruma ku tlhelisa a hlamulo ka Mordekai, aku:

¹⁶ Famba u ya tsombanyisa vontlhe vaJuda lava va nga le Xuxani mu nzi yilela, mu heta masiku manharu na mu ngagi ge hambu kunwa wusiku ni mumu. Minawu ni vanhanyana hi ta maha lezo, zonake nzi taya ka hosi, hambu lezi wu nga hiko nayo; loku nzifa, a nzife.

¹⁷ Zinghaho Mordekai i lo suka a ti fambela, a ya maha zontlhe lezi a nga wa leletelwe hi Estere.