Eksodusi 6 - Tshwa Bible

¹ Jehova aku ka Mosi: Makunu u ta zi wona lezi nzi ta nga maha ka Faro; hakuva hi kota ya canja ga mina ga ntamu, yena i ta va tsika va famba; hi canja ga mina ga ntamu, yena i ta va hlongola tikweni gakwe.

² Nungungulu i lo engeta a wulawula ka Mosi aku: Hi mina Jehova.

³ Nzi ti wonekelisile ka Abrahama, ni ka Isaka, ni ka Jakobe, na nzi hi Nungungulu wa Ntamu-wontlhe, kanilezi a vito ga mina ga Jehova gi wa nga tiveki ka vona.

⁴ Mina nzi yimisile a xivumelwano xa mina zinwe na vona xa kuva nzi va nyika a tiko ga Kanani, a tiko legi va nga wa luvele ka gona.

⁵ Nzi zwile kurila ka vanana va ka Israeli, hi wukhumbi legi a vaGipite va mahako; makunu nzi alakanyile a xivumelwano xa mina.

⁶ Hikwalaho va byele a vanana va ka Israeli uku: Hi mina Jehova, nzi ta mu rula a nzhwalo wa vaGipite; nzi ta mu lwela; nzi ta mu tlhatlha wukhumbini gabye, nzi mu hletela hi canja ga ntamu, ni kuphota ka hombe.

⁷ Mina nzi ta mu teka muva vanhu va mina, mina nziva Nungungulu wa nwina, loyi a mu tlhatlhisileko ka mikhinyavezo ya vaGipite;

⁸ nzi ta mu yisa ka tiko legi nzi nga hlambanya nziku: Nzi ta gi nyika ka Abrahama, na Isaka, na Jakobe; nzi ta mu nyika gona, akuva tshomba ya nwina. Hi mina Jehova. Ezek. 20:5

⁹ Mosi i lo wula lezo ka vanana va ka Israeli; kanilezi a va mu ingisangi hi kota ya kuxaniseka kabye ni wukhumbi gabye.

¹⁰ Zonake Jehova i lo wulawula ka Mosi aku:

¹¹ Famba uya byela Faro, a hosi ya Gipite, a tsika a vanana va ka Israeli va huma tikweni gakwe.

¹² Mosi i lo wulawula mahlweni ka Jehova aku: Languta, a vanana va ka Israeli a va rizi ingisangi; Faro i ta nzi ingisa hikuyini, lezi nzi nga ni Xirimiti ke?

¹³ Jehova i lo wulawula kambe ka Mosi na Aroni, a va ruma a kuya ka vanana va ka Israeli, ni ka Faro, a hosi ya Gipite, a va leletela kuya byela Faro a humesa a vanana va ka Israeli lomu tikweni ga Gipite.

A mavito ya vadadaniya Mosi na Aroni.

¹⁴ Lava hi tihloko ta tiyindlu ta vararu vabye: A vana va Rubeni, a matewula ya Israeli: Hanoki, na Palu, na Hezroni, na Karmi. Lava hi mingango ya ka Rubeni.

¹⁵ A vana va Simoni: Jemueli, na Jamina, na Ohade, na Jakima, na Zohate, na Xaule, a nʼwana wa wasati wa muKanani. Leyi hi mingango y ka Simoni.

¹⁶ A mavito ya vana va ka Levi hi mingango yabye hi laya: Gerxoni, na Kohate, na Merari. A malembe ya wutomi ga Levi ma wa hi 137.

¹⁷ A vana va Gerxoni: Libni, na Ximei, hi mingango yabye.

¹⁸ A vana va Kohate: Amrama, na Izhare, na Hebroni, na Uzieli. A malembe ya wutomi ga Kohate ma wa hi 133.

¹⁹ A vana va Merari: Mahati, na Muxi; leyi hi mingango ya ka Levi hi tiyindlu tabye.

²⁰ Amrama i lo teka Jokebede a hahani wakwe, a mu pswalela Aroni na Mosi. A malembe ya wutomi ga Amrama ma wa hi 137.

²¹ A vana va Izhare: Kora, na Nefegi, na Zikri;

²² A vana va Uzieli: Mixaeli, na Elzafani, na Sitri.

²³ Aroni i lo teka Elixeba, nʼwana Aminadaba, a makabye wa Naxoni, a beleka naye Nadaba, na Abihu, na Eliazari, na Itamari.

²⁴ A vana va Kora: Asira, na Elkana, na Abiasafa. Leyi hi mingango ya ka Kora.

²⁵ Eliazari, a nʼwana Aroni, i lo teka a munwe wa vana va Putieli, a beleka naye Finiasi. Leti hi tihloko ta vararu va ka Levi hi mingango yabye.

²⁶ Aroni na Mosi hi lava Jehova a ngaku ka vona: Humesani a vanana va ka Israeli lomu Gipite hi zidlemo zabye. Miti. 7:36

²⁷ Hi vona va nga wulawula na Faro, a hosi ya Gipite, lezaku a humesa a vanana va ka Israeli lomu Gipite. Hi yena Mosi na Aroni.

²⁸ Lego siku Jehova a nga wulawula ka Mosi le tikweni ga Gipite, aku ngalo:

²⁹ Hi mina Jehova. Byela Faro, a hosi ya Gipite, zontlhe lezi nzi ku byelako.

³⁰ Kanilezi Mosi aku ka Jehova: Nzi munhu wa xirimiti; Faro i ta nzi ingisisa kuyini?