Eksodusi 40 - Tshwa Bible

¹ Zonake Jehova i lo wulawula ka Mosi, aku:

² Hi siku go ranga ga hweti yo sangula, u ta yimisa a yindlu ya tenda ga mutlhangano,

³ u enghenisa lomo a nghaxa ya xivumelwano, u sirela a nghaxa hi xisirelo.

⁴ U ta enghenisa ni meza, u yi longisela a zibya za yona; u enghenisa a meza ya tikandiya, u lumeka a tikandiya ta yona.

⁵ U ta veka ni alati ga nzalama ga libani lo nuhela hi le mahlweni ks nghaxa ya xivumelwano, zonake u ta hayeka a xisirelo laha nyangweni ya tabernakeli.

⁶ U ta veka a alati ga ku hisa miphahlelo laha nyangweni ya yindlu ya tenda ga mutlhangano.

⁷ Zonake u ta veka a xinamelo hi laha xikari ka tenda ga mutlhangano ni alati, u chela mati lomo.

⁸ U ta bhiyela zontlhe hi tinguwo ta hubye, u hayeka a xisirelo laha nyangweni ya hubye.

⁹ Zonake u ta teka a mafura ya ku tota, u tota a tabernakeli ni zontlhe zilo za gona, u gi basisa ni zontlhe zibya za gona, lezaku giva gi basileko.

¹⁰ U ta tota a alati ga miphahlelo yo hiswa ni zontlhe zibya za gona; u basisa a alati, zonake alati gi tava gi basisilwe nguvu.

¹¹ U tota ni xinamelo ni xikhatelo xa kona, u xi basisa.

¹² Zonake u tshineta Aroni ni vana vakwe laha nyangweni ya tenda ga mutlhangano, u va hlaza hi mati;

¹³ zonake u ta ambexa Aroni hi tinguwo leti ti basileko, u mu tota, u mu basisa kasi a tira a ntiro wa wupristi mahlweni ka mina.

¹⁴ U tshineta ni vana vakwe, u va ambexa a tinguwo;

¹⁵ u va tota khwatsi hi raru wabye, kasi va tira a ntiro wa wupristi mahlweni ka mina. Hi kutotwa kabye va ta wumbelwa a wupristi ga pinzukelwa ka zontlhe zizukulwana zabye.

¹⁶ Lezo Mosi i lo maha zontlhe khwatsi hi lezi Jehova a mu leleteleko.

A tabernakeli gi yimiswa.

¹⁷ Hi siku go ranga ga hweti yo sangula ya lembe ga wumbiri, a tabemakeli gi lo yimiswa.

¹⁸ Mosi i lo yimisa a tabernakeli, a veka zikhato za gona, a yimisa a mapulango ya gona ni ku enghenisa tivalelo, a yimisa ni timhanze.

¹⁹ Zonake i lo fulela a tabernakeli hi zifulelo, a tlhateka xifenengeto hehla ka xona, kota lezi Jehova a nga leletela Mosi.

²⁰ Zonake i lo enghenisa a Wumboni lomu ka nghaxa, a enghenisa a, mipingo laha ka nghaxa; zonake i lo veka a xitshamu xa wuxinji le hehla ka yona.

²¹ I lo enghenisa a nghaxa lomu ka tabernakeli, a hayeka a xisirelo, a sirela ha xona a nghaxa ya xivumelwano, khwatsi hi lezi Jehova a leleteleko Mosi.

²² Zonake i lo enghenisa a meza lomu ka tenda ga mutlhangano, hi tlhelo ga Nwalungu wa tabernakeli, hi lahandle ka xisirelo.

²³ A vekela hehla ka yona a zibaba, a zi xaxameta mahlweni ka Jehova, kota lezi Jehova a leleteleko Mosi,

²⁴ A meza ya tikandiya i lo yi enghenisa lomu ka tenda ga mutlhangano, yi cuwukana ni meza, hi tlhelo ga Dzonga ga tabernakeli:

²⁵ a veka tikandiya mahlweni ka Jehova, kota lezi Jehova a leleteleko Mosi.

²⁶ I lo veka a alati ga nzalama lomu ka tenda ga mutlhangano mahlweni ka xisirelo,

²⁷ a hisa libani lo nuhela hehla ka gona, kota lezi Jehova a leleteleko Mosi.

²⁸ Zonake i lo hayeka a xisirelo laha nyangweni ya tabernakeli.

²⁹ I lo veka a alati ga miphahlelo ya kuhiswa hi laha nyangweni ya yindlu ya tenda ga mutlhangano, a nyikela a miphahlelo ya kuhiswa ni miphahlelo ya zakuga hehla ka gona, kota lezi Jehova a nga leletela Mosi.

³⁰ Zonake i lo veka a xinamelo laha xikari ka tenda ga mutlhangano ni alati, a chela mati ka xona kasi va hlamba lomo.

³¹ Mosi na Aroni ni vana vakwe va hlamba mawoko ni mikonzo hi mati ya kona,

³² loku va enghena lomu tendeni ga mutlhangano, ni loku va tshinela alatini, va wa hlamba kota lezi Jehova a nga leletela Mosi.

³³ Zonake i lo yimisa a hubye leyi yi renzetekelako a tabernakeli ni alati, a hayeka a xisirelo laha nyangweni ya hubye; lezo Mosi i lo mbheta a ntiro lowo. A wukosi ga Jehova gi tata a tabernakeli.

³⁴ Zonake a refu gi lo fenengeta a tenda ga mutlhangano, hakuva a refu gi wa hi hehla ka gona, ni kuhatima ka Jehova ku tata a tabernakeli,

³⁵ laha kaku hambu na Mosi a tsanzeka ku enghena lomu tendeni ga mutlhangano, hakuva a refu gi wa hi hehla ka gona, ni kuhatima ka Jehova ku tata a tabernakeli.

³⁶ Zonake loku a refu na gi sukile, hehla ka tabernakeli, a vanana va ka Israeli va lo tlhavinyeta a pfhumba gabye; va lo maha zalezo ka gontlhe pfhumba gabye.

³⁷ Kanilezi loku a refu gi nga suki, vonawu va wa nga suki kala ku chikela a siku lego a refu gi ta nga suka ha gona.

³⁸ Hakuva a refu ga Jehova gi wa tshama hehla ka tabernakeli laha hlikanhini; zonake ni wusiku ku woninga a nzilo hi lomu refini mahlweni ka yontlhe a yindlu ya ka Israeli, lomu pfhumbeni gabye gontlhe. Deut. 1:33; Neh. 9:19; 1 Kor. 10:1