Eksodusi 20 - Tshwa Bible

A milayo ya khume.

¹ Zonake Nungungulu i lo wulawula tontlhe leti timhaka, aku:

² Hi mina Jehova, Nungungulu wa wena, loyi a ku humesileko tikweni ga Gipite, a ndlwini ya wukhumbi.

³ U nga ta kuva ni vanwani vanungungulu mahlweni ka mina.

⁴ U nga ti maheli xifananiso xi vatlilweko xo fanana ni zilo lezi zi nga le hehla tilweni, hambu ni lezi zi nga lahasi misaveni, ni xa lezi zi nga lomu matini lahasi ka misava.

⁵ U nga zi khizameli, hambu ni ku zi tirela; hakuva mina Jehova, Nungungulu wa wena, nzi Nungungulu wo pinyama, loyi a tsayisako a vanana hi kota ya zionho za vapswali vabye, kala ka xizukulwana xa wunharu ni xa wumune xa lava va nzi vengako; Deut. 24:16; Jer. 31:29; Ezek. 18:19

⁶ kanilezi nza va mahela wuxinji kala ka xizukulwana xa khume ga mazana xa lava va nzi ranzako, lava va hlayisako milayo ya mina.

⁷ U nga hlakani hi vito ga Jehova, Nungungulu wa wena, hakuva Jehova a nga ta mu khoma kota munhu a nga hava nanzu, loyi a hlakanako hi vito gakwe.

⁸ Alakanya a siku ga sabado ku gi basisa. Jer. 17:21; Ezek. 20:12

⁹ U ta tira ntlhanu wa masiku ni ginwe, u maha yontlhe mitiro ya wena;

¹⁰ kanilezi a siku ga wuntlhanu ni mambiri i sabado ga Jehova, Nungungulu wa wena. U nga tiri ntiro hi siku lego, wena ni mufana wa wena, ni nhanyana wa wena, ni xitiri xa wena xa wanuna ni xa wasati, ni homu ya wena, ni muluveli wa wena loyi a nga mutini wa wena.

¹¹ Hakuva hi ntlhanu wa masiku hi ginwe, Jehova i mahile tilo ni misava, ni bimbi, ni zontlhe zi nga ka zona; kanilezi i lo humula hi siku ga wuntlhanu ni mambiri; hikwalaho Jehova i katekisile a siku ga sabado a gi basisa. Gen. 2:2

¹² Chava raru wa wena ni nyine wa wena, kasi a masiku ya wena ma ta engetelwa tikweni legi u nyikilweko hi Jehova, Nungungulu wa wena. Mat. 15:4; Mar. 7:10; Efe. 6:2

¹³ U nga dayi.

¹⁴ U nga bhayi.

¹⁵ U nga yivi.

¹⁶ U nga lumbeti wakelane wa wena hi wumboni ga mawunwa.

¹⁷ U nga naveli a yindlu ya wakelane wa wena. U nga naveli sati wa wakelane wa wena, ni xitiri xakwe xa wanuna ni xa wasati, ni homu yakwe, ni mbongola yakwe, hambu ni xinwanyani xilo xa wakelane wa wena. Rom. 7:7; 13:9

¹⁸ A vanhu vontlhe va lozwa kudzinza ni kuvuma ka punzu; va wona a kuhatima, ni xitsunga loku xi kari xi tuvika musi. Laha a vanhu va nga wa wona lezo, va lo rurumela nguvu, va yima kule. Maheb. 12:18

¹⁹ Zonake vaku ka Mosi: Wulawula na hina hi ta kuzwa. Kanilezi Nungungulu a nga wulawuli na hina, hi ngafa.

²⁰ Kanilezi Mosi aku ka vanhu: Mu nga chavi, hakuva Nungungulu i tile ku ta mu ringa, kasi a kuchabya kakwe kuva mahlweni ka nwina, kasi ma fela ku kala mu nga onhi.

²¹ Zonake a vanhu va lo yima kule: kanilezi Mosi i lo tshinela lomu munyameni, laho Nungungulu a nga wa hi kona.

²² Jehova aku ka Mosi: Wo ngalo ka vanana va ka Israeli: Mu wonile laha nzi nga wulawula na nwina na nzi hi tilweni.

²³ Mu nga ti maheli vanungungulu va siliva ni va nzalama, ahandle ka mina.

²⁴ U ta nzi akela a alati ga misava, laho u ta nga phahlela kona a miphahlo ya wena ya kuhiswa ni ya kukhesa, ni timhamba ta wena ta tiyivu ni ta tihomu. Kontlhe lomu nzi ta nga veka xialakanyiso xa vito ga mina, nzi tata ka wena nzi ta ku katekisa.

²⁵ Loku u nzi akela a alati hi maribye, u nga aki hi maribye ma vatlilweko; hakuva loku u tlakusa a mbatlo hehla ka wona, u ma nyenyezisile. Deut. 27:5; Jox. 8:31

²⁶ U nga kanzihi alatini ga mina hi mayingo, gi nga woneka a wumbyiri ga wena.