Eksodusi 15 - Tshwa Bible

A Lisimu la ka Jehova.

¹ Zonake Mosi ni vanana va ka Israeli va lo yimbelela ka Jehova lisimu leli, vaku: Nzi ta yimbelela ka Jehova hakuva i tlakukile nguvu; I hoxile bimbini a haxi ni mukhileli wa gona.

² Jehova hi ntamu wa mina, ni lisimu la mina; Yena hi Muhanyisi wa mina. Hi yena Nungungulu wa mina, nzi ta mu dumisa; I Nungungulu wa dadani, nzi ta mu kulisa.

³ Jehova i nhenha ya ntamu, A vito gakwe hi Jehova.

⁴ I hoxile a tikareta ta Faro, ni yimpi yakwe lomu bimbini; A tinhenha takwe ta milangelwa ti rikhile lomu Bimbini go Pswhuka.

⁵ A mabyandlati ma va fenengetile; Va rikhile lomu nonzweni kota maribye.

⁶ A canja ga wena Jehova gi dzunzekile hi ntamu; A canja ga wena ga xinene, Jehova, gi hangalasile valala.

⁷ Hi wukulu ga wuhosi ga wena, Wa hangalasa lava va ku vukelako; U humesa a zanga ya wena, Yi va hisa kota byanyi.

⁸ Hi kuhefemula ka tinhovu ta wena, a mati ma lo tsemeka, A mati lawa ma khulungako ma yimisilwe ma maha nhulu; A mabyandlati ma 16 woma xikari ka bimbi.

⁹ A nala ite: Nzi ta tsutsumisa, nzi khoma, nzi phanga. A muhefemulo wa mina wu ta xuriswa ha vona; Nzi ta hlomula a tlhari ga mina, nzi va daya.

¹⁰ U lo pupuxa hi moya wa wena: A bimbi gi lo va khubunyeta; Va lo rikha kota xiketse, Lomu nonzweni wa mati yo eta.

¹¹ Himani a fananako na wena Jehova, a xikari ka vanungungulu? Himani wo hatima, loyi a basileko kota wena, Loyi a faneleko ku chabyiwa ni ku dumiswa hi tisimu? U mahile zihlamaliso!

¹² U nawulutile a canja ga wena ga xinene, A misava yi va mita,

¹³ Hi tipswalo ta wenawu lo tlhatlhisa vanhu, u va humesa; U va fambisile hi ntamu wa wena, A wutshanwini ga wena go basa.

¹⁴ A vamatiko loku va zi zwile va lo rurumela; A vaFilistia va lo telwa hi hlenekera;

¹⁵ a tihosana ta va ka Edome ti lo dzuka; A tinhenha ta maMoabi ti lo khomiwa hi kudzevetana; A vaaki vontlhe va le Kanani va lo mbhela ntamu.

¹⁶ A kuchava ni kururumela zi lowa hehla kabye; Hi canja ga wena ga ntamu, Va hunzukile va maha timbeveve ti fananako ni maribye, Kala a vanhu va wena va tlhatuka, O Jehova! Va kala va tlhatuka a vanhu lava u va tiruleko.

¹⁷ U ta va chiketa, u ya va zimeka xitsungeni xa tshomba ya wena, Wutshanwini legi u gi longiseleko kuva ga wena, O Jehova! A yindlu yo basa leyi yi mahilweko hi mandla ya wena, Hosi!

¹⁸ Jehova i ta fuma kala kupinzuka.

¹⁹ Hakuva laha a mahaxi ya Faro ni tikareta takwe, ni vakhileli va wona va jamile bimbini; Jehova i lo tlhelisela a mati ya bimbi hehla ka vona; kasi lezo a vanana va ka Israeli va lo famba misaveni yi womileko lomu xikari ka bimbi.

²⁰ Zonake Miriamu, muprofeti wa xisati, a makabye wa Aroni, i lo teka a mutandanda canjeni gakwe, a vavasati vontlhe va huma va mu lanzela, na va hi ni mitandanda, va kina.

²¹ Miriamu i lo vumelana navo, aku: Tsakelani Jehova hakuva i dzunzekile nguvu; I hoxile a haxi ni mukhileli wa gona lomu bimbini.

A mati yo buva ya Mara.

²² Zonake Mosi i lo rangela vaIsraeli hi le Bimbini go Pswhuka, va famba hi tlhelo ga xiwula xa Xura; va lo famba masiku manharu lomu xiwuleni na va nga kumi mati. Mitse. 33:8

²³ Va loya chikela Mara, kanilezi va lo tsanzeka kunwa mati ya le Mara, hakuva ma wa bava; hikwalaho a wutshamu lego gi lo chuliwa vito ga Mara.

²⁴ A vanhu va lo zangarela Mosi, vaku; Hi tanwa yini?

²⁵ Mosi i lo kombela ka Jehova, zonake Jehova i lo mu kombisa a sinya kasi a fela ku yi hoxa lomu matini, a mati ma lo nanziha. Anzhako ka lezo i lo va yimisela milayo ni ziyimiso; laho i lo va ringa, aku:

²⁶ Loku u ingisa a gezu ga Jehova. Nungungulu wa wena, u maha kululama mahlweni kakwe, ni loku u demba ndleve ka ziyimiso zakwe, ni ku hlayisa yontlhe milayo yakwe, cima nzi nga ta neha ka wena a zixaniso lezi nzi nga veka hehla ka vaGipite; hakuva hi mina Jehova loyi a ku chumako.

²⁷ Zonake va lo chikela Elima; laho va lo kuma 12 wa tihlowo, ni 70 wa micinzu. Va lo zimeka matenda yabye kusuhani ni mati. Mitse. 33:9